បើយើងនិយាយពីការលក់ទៅលើកំពូលស្មាតហ្វូនជំនាន់ថ្មី Galaxy S Series របស់ក្រុមហ៊ុន Samsung ឃើញថា ជារៀងរាល់ឆ្នាំម៉ូដែល Ultra គឺតែងតែលក់ដាច់បានច្រើនជាងម៉ូដែលស្តង់ដារ និង Plus បូកបញ្ចូលគ្នាទៀទៀតផង បើទោះបីជាម៉ូដែលនេះ មានតម្លៃខ្ពស់ជាងគេក្នុងចំណោមទាំង 3 ក៏ដោយ។ ប៉ុន្តែប្រសិនបើប្រៀបធៀបជាមួយនិងស្មាតហ្វូនអេក្រង់វិញ គឺខុសគ្នាដាច់តែម្តង ដោយម៉ូដែល Z Flip តម្លៃធូថ្លៃ គឺលក់ដាច់ច្រើនជាង Z Fold ដែលជាម៉ូដែលមានតម្លៃខ្ពស់។
នៅពេលនេះ យោងតាមការទម្លាយចេញពី Ice Universe បានចេញនូវរបាយការណ៌របស់ខ្លួនថ្មីថា ឆ្នាំនេះ ក្រុមហ៊ុន Samsung មានគោលដៅផ្លាស់ប្តូរនូវប្រវត្តិសាស្រ្តនេះទៅលើស្មាតហ្វូនអេក្រង់បត់ ដោយក្នុងសំណេរបស់លោក គឺបានបង្ហើបថា ក្រុមហ៊ុននេះ គ្រោងនឹងធ្វើការផលិតទៅលើស្មាតហ្វូនអេក្រង់បត់ Galaxy Z Fold8 ចំនួន 3.5 លានគ្រឿង ខណៈដែល Galaxy Z Flip8 គឺនៅត្រឹមតែ 2.5 លានគ្រឿង ទៅ 3 លានគ្រឿងប៉ុណ្ណោះ។
ហើយតួរលេខខាងលើនេះ គឺមិនមានការរាប់បញ្ចូលនូវស្មាតហ្វូនអេក្រង់ម៉ូដែលថ្មី Galaxy Wide Fold ដែលក្រុមហ៊ុននេះ គ្រោងនឹងប្រកាសចេញឆាប់ៗនេះនោះទេ។ ប៉ុន្តែមានការបញ្ជាក់ថា ក្រុមហ៊ុនអាចនឹងផលិតម៉ូដែលថ្មីនេះ ចំនួន 1 លានគ្រឿង ខណៈដែលការផលិតទៅលើស្មាតហ្វូនអេក្រង់បត់ 3 តង់ Galaxy Z TriFold គឺមិនមានចំនួនច្រើនទេ ហើយក៏មិនបញ្ជាក់ថា ប៉ុន្មានគ្រឿងដូចគ្នា។
គួរបញ្ជាក់ថា កាលពីម្សិលមិញនេះ Ice Universe ក៏មានការទម្លាយនូវព័ត៌មានពីការផលិតទៅលើស្មាតហ្វូនជំនាន់ថ្មី Galaxy S26 Series របស់ក្រុមហ៊ុន Samsung ផងដែរ ដោយក្នុងនោះមានការបញ្ជាក់ថា S26 Ultra គឺចាប់ផ្តើមផលិតតាំងពីខែធ្នូមកម្លេះ ខណៈដែល S26 និង S26+ គឺទើបតែផលិតចេញនៅខែមករាថ្មីៗនេះនោះទេ។ Galaxy S26 series គឺនឹងមានការប្រកាសចេញនៅលើទីផ្សារនាខែនេះហើយបើមើលទៅលើស្មាតហ្វូនអេក្រង់បត់បានវិញ គឺអាចនឹងប្រកាសចេនៅខែកក្កដាខាងមុខ។
