ដើម្បីធ្វើការប្រកូតប្រជែងក្នុងទីផ្សាររថយន្តអគ្គិសនីដែលកំពុងមានសន្ទុះខ្លាំងនាពេលបច្ចុប្បន្ន ក្រុមហ៊ុនផលិតរថយន្តប្រណិតម៉ាក Porsche បានធ្វើការប្រកាសចេញរថយន្តអគ្គិសនីស៊េរីថ្មីចុងក្រោយរបស់ខ្លួនម៉ូដេល Porsche Taycan ស៊េរីឆ្នាំ 2025។ រថយន្តអគ្គីសនីស៊េរីថ្មីរបស់ក្រុមហ៊ុនផលិតរថយន្តប្រណិតរបស់ប្រទេសអាល្លឺម៉ងមួយនេះបានបំពាក់នូវប្រព័ន្ធបច្ចេកវិទ្យាថ្មីទំនើបៗចុងក្រោយ ជាមួយបច្ចេកវិទ្យាសាកភ្លើងល្បឿនលឿន និងមានអនុភាពថាមពលខ្លាំង ជាមួយនឹងរយះចំងាយក្នុងការបើកបរបានឆ្ងាយជាដើម។
ការបង្ហាញវត្តមានរបស់ 2025 Porsche Taycan គឺជាការសម្របខ្លួនរបស់ Porsche ក្នុងការចូលរួមប្រកូតប្រជែង និងបំពេញតម្រូវការទីផ្សាររថយន្តអគ្គិសនីដែលកំពុងតែកើនកំដៅខ្លាំងនាពេលបច្ចុប្បន្ន និងទៅថ្ងៃអនាគត។ 2025 Porsche Taycan មានជ្រើសពីរប្រភេទទាំងប្រភេទ sports sedan និង Cross Turismo wagon body ជាមួយជម្រើសកំលាំងថាមពលចំនួន 4 គឺជម្រើស rear-wheel drive និង all-wheel-drive ដែលមានតម្លៃចាប់ខ្ទង់ $101,395 សម្រាប់ម៉ូដែលធម្មតា Entry-level sedan និងខ្ទង់ $213,695 សម្រាប់ម៉ូដែលកំពូល Cross Turismo model។ រថយន្តអគ្គិសនីស៊េរីថ្មីរបស់ Porsche បានបំពាក់នូវកញ្ចប់អាគុយថ្មី Performance Battery Plus ទំហំ 105kWh ដែលផ្តល់នៅអនុភាពក្នុងការបើកបរ និងបើកបរបានរយះចំងាយឆ្ងាយជាងមុន។
2025 Porsche Taycan បំពាក់នូវបច្ចេកវិទ្យាសាកភ្លើងល្បឿនលឿនដែលមានសមត្ថភាពសាកភ្លើងពី 0 ទៅ 80% ចំនាយពេលត្រឹម 18 នាទីប៉ុណ្ណោះ សម្រាប់ការសាកនៅស្ថានីយ៍សាកភ្លើងដែលមានកំលាំង 800-volt DC Charging Station។ ក្រុមហ៊ុន Porsche បានធ្វើការកែលម្អថ្មីទៅលើប្រព័ន្ធ rear axle motor និងប្រព័ន្ធបំលែង Modifier pulse inverter ដែលជំនួយដល់ថាមពលរបស់អាគុយអគ្គិសនីផ្តល់នូវថាមពលខ្លាំងជាងមុន និងការគ្រប់គ្រង់កំដៅបានល្អប្រសើរជាងមុន រួមនិងការកែលម្អបានកាន់ប្រសើរទៅលើប្រព័ន្ធ recuperation system ដែលផ្តល់បទពិសោធន៍កាន់មានប្រសិទ្ធិភាព សុវត្ថិភាព ផាសុខភាព និងថាមពលក្នុងការបើកបរបានចំងាយឆ្ងាយជាងមុន។
សម្រាប់ការជាន់សន្ទុះល្បឿនរបស់ 2025 Porsche Taycan វិញ គឺអាចធ្វើបានពី 0 ទៅ 60mph ចំនាយពេលប្រមាណ 2.3 វិនាទីប៉ុណ្ណោះ ដែលជាល្បឿនលឿនជាងម៉ូដែល Porsche 911 Turbo S ទៅទៀត ដែលធ្វើឲ្យ Taycan 2025 ក្លាយជារថយន្តអគ្គិសនីដែលមានអនុភាពល្បឿនខ្លាំងបំផុតដែល Porsche មិនធ្លាប់ផ្តល់ជូនពីមុនមក។ ចំពោះការរចនារបស់ 2025 Porsche Taycan ក៏ជារចនាបថថ្មីជាមួយការបំពាក់ចង្គៀងខាងមុខ និងខាងក្រោយថ្មី ការរចនាផ្នែកប៉ាណាខាងមុខថ្មីទាក់ទាញ រួមទាំងការបំពាក់នូវស្បែកគុណភាពខ្ពស់នៅផ្នែកខាងក្នុងរួមទាំងកៅអី ក៏ដូចជាការបំពាក់នូវប្រព័ន្ធ Digital ដ៏សម្បូរបែប ព្រមជាមួយមុខងារ Apple CarPlay និងមុខងារ Video Stream ថ្មីជាដើម៕
