លោក Eric Xu ប្រធានប្តូរវេនរបស់ Huawei បានបញ្ជាក់ថា ឈីបប្រើប្រាស់នៅលើរថយន្តរបស់ខ្លួន បានទទួលអជ្ញាប័ណ្ណពីសហរដ្ឋអាមេរិកខ្លះៗហើយ

នៅក្នុងវេទិកា Huawei Connect 2021 ដែលបានប្រារព្ធធ្វើឡើងកាលពីពេលថ្មីៗនេះ លោក Eric Xu ដែលជាប្រធានប្តូរវេនរបស់ក្រុមហ៊ុន Huawei បានបញ្ជាក់ថា មកដល់ពេលនេះ ក្រុមហ៊ុន Huawei នៅតែបន្តប្រឈមមុខនឹងបញ្ហាលំបាកពីការដាក់ទណ្ឌកម្មរបស់រដ្ឋាភិបាលសហរដ្ឋអាមេរិកដដែល។ ដោយលោកបានបន្តថា បើទោះបីជាមានរឿងរ៉ាវនេះ កើតឡើងមែន ក៏ Huawei មិនបានចុះចាញ់នោះទេ គឺក្រុមហ៊ុន នៅតែបន្តធ្វើការវិនិយោគទៅអជីវកម្មផ្សេងៗ ក៏ដូចជាការបញ្ចេញនូវផលិតផលថ្មីៗជាច្រើន ដើម្បីប្រជែងទៅនឹងការដាក់ទណ្ឌកម្មនេះ។

នៅពេលនេះ យើងទទួលបាននូវព័ត៌មានថ្មី ដ៏គួរអោយចាប់អារម្មណ៍មួយ ដោយលោក Eric Xu ដែលជាប្រធានប្តូរវេនរបស់ Huawei រូបនេះ ក៏បានលើកឡើងពីការអភិវឌ្ឍទៅលើការផលិតបន្ទះឈីបថ្មីសម្រាប់ដំណោះស្រាយទៅលើការប្រើប្រាស់នៅលើរថយន្ត ហើយលោកបានសង្កត់ធ្ងន់ថា មានបន្ទះឈីបខ្លះ គឺទទួលបានការផ្តល់អជ្ញាប័ណ្ណពីសហរដ្ឋអាមេរិកខ្លះៗហើយ។ បើតាមការបញ្ជាក់របស់លោក បាននិយាយថា បន្ទះឈីបនេះ នឹងក្លាយជាដំណោះស្រាយថ្មីមួយទៀតសម្រាប់ឧស្សាហកម្មយានយន្ត។ 

តាមការបញ្ជាក់របស់លោកនៅពេលនេះ គឺជាព័ត៌មានថ្មីមួយដ៏រំភើបសម្រាប់ក្រុមហ៊ុន Huawei នៅក្នុងការអភិវឌ្ឍទៅលើបន្ទះឈីបថ្មីសម្រាប់ដំណោះស្រាយទៅលើការប្រើប្រាស់នៅលើរថយន្ត ហើយគំនិតផ្តួចផ្តើមនៃការវិវិត្តថ្មីនេះ គឺនឹងនាំ Huawei ឆ្ពោះទៅមុខក្នុងវិស័យដំណោះស្រាយរថយន្តឆ្លាតក៏ដូចជាឧស្សាហកម្មរថយន្តឆ្លាតវៃ។