ក្រុមហ៊ុនផលិតរថយន្តខ្នាតយក្សរបស់ប្រទេសកូរ៉េខាងត្បូង Kia ទើបតែបានប្រកាសចេញរថយន្តអគ្គិសនីដែលជា Compact SUV ស៊េរីថ្មីម៉ូដែល Kia EV3 ដែលជាសមាជិកថ្មីនៅក្នុងស្រឡាយរថយន្តអគ្គិសនីសុទ្ធរបស់ខ្លួន ហើយរថយន្តនេះនឹងត្រូវដាក់លក់នៅទីផ្សារសកលដូចជា ទីផ្សារអឺរ៉ុប និងសហរដ្ឋអាមេរិក។
Kia EV3 ត្រូវបានរចនាឡើងជាមួយភាពប្រណិតទំនើបទាន់សម័យជាមួយផ្នែកខាងក្រៅរចនាជា 3D Desing ជាមួយចង្កៀងខាងមុខសងខាងរាងស្លីមរចនាជារាងអក្សរ V ជាមួយផ្ទាំងប៉ាណាមុខពណ៌ខ្មៅនៅខាងក្រោមជិតផ្ទាំង Bumper និងដៃទ្វាររចនាលឹបចូលក្នុង (Hidden Door Handles)។ Compact-SUV ស៊េរីថ្មីនេះមានប្រវែងបណ្តោយខ្លួន 4,3m X ទទឹង 1,85m X កម្ពស់ 1,56m និងចន្លោះរវាងកង់មុខទៅកង់ក្រោយប្រវែង 2,68m។
នៅផ្នែកខាងក្នុងត្រូវបានរៀបចំតុបតែងជាមួយនឹងប្រណិតនិយម ដោយមានបំពាក់នូវដៃចង្កូតរចនារាងជាងអក្សរ D បំពាក់នូវប៊ូតុងសម្រាប់ចុងបញ្ជាមុខងារជាងច្រើននៅលើដៃចង្កូត, នៅខាងក្រោយដៃចង្កូតមានអេក្រង់ LCD Panel Instrument ទំហំ 12.3-inch រចនាភ្ជាប់គ្នាជាមួយអេក្រង់កម្សាន្តទំហំ 12.3-inch ដែលនៅចន្លោះអេក្រង់ទាំងពីរមាននូវអេក្រង់ទំហំ 5-inch មួយទៀតសម្រាប់ប្រើក្នុងការបញ្ជាមុខងារម៉ាស៊ីនត្រជាក់។
រថយន្តអគ្គិសនីស៊េរីថ្មីរបស់ Kia មួយនេះអាចជិះគ្នាបាន 5 នាក់ និងផ្នែកខាងក្រោយអាចផ្ទុកទំងន់បាន 460 លីត្រ។ Kia EV3 រចនាឡើងដោយឈរនៅលើទម្រង់ E-GMP Platform ជាមួយការប្រើប្រាស់ប្រព័ន្ធសាកភ្លើងកម្រិត 400-volt architecture។ រថយន្តនេះ ដំណើរការដោយប្រព័ន្ធម៉ូទ័រអគ្គិសនីមួយ និងមានជម្រើសទំហំកញ្ចប់អាគុយអគ្គិសនីពីរទំហំផ្សេងគ្នា។ ដោយម៉ូដែលស្តង់ដាបានបំពាក់មនូវកញ្ចប់អាគុយទំហំ 58.3kWh ខណៈម៉ូដែល Long range បានបំពាក់នូវកញ្ចប់អាគុយទំហំដល់ 81.4kWh ដោយម៉ូដែលនេះ អាចបើកបានចំងាយផ្លុវដល់ 600km នៅពេលសាកភ្លើងមួយពេញម្តង។ សម្រាប់ល្បឿនសាកភ្លើង គឺសាកចូលពី 10% ទៅ 80% ប្រើពេលខ្ទង់ប្រហែល 31 នាទីជាមួយកំលាំងសាក 128kW Charging rate។
ចំពោះប្រព័ន្ធម៉ូទ័រមួយដែលបំពាក់នៅលើ Kia EV3 គឺអាចផលិតកំលាំងបាន 201 សេះ និងកំលាំងរមូល 283Nm។ Compact-SUV នេះ អាចជាន់ស្ទុះល្បឿនពី 0 ទៅ 100km/h ប្រើពេលប្រមាណ 7.5 វិនាទី និងអាចជាន់ល្បឿន Top-Speed ដល់ 170km/h។ ក្រៅតែពីម៉ូដែល Based និង Long range Variant ទៅ Kia EV3 ក៏មានម៉ូដែលកំពូលមួយទៀតផងដែរ គឺ Kia EV3 GT ដែលនឹងបង្ហាញវត្តមាននៅពេលបន្ទាប់ ដោយម៉ូដែលនេះ អាចនឹងមានសមត្ថភាពខ្លាំងជាងទាំងពីរម៉ូដែលទៀត។ Kia EV3 នឹងប្រកាសចេញនៅក្នុងប្រទេសកូរ៉េខាងត្បូងនៅក្នុងខែកក្តដាខាងមុខនេះ ហើយនិងនាំចេញទៅកាន់ទៅផ្សារអឺរ៉ុប និងសហរដ្ឋអាមេរិកនៅឆមាសទីពីរឆ្នាំ 2024។
ជាមួយគ្នានេះ Kia ក៏នឹងនាំយក EV3 ចូលទៅកាន់ទីផ្សារអាមេរិកខាងជើងនៅចុងឆ្នាំ 2025 ឬ ដើមឆ្នាំ 2026 ផងដែរ ដោយនឹងមានតម្លៃចេញលក់ចាប់ពីខ្ទង់ $30,000 ទៅ $35,000។ ក្រុមហ៊ុន Kia ក៏មានគម្រោងក្នុងការប្រកាសចេញរថយន្តស៊េរីថ្មីប្រភេទ Sedan ម៉ូដែល EV4 និងរថយន្ត Crossover ម៉ូដែល EV2 នៅទីផ្សារអឺរ៉ុបផងដែរ៕
