ទូរស័ព្ទអេក្រង់បត់ជំនាន់ថ្មី Samsung Galaxy Z Fold 7 និង Z Flip 7 នឹងមកដល់ផ្លូវការណ៍នៅដើមខែកក្តដា ខាងមុខនេះ។ ហើយនៅពេលនេះ មានរូបភាពគំរូព្រាងថ្មីបង្ហាញពីការឌីស្សាញរូបរាងរបស់ស្មាតហ្វូនអេក្រង់បត់ជំនាន់ថ្មីនេះ ពី TechManiacs។ តាមប្រភពបានទម្លាយថា Samsung Galaxy Z Fold 7 នឹងមានកម្រាស់ស្តើងជាងជំនាន់ Galaxy Z Fold 6 ដែលចេញនៅឆ្នាំ 2024។
យោងទៅលើរបាយការណ៍ដែលបានចេញផ្សាយលើកមុនបានឲ្យដឹងថា Galaxy Z Fold 7 នឹងមានកម្រាស់ស្តើងត្រឹម 4.5mm នៅពេលពន្លា និង 9.5mm នៅពេលបត់។ ដោយឡែកតាមរបាយការណ៍ថ្មីនៅពេលនេះ បានបញ្ជាក់ថា Galaxy Z Fold 7 នឹងមានកម្រាស់ត្រឹម 8.2mm នៅពេលបត់។ ប្រសិនបើដូច្នេះមែន គឺមានន័យថា Galaxy Z Fold 7 នឹងមានកម្រាស់ស្តើងជាង OPPO Find N5 ដែលមានកម្រាស់ 8.9mm នៅពេលបត់។ ហើយក៏ស្តើងជាងម៉ូដែលពិសេស Samsung galaxy Z Fold Special Edition ដែលមានកម្រាស់ 10.6mm។
Samsun Galaxy Z Fold 7 នឹងដំឡើងមកជាមួយសែនស័រកាមេរ៉ាទំហំ 200MP ដូចម៉ូដែល Special Edition ដែរ ប៉ុន្តែ មានលែន Telephoto កម្រិត 3X ទំហំ 10MP និង Ultrawide ទំហំ 12MP។ ចំនែកបន្ទះអេក្រង់របស់ Z Fold 7 វិញ នឹងកើនពីទំហំ 7.6-inch នៅលើ Z Fold 6 ឡើងដល់ទំហំ 8-inch និងអេក្រង់ខាងក្រៅកើនពីទំហំ 6.3-inch ឡើងដល់ 6.5-inch ដែលប្រើនៅលើ Z Fold Special Edition។ ចំនែកម៉ូដែល Galaxy Z Flip 7 វិញ នឹងបង្កើនទំហំអេក្រង់ខាងក្រៅពី 3.4-inch ឡើងដល់ 4-inch ហើយនឹងមានកម្រាស់ស្តើងជាងជំនាន់ Z Flip 6 បច្ចុប្បន្នផងដែរ។
សម្រាប់ទំហំថ្មវិញ Galaxy Z Flip 7 នឹងមានថ្មទំហំធំជាងមុខឡើងដល់ 4,300mAh ធៀបនឹងទំហំថ្ម 4,000mAh នៅលើ Z Flip 6។ ទៅលើប្រព័ន្ធសែនស័រកាមេរ៉ាវិញ Galaxy Z Flip 7 នឹងរក្សាការបំពាក់សែនស័រទំហំ 50MP+12MP ដែលប្រើនៅលើ Z Flip 6 ដដែល។ Galaxy Z Fold និង Flip 7 នឹងដំណើរការដោយបន្ទះឈីប Snapdragon 8 Elite For Galaxy ហើយតម្លៃរបស់ Galaxy Z Fold 7 អាចនឹងឡើងថ្លៃជាង $100 ពីលើតម្លៃរបស់ Galaxy Z Fold 6 បច្ចុប្បន្នផងដែរ៕
