បន្ទាប់មានការទម្លាយព័ត៌មានជាច្រើនរបស់ Galaxy S26 Ultra រួចមក មានអ្នកគាំទ្រជាច្រើនរបស់ក្រុមហ៊ុន Samsung បានបង្ហាញពីក្តីសង្ឃឹមថា ក្រុមហ៊ុនបច្ចេកវិទ្យាយក្សកូរ៉ខាងត្បួងមួយ នឹងមានការ Upgrade កាន់តែខ្លាំងថែមទៀតទៅលើស្មាតហ្វូនជំនាន់ថ្មីសម្រាប់ឆ្នាំ 2027 ខាងមុខនេះ។ ស្មាតហ្វូនជំនាន់ថ្មី Galaxy S27 Ultra ត្រូវបានគេរំពឹងថា អាចនឹងប្រើប្រាស់នូវសិនស័រ 1/1.3″ ទំហំ 200MP ដែលក្រុមហ៊ុននេះ ធ្លាប់បានប្រើប្រាស់នៅលើស្មាតហ្វូន Galaxy S23 Ultra កន្លងមករួចហើយ។
តាមការបញ្ជាក់របស់អ្នកទម្លាយ Ice Universe បានអោយដឹងថា សម្រាប់វត្តមានស្មាតហ្វូនជំនាន់ថ្មីថ្នាក់ប្រណិតក្រុមហ៊ុន Samsung គឺនឹងមិនទាន់មានគម្រោងនៅក្នុងការប្រើប្រាស់នូវសិនស័រថ្មីនៅឡើយទេ។ គាត់បានរំពឹងថា ទំហំសិនស័ររបស់ស្មាតហ្វូន Galaxy S27 Ultra នឹងមិនផ្លាស់ប្តូរនោះទេ។ សម្រាប់ពេលនេះ ក្រុមហ៊ុន Samsung គឺបាននឹងកំពុងតែធ្វើការអភិវឌ្ឍទៅលើសិន ស័រទំហំ 200MP របស់ខ្លួនថែមទៀតហើយដោយពីមួយជំនាន់ទៅមួយជំនាន់កាន់តែប្រសើរខ្លាំងៗឡើង។
គួរបញ្ជាក់ផងដែរថា ថ្មីៗនេះ ក្រុមហ៊ុន Sony ក៏ទើបបានប្រកាសចេញនូវសិនស័រ LYT-901 ដែលមានទំហំ 1/1.12-អ៊ីង សម្រាប់ប្រើប្រាស់នៅលើកាមេរ៉ា 200MP ផងដែរ។ ផ្អែកតាមពាក្យចចាមអារ៉ាមថ្មីនៅពេលនេះ បានបញ្ជាក់ថា សិនស័រថ្មីនេះ អាចនឹងក្លាយជាការបោះជំហានថ្មីមួយទៀតសម្រាប់អ្នកថតរូបភាពនៅលើស្មាតហ្វូន Android ផងដែរ។
សម្រាប់ស្មាតហ្វូនលំដាប់កំពូលរបស់ក្រុមហ៊ុន Samsung ដែលនឹងមានវត្តមាននៅក្នុងឆ្នាំ 2027 គឺអាចនឹងពឹងផ្អែកទៅលើការ update version នៃសិនស័រ 1/1.3 អ៊ីង ISOCELL sensor ដែលយើងគ្រប់គ្នាបានឃើញអស់រយៈពេលប៉ុន្មានឆ្នាំនេះ។ នៅក្នុងរយៈពេលប៉ុន្មានឆ្នាំចុងក្រោយនេះ ក្រុមហ៊ុននេះ គឺមានការផ្តោតខ្លាំងទៅលើការពង្រឹងទៅលើផ្នែក Software ជាជាងការផ្តោតទៅលើផ្នែក Hardware នៃកាមេរ៉ា។ បើមើលទៅលើគូប្រជែងរបស់ក្រុមហ៊ុននេះ ក៏មានការបញ្ចេញនូវស្មាតហ្វូនជាច្រើននៅលើទីផ្សារដែលមានសិនស័រធំផងដែរ ក្នុងនោះមានដូចជា OPPO Find X9 Pro និង vivo X300 Pro ជាដើម។
សូមជំរាបថា ព័ត៌មាននេះ គ្រាន់តែជាការព្យាករណ៌ពីអ្នកទម្លាយ ប៉ុណ្ណោះ អ្វីៗនឹងមានការបញ្ជាក់ច្បាស់ នៅពេលដែលក្រុមហ៊ុនបញ្ជាក់ផ្លូវការណ៌។ សូមកុំភ្លេចតាមដានជាមួយគ្នា៕
