យោងតាមព័ត៌មានថ្មីៗនេះ បាននិយាយថា ក្រុមហ៊ុន Motorola បានត្រៀមខ្លួននៅក្នុងការប្រកាសចេញនូវស្មាតហ្វូន Moto Edge 50 Pro នៅក្នុងប្រទេសឥណ្ឌា នាថ្ងៃទី 3 ខែមេសានេះ ជាមួយនឹងការបំពាក់នូវបន្ទះឈីប Snapdragon 7 Gen 3។ របាយការណ៍ខាងលើនេះថែមទាំងបានទម្លាយថា ស្មាតហ្វូនថ្មីនេះ ក៏នឹងមានម៉ូដែលបន្ថែមទៀតរួមមានដូចជា Moto Edge 50 Ultra និង Moto Edge 50 Fusion ជាដើម។ បន្ទាប់ពីការបែកធ្លាយរូបភាព render ដែលបញ្ជាក់ពីពណ៌របស់ស្មាតហ្វូន Moto Edge 50 Ultra ហើយនោះ ក៏ការទម្លាយនូវវីដេអូថ្មីមួយដែលមានការបង្ហាញអំពីរូបរាងរបស់ស្មាតហ្វូននេះ និងលក្ខណៈសម្បត្តិមួយចំនួនរបស់ស្មាតហ្វូននេះផងដែរ។
បើតាមអ្នកទម្លាយ @Evleaks ក៏បានបង្ហោះវីដេអូនេះ នៅលើ Twitter/X ផងដែរ។ ផ្អែកលើវីដេអូនេះ បង្ហាញថា ស្មាតហ្វូននេះ នឹងមានគែមអេក្រង់កោងថែមទៀតផង។ នៅពេលនេះ មានវីដេអូថ្មីមួយ បានទម្លាយអំពីការឌីស្សាញគែមកោង និងផផ្នែកខាងក្រោយរបស់ស្មាតហ្វូននេះជាមួយនឹងគែមរបស់ស្មាតហ្វូននេះថែមទៀតហើយ ក្នុងនោះក៏មានការប្រើប្រាស់នូវ Antenna lines នៅលើគែមលោហៈរបស់ស្មាតហ្វូននេះថែមទៀតផង។
នៅវីដេអូនេះ មានការទម្លាយអំពីការប្រើប្រាស់នូវកាមេរ៉ា 3 គ្រាប់ នៅខាងក្រោយជាមួយនឹង Periscope Telephoto Module ហើយនិងមានកាមេរ៉ាគោលទំហំ 50MP។ បន្ថែមពីនេះ នៅលើស្មាតហ្វូន Edge 50 Ultra នេះ ក៏នឹងមានកាមេរ៉ាទំហំ 50-Megapixel Periscope Telephoto ដែលគាំទ្រជាមួយនឹងឡែន 72mm focal length និងមានមុខងារហ៊្សូមបាន 3x optical zoom ថែមទៀត។ ស្មាតហ្វូនថ្មីនេះ នឹងមានអេក្រង់ទំហំ 6.7-អ៊ីងបង្ហាញចេញបានកម្រិត 1.5k គាំទ្រជាមួយនឹងល្បឿន 165Hz refresh rate។ ស្មាតហ្វូននេះ ក៏មានកាមេរ៉ាខាងមុខ single hole-punch ផងដែរ។
សូមជំរាបថា អេក្រង់នេះ គឺនឹងមានការពារដោយកញ្ចក់ Corning Gorilla Glass។ ក្រុមហ៊ុន Motorola និង Corning ក៏បានប្រកាសអំពីភាពជាដៃគូនៅក្នុងខែកុម្ភៈនៅក្នុងព្រឹត្តិការណ៍ MWC 2024 ហើយជាលទ្ធផលគ្រប់ស្មាតហ្វូន Motorola ទាំងអស់គឺមានកញ្ចក់ Gorilla Glass។ ជាមួយគ្នានេះ នៅលើស្មាតហ្វូននេះ ក៏មានការបំពាក់នូវបច្ចេកវិទ្យាការពារទឹក និងធូលី កម្រិត IP68 ផងដែរ។ នៅលើស្មាតហ្វូននេះមាន ការតម្លើងនូវ Dual stereo speaker ហើយនិងបន្ទះឈីប Snapdragon 8s Gen 3 រួមនិងថ្មទំហំ 4500mAh ដែលគាំទ្រនូវកម្លាំងសាក 125W wired ក៏ដូចជា 50W wireless charging ផងដែរ៕
