ក្រុមហ៊ុន Black Shark ទើបតែបានទម្លាក់ចេញនាឡិកាដៃឆ្លាតវៃស៊េរីថ្មីរបស់ខ្លួនម៉ូដែល GS3 Ultra បន្ទាប់ពីការបង្ហាញវត្តមានរបស់ GS3 កាលពីជាង 1 ឆ្នាំមុន។ Black Shark GS3 Ultra ត្រូវបានក្រុមហ៊ុនធ្វើការកែប្រែការឌីស្សាញថ្មីនៅលើតួរខ្លួនប្រភេទលោហៈមានភាពធន់រឹងមាំជាងមុនជាមួយការបំពាក់នូវប៊ូតុងចុចដែលផ្តល់នូវភាពទំនើបស៊ីវីល័យក្នុងការប្រើប្រាស់ជាងមុន។
នាឡិកាដៃឆ្លាតវៃជំនាន់ថ្មីនេះ មានអេក្រង់រាងរង្វង់ទំហំ 1.43-inch ជាប្រភេទអេក្រង់ AMOLED Display គាំទ្រកម្រិតបង្ហាញ 466x466px និងមានកម្រិតពន្លឺខ្ពស់ដល់ 1,000nits ជាមួយកម្រិតទឹកពណ៌ដល់ 16.7 លានពណ៌ ព្រមទាំងមានស្រទាប់កញ្ចក់ការពារប្រភេទ H9 Gorilla Glass ហើយនឹងមាន Watch Face មកស្រាប់ចំនួន 270 សម្រាប់តាំងបង្ហាញនៅលើអេក្រង់តាមការស្រឡាញ់ថែមទៀតផង។ Black Shark GS3 Ultra បានទទួលវិញ្ញាណបនប័ត្របញ្ជាក់ភាពធន់រឹងមាំក្នុងការប្រើប្រាស់កម្រិត MIL-STD-810 ហើយនឹងមានប្រព័ន្ធអាវក្រោះការពារទឹក និងធូលីចូលកម្រិត 5ATM រួមជាមួយ IP69K ផងដែរ។
Black Shark GS3 Ultra មានដំឡើងមកជាមួយមុខងារកីឡាចំនួន 160 និងអាចចាប់ពីសកម្មភាពប្រចាំថ្ងៃរបស់យើងដោយស្វ័យប្រវត្តិ ដូចជាការដើរ ការរត់ ការហាត់ប្រាណអេលីបទីក និងការចែវទូកជាដើម។ បន្ថែមពីនេះ GS3 Ultra ក៏មានមុខងារវ៉ាស់ចង្វាក់បេះដូង កម្រិតភាពស្ត្រេស អុកស៊ីហ្សែនក្នុងឈាម និងកម្រិតនៃការគេងរបស់យើងចំនូន 4 របៀបដូចជា Deep Sleep, Light Sleep, REM, និង Awake។
ជាងនេះទៅទៀត Black Shark GS3 Ultra មានភ្ជាប់មកជាមួយប្រព័ន្ធកំនត់ទីតាំង Dual-band GPS (L1+L5) ដែលបានបន្ថែមចូលក្នុងប្រព័ន្ធ BeiDou, GLONASS, NavIC, និង Galileo រួមនឹងមុខងារ ENC ដែលអាចទទួលការហៅទូរស័ព្ទចូលដោយផ្ទាល់នៅលើនាឡិការផងដែរ។
ជាមួយគ្នានេះ បើតាមការអះអាងពី Black Shark បានបញ្ជាក់ថា សម្រាប់ថ្មរបស់ GS3 Ultra គឺមានសមត្ថភាពកាន់ថាមពលប្រើប្រាស់បានយូររហូតដល់ទៅ 18 ថ្ងៃនៅពេលសាកភ្លើងពេញម្តង និងកាន់បានដល់ 45 ថ្ងៃ នៅពេលទុកចោល (Ultra-Long Standby) ប៉ុន្តែ ក្រុមហ៊ុនមិនបានបញ្ជាក់ពីទំហំថ្ម និងបច្ចេកវិទ្យាសាកថ្មនោះទេ។ Black Shark GS3 Ultra មានមកជាមួយជម្រើសពណ៌ទឹកប្រាក់ និងពណ៌ខ្មៅ។ ដោយឡែកចំពោះតម្លៃ និងថ្ងៃចេញលក់ផ្លូវការណ៍ក្រុមហ៊ុនមិនទាន់បានបញ្ជាក់លម្អិតនៅឡើយទេក្នុងពេលនេះ៕
