Leapmotor B05 ឬត្រូវបានគេស្គាល់ថា Lafa 5 នៅទីផ្សារប្រទេសចិននោះ ពេលនេះ ក្រុមហ៊ុនបានធ្វើការប្រកាសចេញលក់ជាផ្លូវការណ៍ហើយនៅទីផ្សារប្រទេសចិននៅមុនការនាំចេញទៅកាន់ទីផ្សារសកល។ Leapmotor B05/ Lafa 5 មានជម្រើសពីរម៉ូដែល គឺ B05 Pro មានតម្លៃខ្ទង់ $13,800 និងម៉ូដែល B05 Max មានតម្លៃខ្ទង់ $17,200។ ឡានអគ្គិសនីប្រភេទ Hatchback ស៊េរីថ្មីនេះ ត្រូវបានផលិតឡើងដោយប្រើប្រាស់គ្រោងឆ្អឹងប្រភេទ LEAP 3.5 platform ដោយមានបណ្តោយ 4,430mm/ ទទឹង1,880 mm/ កំពស់ 1,520mm និងមានគម្លាតចន្លោះកង់មុខទៅកង់ក្រោយ 2,735mm។
Leapmotor B05 ដំណើរការដោយប្រព័ន្ធម៉ូទ័រអគ្គិសនីខាងមុខមួយដែលមានជម្រើសកម្លាំង 132kW ឬ 160kW ដែលទទួលថាមពលពីកញ្ចប់អាគុយដែលមានទំហំ 56.7kWh ឬ 67.1kWh ហើយការសាកភ្លើងមួយពេញអាចបើកបរបានចម្ងាយផ្លូវ 515km ឬ 605km តាមស្តង់ដារតេស្តពី CLTC។ នៅលើម៉ូដែល B05 Ultra មានដំឡើងមកជាមួយសែនស័រ LiDAR នៅលើដំបូលខាងមុខ ជាមួយប្រព័ន្ធគណនាឆ្លាតវៃកម្រិត 200TOPS និងគាំទ្រដោយប្រព័ន្ធសែនស័រជំនួយបន្ថែមចំនួន 27 គ្រាប់។
នៅផ្នែកកាប៊ីនខាងក្នុងមានការឌីស្សាញបែបទំនើបនិយមដោយក្នុងនោះមានមកជាមួយអេក្រង់បង្ហាញព័ត៌មានទំហំ 8.8-inch Digital Instrument Cluster រួមជាមួយអេក្រង់កម្សាន្តទំហំធំដល់ 14.6-inch កម្រិតបង្ហាញ 2.5K ប្រតិបត្តិការដោយ Leapmotor OS 4.0 Plus ដែលគាំទ្រដោយបន្ទះឈីប Snapdragon Processor។ បន្ថែមពីនេះ Leapmotor B05 ឬ Lafa 5 មានបំពាក់មកជាមួយកៅអីមានមុខងារខ្យល់ក្តៅត្រជាក់, ដំបូលបើក panoramic sunroof, ប្រព័ន្ធភ្លើងបំភ្លឺតាមកាប៊ីន 256 ពណ៌ និងកន្លែងសាកថ្មទូរស័ព្ទមិនប្រើខ្សែជាដើម wireless phone charging pad។
ឡានអគ្គិសនិស៊េរីថ្មីនេះមានជម្រើសពណ៌ដូចជា ពណ៌បៃតងហៅថា Electric Yellow, ពណ៌ខោវហៅថា Starsky Blue, និងពណ៌ផ្កាឈូកហៅថា Morgan Pink។ ជាមួយគ្នានេះ Leapmotor ក៏បានបញ្ជាក់ដែរថា សម្រាប់ម៉ូដែលថ្មី Sport នៃម៉ូដែល B05 ឬ Lafa 5 Ultra នឹងមកដល់នាត្រីមាសទីពីរក្នុងឆ្នាំ 2026 ជាមួយនឹងការកែប្រែរចនាបថខាងក្រៅថ្មីកាន់តែទាក់ទាញ ជាមួយនិងការប្រើប្រាស់យ៉ាន់កង់ស្ព័រទំហំ 19-inch៕
