ក្រុមហ៊ុន Oukitel ទើបតែបានធ្វើការប្រកាសចេញនាឡិកដៃឆ្លាតវៃស៊េរីថ្មីម៉ូដែល Oukitel BT101 ដែលបំពាក់នូវមុខងារពិសេសៗជាច្រើន និងមានតម្លៃធូរថ្លៃ។ នាឡិកាដៃឆ្លាតវៃស៊េរីថ្មីនេះមានមុខនាឡិកាពាសដោយកញ្ចក់បង្ហាញ AMOLED Display និងស្រោបការពារការកកិតឆ្កូតដោយបច្ចេកវិទ្យាកញ្ចក់ Corning Gorilla Glass ហើយនិងមានតម្លៃក្រោម $60។
Oukitel BT101 បំពាក់អេក្រង់ទំហំ 2.02-inch AMOLED Display គាំទ្រកម្រិតបង្ហាញ HD 320x390px។ អេក្រង់នាឡិកាដៃឆ្លាតវៃនេះ គាំទ្រការដាក់តាំងមុខនាឡិកា និងការបង្ហាញសារជូនដំណឹងមួយចំនួន។ នៅលើនាឡិកាដៃឆ្លាតវៃស៊េរីថ្មីនេះមានរន្ធម៉ាយក្រូហ្វូន និង Speaker ដែលផ្តល់នូវសំឡេងលឺខ្លាំង ល្អបំផុតសម្រាប់ភ្ជាប់ជាមួយស្មាតហ្វូនសម្រាប់ការសន្ទនាដោយផ្ទាល់នៅលើនាឡិកា ក៏ដូចជាការបង្ហាញលេខទូរស័ព្ទខលចូលដែលអាចឲ្យធ្វើការទទួល និងបដិសេធការទទួលទូរស័ព្ទហៅចូលផងដែរ។ Oukitel BT101 អាចធ្វើការភ្ជាប់ជាមួយឧបករណ៍ដែលដំណើរការដោយ Android និង iOS ហើយនាឡិកាដៃឆ្លាតវៃមានទំហំផ្ទុក 128MB។
សម្រាប់ភាពធន់រឹងមាំរបស់ Oukitel BT101 គឺទទួលបានវិញ្ញាណបនបត្របញ្ជាក់ការធ្វើតេស្តភាពធន់កម្រិតយោធាអាមេរិក MIL-STD-810H ដោយវាមាននូវប្រព័ន្ធការពារទឹក ធូលី និងធន់ក្នុងការរស់នៅក្រោមទឹកបានដល់ 50 ម៉ែត្រថែមទៀតផង ដូចនេះល្អបំផុតសម្រាប់អ្នកដែលចូលចិត្តការហែលទឹក ឬក៏កីឡាករហែលទឹក។ បន្ថែមពីនេះ Oukitel BT101 ក៏មានលទ្ធភាពអាចធ្វើការហៅទូរស័ព្ទចេញ ឬទទួលការហៅចូលបានដោយផ្ទាល់ជំនូសឲ្យការហៅ ឬទទួលនៅលើស្មាតហ្វូន។ ចំនុចពិសេសទៀតនោះ គឺ Oukitel BT101 ត្រូវបានរចនាឡើងឲ្យមានភាពធន់នឹងសីតុណ្ហភាពកម្រិត -30 និង 70 អង្សាសេថែមទផតផង។
សម្រាប់មុខងារតាមដានសុខភាពវិញ Oukitel BT101 មានដូចជាមុខងារវ៉ាស់ចង្វាក់បេះដូង, វ៉ាស់កម្រិតអុលហ្ស៊ីសែនក្នុងឈាម, មុខងារតាមដានកម្រិតនៃការគេងជាដើម។ បន្ថែមពីនេះវាក៏មាននូវមុខងារ Alarm និង Stopwatch ផងដែរ។ Oukitel BT101 មានថ្មទំហំធំដល់ 410mAh ដោយការសាកភ្លើងមួយពេញម្តងអាចកាន់បានរហូតដល់ជិត 10 ថ្ងៃសម្រាប់ការប្រើប្រាស់ធម្មតាទូទៅ។ បច្ចុប្បន្ននេះ Oukitel BT101 បានដាក់លក់នៅលើបណ្តាញលក់ទំនិញ Amazone ក្នុងតម្លៃខ្ទង់ $59.99៕