នៅពេលនេះ រឿងរ៉ាវបន្ទះឈីបថ្មីនៅមិនទាន់បញ្ឈប់នៅឡើយទេ ដោយមានពាក្យចចាមអារ៉ាមជាច្រើន បានបន្តនិយាយអំពី Kirin 9000s ដែលជាបន្ទះឈីបថ្មីរបស់ក្រុមហ៊ុន Huawei។ ហើយមកដល់ពេលនេះ ក៏មិនទាន់មានព័ត៌មានផ្លូវការនៅឡើយដូចគ្នា។ សូមជំរាបថ កាលពីខែមុននេះ ក្រុមហ៊ុនស្រាវជ្រាវមួយ បានទម្លាយអំពីបន្ទះឈីបនេះ ដែលគេជឿជាក់ថា ផលិតចេញពីក្រុមហ៊ុន SMIC នៅលើដំណើរការ 7nm ហើយនិងផ្អែកនៅលើបច្ចេកវិទ្យា 14nm។
ប៉ុន្តែសម្រាប់ថ្ងៃនេះមានអ្នកទម្លាយមួយរូប បានបញ្ជាក់ថា បន្ទះឈីប Kirin 9000s មិនមែនជាឈីបរបស់ SMIC នោះទេ ដោយបាននិយាយថា នេះគឺជាបន្ទះឈីប 5nm Kirin 9000 របស់ក្រុមហ៊ុន TSMC ដែលបានផលិតចេញកាលពី 3 ឆ្នាំមុន។ អ្នកទម្លាយដែលមានឈ្មោះថា RGcloudS បានអះអាងនៅលើបណ្តាញ X ថា បន្ទះឈីប Kirin 9000s នេះ មិនមែនជាបន្ទះឈីប 7nm របស់ក្រុមហ៊ុន SMIC នោះទេ ដោយលោកលើកឡើងថា នេះអាចជាបន្ទះឈីប Kirin 9000 chip ដែលប្រើប្រាស់នូវដំនើរការ 5nm របស់ក្រុមហ៊ុន TSMC។
ជាមួយនិងការអះអាងបែបនេះ អ្នកទម្លាយរូបនេះ ក៏បានចែករំលែករូបភាពនៃការដោះមើលទៅលើផ្នែកខាងក្នុងរបស់ស្មាតហ្វូន Mate 60 Pro ជំនាន់ថ្មីនេះផងដែរ។ នៅក្នុងរូបភាពនេះ គឺមានការទម្លាយថា Kirin 9000s គឺត្រូវបានផលិតនៅក្នុងសប្តាហ៍ទី 35 នៅក្នុងឆ្នាំ 2020 ដែលអាចស្ថិតនៅចន្លោះថ្ងៃទី 24 ខែសីហាដល់ថ្ងៃទី 30 ខែសីហាឆ្នាំ 2020 កន្លងទៅ។ សូមជំរាបថា នៅក្នុងកំឡុងពេលនោះ សហរដ្ឋអាមេរិកបានពង្រីកទៅលើច្បាប់របស់ខ្លួន ដោយបានរដាក់កម្រិតទៅលើរោងចក្រជាច្រើនពាក់ព័ន្ធទៅនឹងការផលិតបន្ទះឈីបទៅកាន់ក្រុមហ៊ុន Huawei ដោយគ្មានអាជ្ញាបណ្ណនោះ។
ជាលទ្ធផល ស្មាតហ្វូន flagship Huawei series ជាច្រើនដែលបានប្រកាសចេញនៅមុននេះ គឺប្រើប្រាស់នូវបច្ចេកវិទ្យាត្រឹមតែ 4G ខណៈពេលដែលបច្ចេកវិទ្យា 5G គឺប៉ាតង់នៅក្រោមក្រុមហ៊ុនជាច្រើនរបស់សហរដ្ឋអាមេរិក។ យោងតាមពាក្យចចាម អារ៉ាមជាច្រើនទៀត ក៏បានបញ្ជាក់ដែរថា ក្រុមហ៊ុន Huawei នឹងបង្ហាញចេញនូវបន្ទះឈីប Kirin ថ្មីមួយទៀតនៅចុងឆ្នាំនេះផងដែរ៕
