ត្រឡប់ទៅខែមិថុនា ឆ្នាំ 2024 ក្រុមហ៊ុនបច្ចេកវិទ្យាយក្សកូរ៉េខាងត្បូង Samsung Electronics បានធ្វើការប្រកាសចេញបច្ចេកវិទ្យាផលិតបន្ទះឈីបជំនាន់ថ្មីខ្នាត 4nm, 2nm និង 1.4nm processor nod។ ដោយឡែកនៅពេលនេះ ក្រុមហ៊ុនបច្ចេកវិទ្យាផលិតបន្ទះឈីបឈានមុខគេរបស់តៃវ៉ាន់ TSMC (Taiwan Semiconductor Manufacturing Company) បានធ្វើការប្រកាសចេញបច្ចេកវិទ្យាផលិតបន្ទះឈីបជំនាន់ថ្មីចុងក្រោយរបស់ខ្លួនខ្នាត 1.4nm processor technology ដែលបច្ចេកវិទ្យានេះ ត្រូវបានគេរំពឹងថា នឹងប្រើសម្រាប់ការផលិតឈីបឲ្យក្រុមហ៊ុនបច្ចេកវិទ្យាធំៗក្នុងពិភពលោកដូចជា NVIDIA, Apple, AMD និងក្រុមហ៊ុនជាច្រើនទៀត។
ក្រុមហ៊ុនផលិតបន្ទះឈីបអេឡិចត្រូនិចឈានមុខគេក្នុងពិភពលោករបស់តៃវ៉ាន់មួយនេះ ត្រូវបានគេរំពឹងថា នឹងចាប់ផ្តើមសង្វាក់ផលិតកម្មបន្ទះឈីបខ្នាត 1.4nm A14 Processor របស់ខ្លួននៅឆ្នាំ 2028 ខណៈបច្ចេកវិទ្យាបន្ទះឈីបខ្នាត 2nm នឹងចាប់ផ្តើមផលិតកម្មនៅចុងឆ្នាំ 2025 នេះ។
តាមការអះអាងពី TSMC បច្ចេកវិទ្យាបន្ទះឈីបខ្នាត 1.4nm មានអនុភាពខ្លាំងជាង 15% និងប្រើប្រាស់ថាមពលតិចជាង 30% ធៀបនឹងបច្ចេកវិទ្យាបន្ទះឈីបខ្នាត 2nm។ យោងទៅលើតាមបញ្ចីក្រុមហ៊ុនដៃគូរបស់ TSMC បច្ចេកវិទ្យាបន្ទះឈីបជំនាន់ថ្មីចុងក្រោយដ៏មានអនុភាពមួយនេះ អាចនឹងប្រើសម្រាប់ការផលិតបន្ទះឈីបសម្រាប់អនាគតទូរស័ព្ទ iPhone របស់ Apple ក៏ដូចជាផលិតបន្ទះឈីបរបស់ក្រុមហ៊ុន Nvidia GPUs, AMD និងក្រុមហ៊ុន។
ក្រុមហ៊ុន TSMC បានបញ្ជាក់ថា សម្រាប់បច្ចេកវិទ្យាបន្ទះឈីបខ្នាត 1.4nm Processor Technology គឺត្រូវបានបង្កើនសមត្ថភាពទៅលើប្រព័ន្ធ Logic density ដែលផ្តល់ឲ្យប្រព័ន្ធដំណើរការរបស់បន្ទះឈីបខ្លាំងជាងបច្ចេកវិទ្យា 2nm processor ហើយនិងដំណើរការលឿនជាង 30% ក៏ដូចជាមានប្រសិទ្ធិភាពខ្ពស់ជាង 60% ធៀបនឹងបច្ចេកវិទ្យា 3nm ដែលប្រើនៅលើបន្ទះឈីបស្មាតហ្វូនកំពូលៗក្នុងពេលបច្ចុប្បន្ន។
សម្រាប់ទូរស័ព្ទ iPhone 17 Series ដែលនឹងមកដល់នៅឆ្នាំ 2025 នេះ គឺនៅបន្តប្រើបច្ចេកវិទ្យាបន្ទះឈីប 3nm N3P node សម្រាប់បន្ទះឈីប A-Series។ ខណៈបច្ចេកវិទ្យាបន្ទះឈីប 2nm សម្រាប់ឈីប A-Series អាចនឹងមានប្រើនៅលើ iPhone ជំនាន់ថ្មីនៅរយះពេលប៉ុន្មានឆ្នាំខាងមុខទៀត។ រីបច្ចេកវិទ្យា 1.4nm A14 Process វិញ នឹងមានប្រើសម្រាប់ជំនាន់ក្រោយៗទៀតរបស់ iPhones៕
