គិតមកដល់ថ្ងៃនេះ ការបង្ហាញវត្តមានរបស់កំពូលស្មាតហ្វូនស៊េរីថ្មីម៉ូដែល Huawei Mate 80 Series គឺកាន់តែកៀកកិតខិតចូលមកដល់ហើយ។ នៅថ្ងៃនេះ ផ្អែកតាមការបែកធ្លាយចុងក្រោយមានប្រភពមកពីប្រទេសចិន បាននិយាយថា Huawei Mate 80 Series ដែលត្រៀមខ្លួននិងប្រកាសចេញឆាប់ៗនេះ គឺនឹងមានការបំពាក់នូវរ៉េមដែលមានទំហំធំដល់ទៅ 20GB។
គួរបញ្ជាក់ថា នៅលើទីផ្សារនាពេលនេះ សម្រាប់ស្មាតហ្វូនថ្នាក់ប្រណិតៗ ដែលមានលក់នោះ គឺមានរ៉េមទំហំចាប់ពី 12GB ទៅ 16GB ប៉ុណ្ណោះ។ ដូច្នេះជាមួយវត្តមានរបស់ស្មាតហ្វូជំនាន់ថ្មី ដែលមានរ៉េមទំហំ 20GB នឹងក្លាយជាកំពូលស្មាតហ្វូននៅលើទីផ្សារជាក់ជាមិនខាន។
Huawei Mate 80 Series ត្រូវបានគេនិយាយថា នឹងមានការប្រើប្រាស់នូវបន្ទះឈីបជំនាន់ថ្មី Huawei Kirin 9030 ប៉ុន្តែមិនទាន់មានការទម្លាយនូវព័ត៌មានស៊ីជម្រៅនៅឡើយទេ។ Huawei Mate 80 Series នឹងបង្ហាញចេញជាមួយនិងជម្រើស 4 ម៉ូដែល មានដូចជា ម៉ូដែលស្តង់ដារ Mate 80, Mate 80 Pro, Mate 80 Pro Max និងម៉ូដែលចុងក្រោយ Mate 80 RS Master Edition។ យោងតាមរបាយការណ៌ចេញពី MyDrivers នៅពេលនេះ ក៏បានបង្ហាញដែរថា ស្មាតហ្វូន Pro Max នឹងមកជំនួស Pro+ នេះបើតាមព្យាករណ៌នៅលើទីផ្សារ។
ក្រឡេកមកមើលការបញ្ជាក់ផ្លូវការទៅលើបច្ចេកវិទ្យាថ្មីនៅលើស្មាតហ្វូនជំនាន់ថ្មីទាំងនេះ គឺទៅលើការបំពាក់នូវមុខងារ 3D face recognition។ បន្ថែមពីនេះ ក្រុមហ៊ុន Huawei ក៏នឹងមានការប្រើប្រាស់នូវបច្ចេកវិទ្យាប្រណិតៗជាច្រើនទៀតផងដែរ ហើយនៅលើម៉ូដែលថ្មីនេះ ក៏នឹងមានការបំពាក់នូវសិនស័រស្កែនម្រាមដៃនៅលើចំហៀង ហើយនិងសុំពណ៌ក្រហមនៅលើម៉ូឌុលកាមេរ៉ាទៀតផង។ Mate 80 Series ត្រូវបានគេទម្លាយថា នឹងបង្ហាញខ្លួននៅថ្ងៃទី 25 ខែវិច្ឆិកាខាងមុខនេះហើយ។
