TOYOTA បានប្រកាសចេញលក់ជាផ្លូវការណ៍រថយន្ត Camry ស៊េរីឆ្នាំ 2025 ជាមួយតម្លៃចាប់ពី $28,400

ថ្មីៗនេះក្រុមហ៊ុន TOYOTA បានប្រកាសចេញលក់រថយន្ត Camry ស៊េរីថ្មីឆ្នាំ 2025 ជាផ្លូវការណ៍នៅទីផ្សារជាមួយតម្លៃខ្ទង់ចាប់ពី $28,400 ឡើងទៅនៅទីផ្សារសហរដ្ឋអាមេរិក។ រថយន្តប្រភេទ Sedan ដ៏ពេញនិយម និងលក់ដាច់ខ្លាំងបំផុតរបស់ TOYOTA មួយនេះ មានជម្រើសបួនម៉ូដែលដូចជា LE, XLE, SE និង XSE ហើយនិងមានតែជម្រើសប្រើម៉ាស៊ីន Hybrid តែប៉ុណ្ណោះ។

 

រូបភាពពាណិជ្ជកម្ម
no-alternative title

TOYOTA Camry 2025 បំពាក់នូវម៉ាស៊ីន Hybrid ចំនុះ 2.5L មាន 4-ស៊ីឡាំង អាចផលិតកំលាំងបាន 184 សេះ និងកំលាំងរមូល 163-pound-feet រួមជាមួយការប្រើប្រាស់នូវប្រព័ន្ធម៉ូទ័រអគ្គិសនីចំនួនពីរដែលអាចផលិតកំលាំងបាន 225 សេះសម្រាប់ម៉ូដែលប្រើប៉ុងមួយ។ ចំនែកម៉ូដែលប្រើប៉ុងពីរ (AWD) បានបំពាក់បន្ថែមនូវម៉ូទ័រអគ្គិសនីចំនួនបីដែលអាចផលិតកំលាំងបានដល់ 232 សេះ។ រថយន្ត Sedan ដ៏ពេញនិយមស៊េរីថ្មីរបស់ជប៉ុនមួយនេះប្រើប្រាស់កញ្ចប់អាគុយប្រភេទ Lithium-ion ទំហំ 0.6kWh ដែលបំពាក់នៅខាងក្រោយកៅអីជួរខាងក្រោយ ដែលជួយអោយរថយន្ត TOYOTA Camry 2025 នេះស៊ីសាំងកាន់តែតិចបំផុតត្រឹម 4.5 លីត្រប៉ុណ្ណោះ ក្នុងចំងាយ 100 គីឡូម៉ែត្រ។ រថយន្ត Camry ស៊េរីថ្មីឆ្នាំ 2025 របស់ TOYOTA នេះ ប្រើប្រាស់ប្រអប់លេខអូតូប្រភេទ eCVT ដែលចូលលេខបានលឿនជាងមុន។

ចូលមកការឌីស្សាញវិញ រថយន្ត TOYOTA Camry 2025 ត្រូវបានក្រុមហ៊ុនធ្វើការផ្លាស់ប្តូររចនាថ្មីទាំងស្រុងពីជំនាន់មុន ដោយការឌីស្សាញរបស់វាត្រូវបានយកលំនាំតាមម៉ូដែល TOYOTA Pruis ស៊េរីថ្មីចុងក្រោយ។ ដោយក្នុងនោះនៅផ្នែកខាងមុខត្រូវបានរចនាឡើងជាមួយអំពូល Daytimes running light ជាប្រភេទ LED មានរាងជាអក្សរ C ជាមួយអំពូលចង្កៀងបំភ្លឺពេលយប់ជាប្រភេទ LED ផងដែរ ដែលដំណើរការស្វ័យប្រវត្តិថែមទៀតផង។

