បន្ទាប់ពីការបង្ហាញវត្តមានរបស់ស្មាតហ្វូន Pura 70 Series រួចមក នៅពេលនេះ មានការទម្លាយនូវព័ត៌មានថ្មីថា ស្មាតហ្វូនជំនាន់ថ្មី Huawei Nova 13 Series នឹងប្រកាសចេញជាផ្លូវការនៅខែមិថុនាខាងមុខនេះហើយ។ ខណៈដែលពេលវេលានៃបង្ហាញខ្លួននៅសល់ពេលយូរទៀតនោះ ពេលនេះ មានដំណឹងថា ស្មាតហ្វូនថ្នាក់កណ្តាលថ្មីនេះ ក៏ប្រហែលជាមានការបំពាក់មកជាមួយនូវបន្ទះឈីប Kirin 9010 ដែលទើបតែមានការប្រើប្រាស់នៅលើ Pura 70 Series ដែលជា ស្មាតហ្វូនថ្នាក់ខ្ពស់របស់ក្រុមហ៊ុននេះអញ្ចឹងដែរ។
ដូច្នេះផ្អែកលើការទម្លាយខាងលើនេះ មានការសន្និដ្ឋានថា ក្រុមហ៊ុននេះហាក់ដូចជាចង់ផ្តោតខ្លាំងទៅលើសមត្ថភាពរបស់ស្មាតហ្វូនជំនាន់ថ្មីនៃត្រកូល Nova ផងដែរ។ សូមជំរាបថា Pura 70 series គឺជាកំពូលស្មាតហ្វូនរបស់ក្រុមហ៊ុនបច្ចេកវិទ្យាយក្សចិនមួយ ដែលទើបតែសម្ពោធដាក់លក់ជាផ្លូវការនៅលើទីផ្សារចិនកាលពីពេលថ្មីៗនេះ ហើយស្មាតហ្វូននេះ ក៏ជាម៉ូដែលថ្មី ដែលមានការបំពាក់នូវបន្ទះឈីបជំនាន់ថ្មី Kirin 9010. ផងដែរ។ បន្ទះឈីបនេះ ដំណើរការនៅលើស្ថាបត្យកម្ម 12-core។
ទាក់ទងនឹងព័ត៌មាននេះ អ្នកទម្លាយ @SmartPikachu ក៏បានបញ្ជាក់ថា ស្មាតហ្វូន Huawei Nova 13 series អាចនឹងមានការបំពាក់នូវបន្ទះឈីប Kirin 9010 ផងដែរ។ បន្ទះឈីប Kirin 9010 នេះ គឺជាជំនាន់ថ្មីរបស់ Kirin 9000s និងមានការគាំទ្រដោយក្រាហ្វិកាត Maleoon 910។ បន្ទះឈីបនេះមាន 12-core ដោយមាន 2 Core ល្បឿន 2.3GHz និង 6 Core ល្បឿន 2.18GHz ខណៈដែល 4 Core ទៀត រត់បានល្បឿន 1.55GHz។ ជាមួយគ្នានេះក៏មានការបញ្ជាក់ថា Nova 13 lineup អាចនឹងដំណើរការនៅលើ HarmonyOS ជំនាន់ថ្មីផងដែរ។
