កាលពីខែឧសភាកន្លងទៅនេះ Xiaomi ដែលជាក្រុមហ៊ុនបច្ចេកវិទ្យាដ៏មួយរបស់ប្រទេសចិន បានប្រកាសថា ខ្លួននឹងចូលប្រឡូកនៅក្នុងវិស័យរថយន្តស្វ័យប្រវត្តិ។ ក្រុមហ៊ុនដែលកំពុងតែមានភាពជោគជ័យមួយនេះ ត្រូវបានគេដឹងថា គឺនឹងធ្វើការផលិតរថយន្តអគ្គិសនីនៅក្នុងរយៈពេល 3 ឆ្នាំខាងមុខនេះហើយ។ លោក Lei Jun ប្រធានក្រុមហ៊ុននេះ បាននិយាយថា ការផលិតទ្រង់ទ្រាយធំទៅលើរថយន្តនេះនឹងចាប់ផ្តើមនៅក្នុងឆមាសទី 1 នៅឆ្នាំ 2024 នេះ។
គិតមកត្រឹមពេលនេះ ក្រុមហ៊ុនស្មាតហ្វូនចិនមួយនេះ ក៏បានចុះបញ្ជីម៉ាកយីហោ Xiaomi Motors រួចរាល់ហើយសម្រាប់ដំណើរការនេះ ក៏បានបញ្ចប់កាលពីថ្ងៃទី 01 ខែកញ្ញាកន្លងមកទៅនេះផងដែរ។ រោងចក្រដំបូងបំផុតរបស់ក្រុមហ៊ុននេះ គឺស្ថិតនៅក្នុងតំបន់ Yizhuang នៃទីក្រុងប៉េកាំង។ ក្រុមការងារជំនាញនៅក្នុងការផលិតរថយន្តនេះ គឺមានចំនួន 450 នាក់។ ពួកគេគឺជាអ្នកជំនាញដែលត្រូវបានជ្រើសរើសនៅក្នុងចំនោមមនុស្ស 20,000 នាក់។
លោក Lei Jun បានបញ្ជាក់ថា រថយន្តអគ្គិសនីនេះ គឺជាការបោះជំហានថ្មីមួយទៀតនៅក្នុងប្រព័ន្ធអេកូឡូស៊ីដែលគ្រប់យ៉ាងផ្តល់នូវភាពងាយស្រួល និងការពង្រឹងទៅលើបទពិសោធន៍នៃការប្រើប្រាស់ដ៏អស្ចារ្យបំផុត។ គួររំលឹកផងដែរថា ការបង្ហាញវត្តមានរថយន្តអេឡិចត្រូនិចនេះ នឹងក្លាយជាគម្រោងពិភពលោកចុងក្រោយបំផុតនៅក្នុងការងាររបស់លោក Lei Jun។ បន្ទាប់ពីគម្រោងនេះបញ្ចប់នោះ គាត់អាចចាកចេញពីតំណែងជា CEO របស់ក្រុមហ៊ុន Xiaomi នេះបាន៕
