ក្រៅតែពីដំណឹងអំពីការផលិតស្មាតហ្វូនបត់អេក្រង់ដំបូងប្រភេទ book-style (iPhone Fold) ក្រុមហ៊ុនបិតាបច្ចេកវិទ្យា Cupertino អាមេរិក Apple ត្រូវបានគេរាយការណ៍ថា ក៏កំពុងស្រាវជ្រាវផលិតស្មាតហ្វូនបត់បែប Clamshell ដើម្បីធ្វើការប្រកូតប្រជែងក្នុងទីផ្សារស្មាតហ្វូនបែបេះ ដូចជា Samsung Galaxy Z Flip Series និង Motorola Razr ជាដើម។
បើតាមលោក Mark Gurman មកពីស្ថាប័នសារព័ត៌មាន Bloomberg បានបង្ហើបឲ្យដឹងថា Apple បាននឹងកំពុងបំផុសគំនិតក្នុងដំណើរការស្រាវជ្រាវផលិត “Exploring” ស្មាតហ្វូនអេក្រង់បត់ “iPhone Foldable ប្រភេទ “Square, Clamshell-style”។ ស្មាតហ្វូនអេក្រង់បត់បែប Clamshell ឬ Flip ដំបូងពី Apple អាចនឹងប្រើឈ្មោះថា “iPhone Flip” ហើយវានឹងជាដៃគូប្រជែងទីផ្សារជាមួយនឹង Galaxy Z Flip 7 របស់ Samsung និង Razr របស់ Motorola។
ប្រភពដដែលបានបង្ហើបទៀតថា iPhone Flip ទំនងជានឹងបង្ហាញវត្តមានពេលណាមួយ បន្ទាប់ពីការបង្ហាញខ្លួនផ្លូវការណ៍ iPhone Fold ដែលត្រូវបានគេរំពឹងថា នឹងប្រកាសចេញផ្លូវការណ៍នៅក្នុងព្រឹត្តិការណ៍សម្ពោធ iPhone 18 Series នៅក្នុងខែកញ្ញា ឆ្នាំ 2026។ iPhone Fold នឹងមានការឌីស្សាញជាមួយស្ទាយបត់ឡើងបែប book-style ដូចគ្នានឹង Samsung Galaxy Z Fold 7។
iPhone Fold នឹងផ្តល់បទពិសោធន៍ប្រើប្រាស់ប្រព័ន្ធប្រតិបត្តិការ iOS និងការងារ multi-task នៅអេក្រង់បត់ទំហំធំដែលអាចដល់ 7.7-inch ឬធំជាងនេះ។ ចំនែក iPhone Flip នឹងផ្តល់នូវបទពិសោធន៍ប្រើប្រាស់ងាយស្រួលប្រើកាន់ដៃម្ខាង និងទុកដាក់ក្នុងហោបៅ។ លោក Gurman បានមានប្រសាសន៍ថា “Apple មានក្តីរំពឹងខ្ពស់ថា iPhone Foldable ដំបូងរបស់ខ្លួននឹងទទួលបានជោគជ័យគ្រប់គ្រាន់ដើម្បីបង្កើតតម្រូវការពិតប្រាកដសម្រាប់ទីផ្សារឧបករណ៍ចល័តប្រភេទនេះ ហើយអតិថិជននឹងចង់បានរូបរាងបែបថ្មី និងទំហំបន្ថែម ពីលើទូរស័ព្ធ iPhone ដែលពួកគេកំពុងមានក្នុងពេលបច្ចុប្បន្ន”។
យ៉ាងណាក៏ដោយ លោក Gurman បាននិយាយថា iPhone Clamshell ឬ Flip “អាចនឹងមានពេលវេលាយូរបន្ថែមទៀតក្នុងការមានវត្តមាននៅលើទីផ្សារ”។ សម្រាប់លក្ខណៈសម្បត្តិរបស់ iPhone Flip មិនត្រូវបានគេបង្ហាញចេញនៅឡើយទេក្នុងពេលនេះ៕