ចំនែកផ្ទាំងប៉ាណាមុខវិញ ត្រូវបានរចនាឡើងជាមួយទំហំធំដែលមើលទៅកាន់តែមានភាពទាក់ទាញ និងកាចខ្លាំងជាងមុន។ ងាកមកផ្នែកនៅខាងក្រោយវិញ ត្រូវបានរចនាឡើងបែបស្ព័រយ៉ាងទាក់ទាញ រំលេចជាមួយស្តុបបំភ្លឺខាងក្រោយជាប្រភេទ LED ភ្លឺច្បាស់រចនាជារាងអក្សរ C។ នៅផ្នែកចំហៀង គឺរក្សាការឌីស្សាញដៃទ្វារទាំងបួនដូចគ្នានឹងជំនាន់មុនៗដដែល។ TOYOTA Camry 2025  មានជម្រើសយ៉ាន់កង់ទំហំចាប់ពី 18-inch ដល់ 19-inch។

និយាយពីផ្នែកខាងក្នុង TOYOTA Camry 2025 គឺត្រូវបានរៀបចំរចនាឡើងថ្មីកាន់តែមានភាពប្រណិត និងទំនើប ដោយក្នុងនោះមានដូចជាការបំពាក់នូវកុងទ័រប្រភេទឌីជីថលទំហំធំដល់ 12.3-inch, អេក្រង់កម្សាន្តនៅកណ្តាលទំហំ 12.3-inch ជាប្រភេទ Touch Screen អាចភ្ជាប់ជាមួយមុខងារ Apple CarPlay និង Android Auto, ប្រើប្រាស់ប្រព័ន្ធសោរ Smart key, ប្រព័ន្ធម៉ាស៊ីនត្រជាក់មុខក្រោយ (2-zone air-conditioners), កន្លែងសាកថ្មទូរស័ព្ទឥតខ្សែ (Wireless Charging Pad), កៅអីស្បែកមានមុខងារកំដៅ, កញ្ចក់ទប់សំឡេងរំខានពីខាងក្រៅ និងប្រព័ន្ធភ្លើង Ambient Light នៅតាមកាប៊ីនជាដើម។

បើនិយាយពីប្រព័ន្ធសុវត្ថិភាពក្នុងការបើកបរវិញ TOYOTA Camry 2025 បានបំពាក់នូវប្រព័ន្ធបច្ចេកវិទ្យា TOYOTA Safety Sense 3.0 ដែលក្នុងនោះរួមបញ្ចូលនូវមុខងារពិសេសៗដូចជា ប្រព័ន្ធផ្តល់សញ្ញាគ្រោះថ្នាក់ និងចាប់ហ្រ្វាំងបញ្ឈប់ឡានស្វ័យប្រវត្តិ (Pre-Collision System), ប្រព័ន្ធកំនត់ល្បឿន និងបន្ថយល្បឿនតាមរថយន្តខាងមុខស្វ័យប្រវត្តិ (Full-Speed range dynamic radar cruise control),  ប្រព័ន្ធជំនួយការបើកបរនៅលើដៃចង្កូត និងរំលឹកអ្នកបើកបរឲ្យស្ថិតនៅលើគន្លងត្រឹមត្រូវ ( Lane Departure Alert with Steering Assist), ប្រព័ន្ធរក្សាឡានឲ្យស្ថិតនៅចំកណ្តាលគន្លងផ្លូវ (Lane Tracing Assist), ប្រព័ន្ធជំនួយការចូលចត់ និងចាប់ហ្វ្រាំងស្វ័យប្រវត្តិ ( Parking assist with automatic braking) ជាដើម។ ចំនែកនៅលើម៉ូដែល XLE និង XSE មានបំពាក់នូវប្រព័ន្ធបង្ហាញនៅលើកញ្ចក់ខាងមុខ (Head-up-Display) ទំហំ 10-inch ផងដែរ៕

 

ព័ត៌មានពាណិជ្ជកម្ម
អត្ថបទគួរចាប់អារម្មណ៍