បន្ថែមពីលើអាជីវកម្មស្មាតហ្វូន កុំព្យូទ័រ ថេបប្លែត និងផលិតផលអេឡិចត្រូនិចប្រើប្រាស់ប្រចាំថ្ងៃជាច្រើនមុខស្ទើរតែរាប់មិនអស់ឯទៀតចេញពីស្លាកយីហោល្បីឈ្មោះរបស់ចិន Xiaomi ដោយពេលនេះស្លាកយីហោមួយនេះ ក៏បាននឹងកំពុងបោះជំហានឈានចូលប្រឡូកក្នុងឧស្សាហកម្មផលិតរថយន្តមួយបន្ថែមទៀតផងដែរ។ ដោយកាលពីដើមឆ្នាំនេះ Xiaomi បានប្រកាសពីការបោះទុនវិនិយោគនៅក្នុងវិស័យរថយន្តអគ្គិសនីក្នុងចំនួនទឹកប្រាក់ 1.5 ពាន់លាន និង 10 ពាន់លានដុល្លារអាមេរិកសម្រាប់រយះពេល 10 ឆ្នាំទៅមុខ។
ទន្ទឹមនឹងនេះ យើងឃើញថា មានប្រភពព័ត៌មានចចាមអារាមជាច្រើនបានទម្លាយចេញពីគំរូ និងគុណសម្បត្តិផ្សេងៗដែលនឹងមានបំពាក់នៅលើរថយន្តអគ្គិសនីដំបូងរបស់ Xiaomi ផងដែរ។ ថ្មីៗនេះបើតាមរបាយការណ៍ពី NotebookCheck បានឲ្យដឹងថា ក្រុមហ៊ុន Xiaomi បាននឹងកំពុងដំណើរការលើកិច្ចពិភាក្សាជាមួយសម័្ពន្ធក្រុមហ៊ុន Beijing Automotive Group Co (BAIC) ក្នុងកិច្ចដំណើរការជាសារធារណៈនៃគម្រោងការផលិតរថយន្តរបស់ខ្លួននៅក្នុងប្រទេសចិន។
ហើយកាលពីពេលថ្មីៗនេះ នាយកប្រតិបត្តិជាន់ខ្ពស់របស់ Xiaomi លោក Lei Jun បានធ្វើសន្ទស្សន៍អតិថិជនអំពីតម្លៃរថយន្តរបស់ក្រុមហ៊ុនខ្លួន ដែលជាលទ្ធផលមានការបោះឆ្នោតច្រើនក្នុងការជ្រើសរើសតម្លៃផ្តើមពី 3 ម៉ឺនដុល្លារឡើងទៅ ដែលជាតម្លៃសម្រាប់កម្រិតរថយន្តអគ្គិសនីបង្គួរ។ បើតាមប្រភពបែកធ្លាយចុងក្រោយនេះបាននិយាយថា រថយន្តអគ្គិសនីដំបូងចេញពីស្លាកយីហោ Xiaomi នឹងលេចរូបរាងឡើងលើទីផ្សារផ្លូវការណ៍នៅក្នុងឆ្នាំ 2024។ រថយន្តអគ្គិសនីក្រុមហ៊ុនស្មាតហ្វូនចិននេះ ត្រូវបានគេដឹងទៀតថា នឹងមានការឌីស្សាញប្រហាក់ប្រហែលគ្នានឹងរថយន្តអគ្គិសនីក្រុមហ៊ុន Tesla របស់អាមេរិកដែរ។
បើតាមរូបភាពបែកធ្លាយនាពេលកន្លងមកបានបង្ហាញថា Xiaomi EV គឺជារថយន្តអគ្គិសនីប្រភេទ Sedan ទ្វារបួន ហើយរថយន្តក្រុមហ៊ុននេះ គឺនឹងមានបំពាក់នូវប្រព័ន្ធបច្ចេកវិទ្យាបើកបរស្វ័យប្រវត្តិដែល Self-develop autonomous driving system ឬហៅថា “Xiaomi Pilot” ដោយមានជំនួយពីបច្ចេកវិទ្យាចាប់សញ្ញា LiDAR Sensor។ យើងរំពឹងទុកថា ការបង្ហាញវត្តមានរបស់រថយន្តអគ្គិសនី Xiaomi អាចនឹងផ្តល់ជូននៅរថយន្តដែលភាពច្នៃប្រឌិតខ្ពស់ប្រកបដោយភាពទំនើប ព្រមជាមួយតម្លៃដ៏សមរម្យសម្រាប់អតិថិជន ដូចអ្វីដែល Xiaomi ធ្លាប់បានផ្តល់ជូនតម្លៃនៅលើស្មាតហ្វូនរបស់ក្រុមហ៊ុនខ្លួនអីចឹងដែរ៕