យោងតាមលោក Parker Shi ប្រធានទំនាក់ទំនងអន្តរជាតិរបស់ក្រុមហ៊ុន Great Wall Motor (GWM) របស់ប្រទេសចិនបានឲ្យដឹងថា GWM បាននឹងកំពុងរៀបចំផែនការបង្កើតរោងចក្រផលិតរថយន្តពេញលេញដំបូងរបស់ខ្លួននៅតំបន់អឺរ៉ុប ដែលមានគោលដៅផលិតរថយន្តប្រចាំឆ្នាំចំនួន 300,000 គ្រឿងនៅឆ្នាំ 2029។ GWM កំពុងសិក្សាទីតាំងសម្រាប់សាងសងរោងចក្រដ៏មានសក្តានុពលដំបូងរបស់ខ្លួននៅក្នុងប្រទេសអេស្ប៉ាញ និងហុងគ្រី។
លោក Shi បានមានប្រសាសន៍នៅក្នុងបទសម្ភាសន៍មួយថា ថ្លៃពលកម្ម និងភស្តុភារកម្ម គឺជាកត្តាសំខាន់ក្នុងការសម្រេចចិត្តក្នុងការជ្រើសរើសទីតាំងក្នុងការបង្កើតរោងចក្ររបស់ GWM ដោយសារគ្រឿងបន្លាស់សំខាន់ៗនឹងត្រូវដឹកជញ្ជូនទៅអឺរ៉ុបសម្រាប់ការផ្គុំនៅដំណាក់កាលដំបូង។ ហើយក្រុមហ៊ុនក៏កំពុងតាមដានពីការផ្លាស់ប្តូរដែលអាចកើតមាននៅក្នុងគោលនយោបាយឧស្សាហកម្មរបស់សហភាពអឺរ៉ុប រួមទាំងលក្ខខណ្ឌវិនិយោគ និងរបបពន្ធផ្សេងៗទៀតផងដែរ។ ក្នុងពេលបច្ចុប្បន្ន GWM បាននឹងកំពុងដំណើរការរោងចក្រផលិតរបស់ខ្លួននៅក្នុងប្រទេសរុស្ស៊ី ថៃ និងប្រេស៊ីល ប៉ុន្តែមិនទាន់មានរោងចក្រនៅអឺរ៉ុបខាងលិចនៅឡើយទេ។
ការផ្លាស់ប្តូររបស់ក្រុមហ៊ុន GWM បានកើតឡើងនៅពេលដែលក្រុមហ៊ុនកំពុងប្រឈមមុខនឹងការធ្លាក់ចុះនៃការលក់នៅអឺរ៉ុបសម្រាប់ម៉ាកយីហោរថយន្តអគ្គិសនី Ora របស់ខ្លួន ដែលមានការចុះបញ្ជីរថយន្តថ្មីត្រឹមតែ 3,706 គ្រឿងនៅក្នុងតំបន់នេះកាលពីឆ្នាំមុន ធ្លាក់ចុះ 41%។ ផ្ទុយទៅវិញ ការដឹកជញ្ជូនទៅកាន់ទីផ្សារក្រៅប្រទេសទូទាំងពិភពលោករបស់ក្រុមហ៊ុនបានឈានដល់កំណត់ត្រា 453,141 គ្រឿងកាលពីឆ្នាំមុន។ ការជំរុញក្នុងការបង្កើតរោងចក្រនៅអឺរ៉ុប គឺជាផ្នែកមួយនៃគោលដៅដ៏ទូលំទូលាយរបស់ GWM ក្នុងការឈានដល់ការលក់នៅក្រៅប្រទេសចំនួន 1 លានគ្រឿងជារៀងរាល់ឆ្នាំចាប់ពីឆ្នាំ 2030 ទៅ។
បើតាមការបញ្ជាក់ពីលោក Shi រោងចក្រដំបូងរបស់ GWM នៅអឺរ៉ុបដែលបានគ្រោងទុកនេះ នឹងសាងសង់ប្រព័ន្ធថាមពលពេញលេញ ចាប់ពីម៉ាស៊ីនចំហេះក្នុង (ICE), រថយន្តកូនកាត់ (Plug-in-hybrid) និងរថយន្តអគ្គិសនីសុទ្ធ (BEV) ដើម្បីបំពេញតម្រូវការរថយន្តរថយន្តច្រើនប្រភេទសម្រាប់អតិថិជននៅទីផ្សារអឺរ៉ុប។ បន្ថែមពីនេះ GWM ក៏នឹងមានការប្រកាសចេញ និងចេញលក់ម៉ូដែលរថយន្តសំខាន់ៗរបស់ខ្លួនដែលរួមទាំងរថយន្តប្រភេទ Compact-SUV នៃម៉ាក ORA គឺម៉ូដែល Ora 5 ដែលត្រៀមប្រកាសចេញផ្លូវការណ៍នៅទីផ្សារអឺរ៉ុបនាពាក់កណ្តាលឆ្នាំ 2026 ខាងមុខនេះ។ ការពង្រីកទីផ្សាររបស់ GWM នៅអឺរ៉ុបក៏ត្រូវបានរៀបចំឡើងក្នុងបរិបទនៃការពង្រីករបស់ BYD នៅអឺរ៉ុបផងដែរ។
តាមការរាយការណ៍ BYD កំពុងមានគម្រោងសាងសង់រោងចក្រទីបីរបស់ខ្លួននៅអឺរ៉ុប ដោយមានប្រទេសអេស្ប៉ាញជាអ្នកនាំមុខគេ ដោយចូលរួមជាមួយប្រតិបត្តិការដែលមានស្រាប់នៅប្រទេសហុងគ្រី និងតួកគី។ អ្នកវិភាគបានបង្ហាញថា ផែនការផលិតក្នុងស្រុករបស់ BYD អាចពន្លឿនការប្រកួតប្រជែងនៅក្នុងទីផ្សារសំខាន់ៗរបស់សហភាពអឺរ៉ុប ដែលជំរុញឱ្យ GWM ត្រូវតែពន្លឿនផែនការណ៍សាងសងរោងចក្រនៅអឺរ៉ុបរបស់ខ្លួន។ តាមរយៈនៃការបង្កើតផលិតកម្មក្នុងស្រុក GWM មានគោលបំណងកាត់បន្ថយការចំណាយទាក់ទងនឹងការនាំចូល និងការប្រឈមនឹងពន្ធគយ ខណៈពេលដែលក្រុមហ៊ុន កំពុងប្រកួតប្រជែងជាមួយក្រុមហ៊ុនអឺរ៉ុបដែលកំពុងកាន់កាប់ទីផ្សារ និងគូប្រជែងក្រុមហ៊ុនចិនដូចគ្នា ដែលកំពុងមានទីផ្សារខ្លាំងក្នុងតំបន់អឺរ៉ុបដូចជា BYD ជាដើម៕
