ក្រុមហ៊ុន Samsung ត្រូវបានគេរាយការណ៍ថា បាននឹងកំពុងធ្វើការលើសង្វាក់ផលិតស្មាតហ្វូនអេក្រង់បត់បីបត់ដំបូងរបស់ខ្លួនដើម្បីប្រគូតប្រជែងទីផ្សារជាមួយនឹង Huawei Mate XT Ultimate ដែលកំពុងកាន់កាប់ទីផ្សារដ៏ឯករាជ្យក្នុងពេលបច្ចុប្បន្ន។ ស្មាតហ្វូនអេក្រង់បត់បីបត់ដំបូងរបស់ Samsung ត្រូវបានគេស្គាល់ឈ្មោះហៅថា Galaxy Z TriFold ហើយស្មាតហ្វូនថ្មីនេះត្រៀមនឹងបង្ហាញវត្តមាននៅទីផ្សារប្រទេសកូរ៉េខាងត្បូងខែក្រោយនេះ (ខែធ្នូ)។
ដោយឡែកនៅពេលនេះ ក៏មានប្រភពព័ត៌មានលេចលឺមកថា Samsung Galaxy Z TriFold គឺនឹងមានតម្លៃធូរថ្លៃលើសពីការរំពឹងទុក។ បើយោងតាមប្រភពចេញពីកូរ៉េខាងត្បូងបានអះអាងថា Galaxy Z TriFold នឹងមានតម្លៃខ្ទង់ 3.6 លានវ៉ុន ឬប្រហែល $2,447 នៅក្នុងទីផ្សារកូរ៉េខាងត្បូង។
ខណៈតម្លៃនេះ ហាក់នៅតែខ្ពស់បន្តិច ប៉ុន្តែ បើធៀបនឹងតម្លៃដែលបានបែកធ្លាយពីមុន ឃើញថារាងធូរថ្លៃជាងបន្តិច ដោយប្រភពព័ត៌មានលើកមុនបាននិយាយថា Galaxy Z TriFold អាចមានតម្លៃប្រហែល $2,720 ឯណោះ។ យ៉ាងមិញបើតម្លៃនេះជាតម្លៃពិតមែន គឺមានន័យថា ស្មាតហ្វូនអេក្រង់បត់បីបត់ដំបូងពី Samsung មានតម្លៃធូរថ្លៃច្រើនជាង បើធៀបនឹងតម្លៃ Huawei Mate XT Ultimate ដែលមានតម្លៃចាប់ពីខ្ទង់ជាង $4,000 ដល់ទៅជាង $5,000 ឯណោះ។
ប្រភពព័ត៌មានបែកធ្លាយនាពេលកន្លងមកបាននិយាយថា Samsung Galaxy Z TriFold អាចនឹងមានលក់តែនៅក្នុងហាងលក់របស់ Samsung និងមានតែមួយពណ៌ជាមួយទំហំផ្ទុកតែមួយជម្រើសប៉ុណ្ណោះ។ ប្រភពព័ត៌មានបានបង្ហើបឲ្យដឹងថា Galaxy Z TriFold របស់ Samsung នឹងមានការឌីស្សាញមកជាមួយអេក្រង់ខាងក្រៅមានទំហំ 6.5-inch និងអេក្រង់បត់បីតង់ខាងក្នុងមានតំហំ 10-inch នៅពេលពន្លា។ ហើយអេក្រង់ខាងក្រៅ គឺមានកម្រិតពន្លឺខ្ពស់ដល់ 2,600nits និងអេក្រង់បត់ខាងក្នុងមានកម្រិតពន្លឺខ្ពស់ 1,600nits។
ស្មាតហ្វូនអេក្រង់បត់បីបត់ដំបូងរបស់កូរ៉េខាងត្បូងមួយនេះ ក៏នឹងមានបំពាក់មកជាមួយសែនស័រកាមេរ៉ាទំហំធំដល់ 200MP ហើយនិងមានថ្មទំហំ 5,437mAh ជាមួយនឹងការប្រើប្រាស់បន្ទះឈីបនាគរាជជំនាន់ចុងក្រោយរបស់ Qualcomm ថែមទៀតផង។ Galaxy Z TriFold អាចនឹងមានកម្រាស់ 14mm នៅពេលបត់ ហើយនៅពេលពន្លាអាចមានកម្រាស់ស្តើងប្រមាណជា 3.9mm, 4.0mm, និង 4.2mm។ តាមប្រភពព័ត៌មានចចាមអារាមបានអះអាងថា Samsung Galaxy Z TriFold នឹងប្រកាសចេញផ្លូវការណ៍នៅថ្ងៃទី 5 ខែធ្នូ ឆ្នាំ 2025 ខាងមុខនេះ។ ទោះជាយ៉ាងណា នៅមិនទាន់មានការបញ្ជាក់ផ្លូវការណ៍ក្រុមហ៊ុន Samsung នៅឡើយទេក្នុងពេលនេះ៕
