ថ្មីៗនេះម្ចាស់រថយន្តអគ្គិសនី Xiaomi SU7 បានធ្វើសេចក្តីរាយការណ៍អំពីថាមពលថ្មរថយន្តរបស់ខ្លួនថា ថ្មរបស់ SU7 នៅរក្សាបានភាគរយខ្ពស់រហូតដល់ 94.5% បើទោះបីជារូបគេប្រើប្រាស់បានចម្ងាយ 265,000km ក្នុងរយះពេល 18 ខែហើយក្តី។ លោក Feng ដែលជាម្ចាស់ Xiaomi SU7 បាននិយាយថា “បុគ្គលិក Xiaomi បានប្រាប់រូបលោកអំពីលទ្ធផល ហើយលោកពិតជាភ្ញាក់ផ្អើលយ៉ាងខ្លាំង”។ “ Feng បានសន្មត់ថា ថ្មរបស់ SU7 របស់លោកអាចនឹងធ្លាក់ចុះមកត្រឹម 90% យ៉ាងតិចបំផុត។ ប៉ុន្តែ ក្រោយពីការធ្វើតេស្តបានបង្ហាញថា វាមានភាគរយខ្ពស់ជាងអ្វីដែលលោកបានគិត គឺដល់ 94.5% ដែលវាពិតជាគួរឱ្យភ្ញាក់ផ្អើលខ្លាំងមែនទែន”។
តាមរបាយការណ៍ទិន្នន័យពីម្ចាស់រថយន្ត Xiaomi SU7 Pro ម៉ូដែល RWD បាននិយាយថា លោកបានបើករថយន្តរបស់លោកជាមធ្យមក្នុងរយះចម្ងាយផ្លូវ 600km ជារៀងរាល់ថ្ងៃ ដែលជាចម្ងាយស្ទើរតែស្មើនិងការធ្វើដំណើរទៅមករវាងទីក្រុងញ៉ូវយ៉ក និងបូស្តុនទៅហើយ។ ការធ្វើតេស្តក្នុងការបើកបររយះចម្ងាយឆ្ងាយសម្រាប់រថយន្តអគ្គិសនីជារៀងរាល់ថ្ងៃនេះ អាចនឹងមានបញ្ហាប្រឈម សូម្បីតែរថយន្តប្រើម៉ាស៊ីនសាំងធម្មតាក៏ពិបាកក្នុងការថែរក្សារហូតដល់ការបញ្ជប់នៃសេវាកម្មធានាលើការប្រើប្រាស់របស់ពួកវាដែរ។
Xiaomi SU7 ប្រើប្រាស់កញ្ចប់ថ្មមានទំហំ 94.3kWh ដែលឆ្លងកាត់វដ្តនៃការសាក 506 ដង ដែលអាស្រ័យទៅលើថាមពលប្រើប្រាស់ដែលត្រូវបានគេប៉ាន់ស្មានថាមានកម្រិត 18kWh ក្នុងរយះចម្ងាយ 100km។ ជាទូទៅសម្រាប់វដ្តនៃការសាកថ្មរថយន្តអគ្គិសនីត្រូវបានក្រុមហ៊ុនធ្វើការកំណត់ជាស្តង់ដារ គឺចាប់ពី 20% ទៅ 80% នៃថាមពលថ្ម ជាជាងការអស់ថាមពលទាំងស្រុង (0%) មុនពេលសាកភ្លើងឡើងវិញ។ ក្រុមហ៊ុនផលិតរថយន្តអគ្គិសនីជាទូទៅមានការធានាលើកញ្ចប់ថ្មរថយន្តក្នុងរយះពេល 8 ឆ្នាំ ឬ 150,000km។ សម្រាប់ក្រុមហ៊ុន Tesla វិញបានធ្វើការធានាលើកញ្ចប់ថ្មរបស់ Model 3 និង Y-RWD រយះពេល 8 ឆ្នាំ ឬ 160,000km ជាមួយកម្រិតភាគរយនៃថាមពលថ្មដែលអាចប្រើបានប្រមាណ 70%។
លោក Feng មានគម្រោងក្នុងការក្លាយខ្លួនជាបុគ្គលដំបូងគេដែលប្រើប្រាស់រថយន្ត Xiaomi SU7 ឲ្យបានចម្ងាយ 600,000km នៅក្នុងរយះពេល 3 ឆ្នាំ។ លោក Feng ក៏បានបង្ហាញពីការកំណត់សំគាល់របស់លោកថា លោកអាចសន្សំសំចៃការចំនាយបានប្រហែលខ្ទង់ $14,300 ជាមួយការប្រើប្រាស់ឡានអគ្គិសនី បើធៀបនឹងឡានប្រើម៉ាស៊ីនសាំង។ SU7 ជាឡានអគ្គិសនី (Sedan EV) ម៉ូដែលដំបូងគេរបស់ Xiaomi ហើយជំនាន់ដំបូងនេះ ក៏ត្រូវបានក្រុមហ៊ុនធ្វើការបិទបញ្ចប់ការផលិតជាផ្លូវការណ៍ហើយ ដោយម៉ូដែលថ្មី ឬជំនាន់ថ្មីជំនាន់ទីពីររបស់ SU7 ត្រូវបានគេរំពឹងថា នឹងបង្ហាញវត្តមានផ្លូវការណ៍ក្នុងខែមេសា ឆ្នាំ 2026 ខាងមុខនេះ។
