ក្រុមហ៊ុន Geely នឹងនាំយកនូវរថយន្តជំនាន់ថ្មីនៃត្រកូល Zeekr ទៅកាន់ទីផ្សារប្រទេសមិកស៊ិកូ

កាលពីថ្ងៃទី 7 ខែកុម្ភៈកន្លងទៅនេះ ក្រុមហ៊ុន Geely បានធ្វើការជាមួយនិងក្រុមហ៊ុនរថយន្ត Zeekr ដែលជាបុត្រសម្ព័ន្ធរបស់ខ្លួនហើយ តាមរយៈនៃការចុះកិច្ចព្រមព្រៀងនៅលើទីផ្សារភាគហ៊ុននៅហុងកុង ដើម្បីនាំយកនូវរថយន្តជំនាន់ថ្មីនៃត្រកូល Zeekr ទៅកាន់ទីផ្សារប្រទេសមិកស៊ិកូ។ នៅក្នុងភាពជាដៃគូរនេះ ក្រុមហ៊ុន Geely មានសិទ្ធិជាច្រើនទៅលើពាណិជ្ជកម្មមួយនេះ ដែលនៅក្នុងនោះរួមមានដូចជា ការលក់រថយន្តគ្រប់ម៉ូដែល ការផ្តល់សេវាកម្មបន្ទាប់ពីការលក់ ហើយនិងការលក់នៅ Spart-Parts ក៏ដូចជា Accessories ដែលប្រើប្រាស់ជាមួយរថយន្តថ្មីជាដើមសម្រាប់ទីផ្សារប្រទេសនេះ។ 

ការចាប់ដៃគ្នានេះ បានបង្ហាញពីការបោះជំហ៊ានថ្មីមួយទៀតសម្រាប់ក្រុមហ៊ុន Geely នៅក្នុងការចូលខ្លួនទៅកាន់ទីផ្សារសកល នៃការនាំចេញនូវរថយន្តអគ្គិសនី Electric vehicle (EV)។ ហើយការនាំរថយន្តថ្មីនេះទៅកាន់ទីផ្សារមិកស៊ីកូ នៅពេលនេះ ក៏ជាយុទ្ធសាស្រ្តថ្មីរបស់ក្រុមហ៊ុននៅក្នុងការចាក់បញ្ចូលនូវរថយន្តអគ្គិសនីរបស់ចិនទៅកាន់ទីផ្សារនៃតំបន់អាមេរិកឡាទីនផងដែរ។ សូមជំរាបថា រដ្ឋាភិបាលរបស់ប្រទេសមិកស៊ិកូ គឺបានប្រកាសត្រៀមខ្លួនរួចជាស្រេចហើយ នៅក្នុងការបង្កើននូវចំនួនរថយន្តប្រភេទ Hybrid និងអគ្គីសនី នៅក្នុងប្រទេសរបស់ខ្លួន អោយបាន 50% នៅត្រឹមឆ្នាំ 2040 ខាងមុខនេះផងដែរ។

ការសម្រេចិត្តរបស់ក្រុមហ៊ុន Geely នៅក្នុងការនាំយកនូវរថយន្ត Zeekr ទៅកាន់ទីផ្សារមិកស៊ិកូនៅពេលនេះ គឺបង្ហាញពីការផ្លាស់ថ្មីមួយទៀតសម្រាប់ក្រុមហ៊ុននេះ នៅក្នុងការបង្កើតនូវយុទ្ធសាស្រ្តថ្មី ដើម្បីសម្រេចគោលដៅនៃអាជិវកម្មរបស់ខ្លួន។ ជាពិសេសនោះ គឺការចូលប្រឡូកក្នុងការប្រកួតប្រជែងសម្រាប់ទីផ្សារអាមេរិកឡាទីននេះតែម្តង។

គួរបញ្ជាក់ផងដែរថា Zeekr គឺម៉ាកសញ្ញារថយន្តដែលស្ថិតនៅក្រោមដំបូលនៃក្រុមហ៊ុន Geely ដែលមានការរីកចំរើនលឿនបំផុតទាំងការឌីស្សាញរូបរាង និងការនាំមកនូវបច្ចេកវិទ្យាថ្មីៗសម្រាប់អ្នកប្រើប្រាស់។ កាលពីខែមករាកន្លងទៅនេះ Zeekr ត្រូបានគេរាយការណ៌ថា បាននាំចេញនូវថរយន្តរបស់ខ្លួនបានចំនួនដល់ទៅ 12,537 គ្រឿង កើនឡើងចំនូន 302%។ យោងតាមប្រសាសន៌របស់លោល Lin Jinwen បានអោយដឹងថា បើទោះបីជាពេលនេះ មានការប្រកួតប្រជែងតម្លៃនៅលើទីផ្សារក៏ដោយ ក្រុមហ៊ុន Zeekr គឺមិនស្ថិតក្នុងចំណោមក្រុមហ៊ុនទាំងនោះទេ។ ក្រុមហ៊ុនមានគោលដៅនៅក្នុងការលក់អោយបាន 230,000 គ្រឿងនៅក្នុងឆ្នាំនេះ ស្របពេលជាមួយគ្នានេះ រថយន្តម៉ូដែល 007 គឺមានការកក់ទុកមុន 25,000 គ្រឿងហើយ ត្រឹមខែមករាកន្លងទៅនេះ។