BYD បង្ហាញនូវបច្ចេកវិទ្យា DM Hybrid ជំនាន់ទី 5 នៅលើរថយន្តស៊េរីថ្មី BYD Qin L DM-i និង BYD Seal 06 DM-i

ថ្មីៗនេះ ក្រុមហ៊ុន BYD បានបង្ហាញនូវបច្ចេកវិទ្យា DM (dual mode) hybrid ជំនាន់ទី 5 របស់ខ្លួន ដើម្បីបន្ថែមនូវស្តង់ដារថ្មីមួយទៀតសម្រាប់ទីផ្សាររថយន្ត plug-in hybrid electric vehicle (PHEV)។ ការប្រកាសចេញនូវបច្ចេកវិទ្យានេះ គឺបានធ្វើឡើងនៅតំបន់ស៊ីអានខេត្តសានស៊ីប្រទេសចិន។ នៅក្នុងនោះ ក៏មានការបង្ហាញអំពីភាពជឿនលឿននៅក្នុងប្រសិទ្ធិភាពនៃការប្រើប្រាស់ប្រេង និងការបើកបរផងដែរ។ បច្ចេកវិទ្យាថ្មីនេះ មានប្រសិទ្ធិភាពនៃការបំភាយកំដៅដល់ទៅ 46.06% និងកម្រិតនៃការស៊ីប្រេងត្រឹមតែ 2.9L/100Km នៅពេលដែលអស់ថាមពលថ្ម។ សម្រាប់ការបញ្ចូលថាមពលថ្មពេញ រថយន្តនេះអាចធ្វើដំណើរបានដល់ទៅ 2100Km។ បច្ចេកវិទ្យានេះ គឺមានភាពអស្ចារ្យខ្លាំង បើប្រៀបធៀបជាមួយនឹងម៉ូដែលមុនដែលប្រើប្រាស់នូវប្រេងចំនួន 3.L/100Km។

ក្រុមហ៊ុន BYD ក៏ដាក់បញ្ចូលនូវបច្ចេកវិទ្យាកម្រិតខ្ពស់ទៅលើរថយន្តថ្មីចំនួន 2 ម៉ូដែលផងដែរ។ រថយន្តទាំងពីរនេះ មានម៉ូដែល Qin L DM-i និង Seal 06 DM-i។ រថយន្តថ្មីនេះ គឺមានតម្លៃចន្លោះពី 99,800 យ៉ន់ ($13,775) និង 139,800 យ៉ន់។ ក្រុមហ៊ុននេះ បានបញ្ជាក់បន្ថែមថា ការសន្សំសំចៃប្រេងទៅលើរថយន្តនេះ គឹបានដល់ទៅ 9,682 យ៉ន់នៅក្នុងមួយឆ្នាំបើធៀបជាមួយនឹងរថយន្តដែលប្រើប្រាស់នូវប្រេងសាំង។ សម្រាប់យុទ្ធសាស្រ្តនៃការផ្តោតទៅលើតម្លៃ និងការពង្រឹងទៅលើប្រសិទ្ធិភាពនៃការប្រើប្រាស់ប្រេងរបស់រថយន្តថ្មីនៃក្រុមហ៊ុន BYD នេះ គឺបានធ្វើអោយក្រុមហ៊ុននេះ មានភាពខ្លាំងក្លាអាចប្រកួតជាមួយនឹងក្រុមហ៊ុនធំៗជាពិសេសរថយន្ត Volkswagen Sagitar  និង Corolla ដែលមានតម្លៃ 127,900 យ៉ន់និង 116,800 យ៉ន់។

 រថយន្ត Qin L និង Seal 06 DM-i មិនត្រឹមតែមានតម្លៃទាបក្នុងការប្រើប្រាស់នោះទេ ប៉ុន្តែវាក៏អាចស៊ីប្រេងបានយ៉ាងល្អមានប្រសិទ្ធិភាពខ្ពស់ថែមទៀតផងដែលធ្វើអោយរថយន្តនេះក្លាយជាជម្រើសដ៏ទាក់ទាញសម្រាប់អ្នកប្រើប្រាស់។ សម្រាប់រយៈពេល 4 ខែដំបូងក្នុងឆ្នាំ 2024 នេះ ទីផ្សាររថយន្តអគ្គិសនី NEV (New Energy Vehicle) នៅក្នុងប្រទេសចិនមានការកើនឡើងជាមួយនឹងការផលិតរថយន្តដល់ទៅ 2.985 លានគ្រឿង ហើយរថយន្តចំនួន 2.94 លានគ្រឿង ត្រូវបានលក់ដែលមានការបង្កើនទីផ្សារពី 30.3% ទៅ 32.3% បើធៀបទៅនឹងឆ្នាំមុននេះ។ 

នៅក្នុងឆ្នាំ 2023 កន្លងទៅនេះ ក្រុមហ៊ុន BYD លក់រថយន្តប្រើប្រាស់នូវថាមពលថ្មបានជិត 3 លានគ្រឿង នៅក្នុងប្រទេសចិន ហើយប្រាក់ចំណេញរបស់ក្រុមហ៊ុនគឺមានចំនួនដល់ទៅ 81% រហូតដល់ទៅ 30.04  ពាន់លានយ៉ន់។ ក្រុមហ៊ុននេះ ក៏មានគោលដៅនៃការលក់ដល់ទៅ 3.6 លានគ្រឿងសម្រាប់ឆ្នាំ 2024 ដែលមានការកើនឡើង 20% បើធៀបទៅនឹងឆ្នាំមុននេះ៕