ក្រុមហ៊ុនផលិតរថយន្តអគ្គិសនីរបស់ប្រទេសចិន Geely ទើបតែបានប្រកាសចេញរថយន្តអគ្គិសនីប្រភេទ Sedan ស៊េរីថ្មី ម៉ូដែល Geely Galaxy E8 EV។ រថយន្តអគ្គិសនីស៊េរីថ្មីនេះ ក្រុមហ៊ុននឹងបើកដាក់ឲ្យធ្វើការបញ្ជាទិញមុនបាននៅថ្ងៃទី 17 ខែវិច្ឆិកានេះ សម្រាប់ទីផ្សារប្រទេសចិន។
Geely Galaxy E8 ស៊េរីថ្មីនេះត្រូវបានក្រុមហ៊ុនធ្វើការឌីស្សាញឡើងដោយឈរនៅលើស្ថាបត្យកម្ម Sustainable Experience Architecture (SEA) platform របស់ក្រុមហ៊ុនផ្ទាល់ ដោយមានរូបរាងបែបទំនើបប្រណិតទាន់សម័យទាក់ភ្នែកមែនទែន។ រថយន្ត Electric Sedan ស៊េរីថ្មីនេះមានបណ្តោប្រវែង 5,010mm, ទទឹង 1,920mm និងកម្ពស់ 1,465mm ហើយនិងមានគម្លាតចន្លោះកង់មុខទៅក្រោយប្រវែង 2,923 mm។ ដោយការឌីស្សាញរូបរាងរបស់ Geely Galaxy E8 មានលក្ខណៈប៊ឺតស្លីមជាងម៉ូដែល Mercedes Benz EQS និង Nio ET7 ប៉ុន្តែមានភាពប្រហាក់ប្រហែលគ្នានឹង Volkswagen XL1។
ផ្នែកខាងមុខរបស់ Geely Galaxy E8 Ev Sedan នេះមានរចនាបថបែបបឺតលំហូរខ្យល់ aerodynamics ដើម្បីជួយកាត់បន្ថយកំលាំងកកិតពីខ្យល និងរក្សាលំនឹងបានល្អក្នុងការបើកបរ។ នៅលើក្បាលរថយន្តមានការឌីស្សាញជាមួយអំពូលចង្គៀងបំភ្លឺប្រភេទ LED ស្លីមប្រណិត រួមជាមួយអំពូល Day time running រចនារាងអក្សរ C បែកចូលក្នុង។ ហើយសំណាញ់ប៉ាណាខាងមុខក៏មានរំពលេចជាមួយអំពូលភ្លឺ LED តូចៗផងដែរ។ សម្រាប់ទ្វារខាងមុខមិនមានបំពាក់កាមេរ៉ាសម្រាប់មើលសកម្មភាពអំឡុងពេលបើកបរនោះទេ ដោយជំនួសមកវិញនូវកញ្ចក់សម្រាប់មើលក្រោយវិញ។ ចំនែកផ្នែកខាងក្រោយរំលេងជាមួយអំពូលភ្លើង LED ពណ៌ក្រហមច្បាស់ៗដែលមានការរចនាយ៉ាងប្រណិតទាក់ទាញ។
ចូលទៅផ្នែកខាងក្នុង Geely Galaxy E8 គឺមានបំពាក់នូវអេក្រង់ទំហំធំដល់ទៅ 48-inch ដែលលលាតសន្ធឹងស្ទើរតែពេញតាបឡូខាងមុខជាមួយកម្រិតបង្ហាញដល់ 8K ឯណោះ ព្រមទាំងមានប៊ូតុងចម្បងសម្រាប់បញ្ជាមុខផ្សេងចំនួន 6 ផងដែរ រួមនឹងមានកងបង្វិកមួយ និងកន្លែងសាកស្មាតហ្វូនឥតខ្សែ wireless Charging Pad ក៏ដូចជាប្រអប់សម្រាប់ទុកដាក់ឥវ៉ាន់ផ្សេងៗមមួយចំនួនទៀត។ Geely Galaxy E8 មានជម្រើសកំលាំងសាកភ្លើង 400-Volt ចំនួនពីរ និងចែកចេញជាបីជម្រើសផ្សេងគ្នា ដោយក្នុងនោះមានជម្រើសប្រើម៉ូទ័រអគ្គិសនីចំនួនមួយមានកំលាំង 272hp ជាមួយកញ្ចប់អាគុយអគ្គិសនី LFP ទំហំ 62kW អាចបើកបរបានចំងាយផ្លូវ 550km នៅពេលសាកថ្មមួយពេញម្តង។
សម្រាប់ជម្រើសទីពីរ គឺប្រើម៉ូទ័រអគ្គិសនីមួយកំលាំង 272hp ដូចគ្នា ប៉ុន្តែ បំពាក់កញ្ចប់អាគុយ LFP ធំជាង គឺដល់ 76kW និងជម្រើសចុងក្រោយប្រើប្រាស់ម៉ូទ័រអគ្គិសនីចំនួនពីរដោយម៉ូទ័រខាងក្រោយអាចផលិតកំលាំងបាន 421hp និងខាងក្រោយអាចផលិតបាន 224hp ជាមួយកញ្ចប់អាគុយអគ្គិសនីទំហំ 76kW ហើយទាំងពីរជម្រើសចុងក្រោយនេះមានលទ្ធភាពអាចបើកបរបានចំងាយផ្លូវ 665 គីឡូម៉ែត្រដូចគ្នា នៅពេលសាកថ្មមួយពេញម្តង។ ទោះជាយ៉ាងណាសម្រាប់ជម្រើសនីមួយរបស់ Galaxy E8 Ev Sedan មិនទាន់ត្រូវបានក្រុមហ៊ុនប្រកាសប្រាប់ឲ្យដឹងនៅឡើយទេ៕
