នៅថ្ងៃនេះ ក្រុមហ៊ុន Xiaomi បានបញ្ជាក់ថា ខ្លួនបានត្រៀមប្រកាសចេញនូវកុំព្យូទ័រ Mi Notebook Pro 15 ឆ្នាំ 2020 នៅក្នុងទីផ្សាររបស់ចិននៅថ្ងៃទី 12 ខែមិថុនាស្អែកនេះហើយ ដែលនេះ គឺជាផលិតផលជំនាន់បន្ទាប់របស់កុំព្យូទ័រ Mi Notebook Pro 15 ដែលបង្ហាញខ្លួនកាលពីឆ្នាំមុន។ នៅក្នុងរូបភាពផ្សព្វផ្សាយផ្លូវការរបស់កុំព្យូទ័រជំនាន់ថ្មីនេះ ត្រូវបានចែករំលែកដោយក្រុមហ៊ុន Xiaomi ដែលមានការទម្លាយអំពីលក្ខណៈសម្បត្តិជាច្រើនរបស់កុំព្យូទ័រនេះផងដែរ។
ក្រុមហ៊ុននេះ បានបង្ហាញថា កុំព្យូទ័រនេះ នឹងមានតួខ្លួនអាលុយមីញ៉ូម។ គែម Bezels នៅលើអេក្រង់របស់វាគឺមិនតូចនោះទេ ប៉ុន្តែសម្រាប់គែមនៅខាងឆ្វេង និងខាងស្តាំរបស់វាគឺតូចជាផ្នែកខាងលើ និងផ្នែកខាងក្រោម។ រូបភាពនេះក៏មានការទម្លាយថា នៅលើម៉ាស៊ីននេះ គឺមាន 2x USB Type-C ports នៅគែមផ្នែកខាងស្តាំជាមួយនឹងរន្ធដោតម៉េមូរីកាតផងដែរ។ នៅក្នុងការឌីស្សាញនេហ កុំព្យូទ័រជំនាន់ថ្មីនេះមើលទៅមិនមានអ្វីដែលខុសគ្នាទៅនឹងកុំព្យូទ័រជំនាន់មុននោះទេ។
ក្រុមហ៊ុននេះ នៅមិនទាន់ទម្លាយនូវព័ត៌មានផ្សេងទៀតអំពីមុខងារ និងលក្ខណៈសម្បត្តិជាច្រើនទៀតរបស់កុំព្យូទ័រ Mi Notebook Pro 15 2020 នៅឡើយទេ។ អ្វីដែលគួរអោយចាប់អារម្មណ៍នោះ សម្រាប់ការប្រកាសបង្ហាញនូវកុំព្យូទ័រថ្មីនេះនៅក្នុងប្រទេសចិនគឺមួយថ្ងៃបន្ទាប់ពីក្រុមហ៊ុននេះប្រកាសបង្ហាញនូវកុំព្យូទ័រនេះនៅក្នុងទីផ្សាររបស់ប្រទេសឥណ្ឌា។ នៅថ្ងៃទី 11 ខែមិថុនានេះ ក្រុមហ៊ុន Xiaomi នឹងមានបង្ហាញនូវកុំព្យូទ័រ Mi Notebook របស់ខ្លួននៅក្នុងប្រទេសឥណ្ឌា ហើយក៏មានពាក្យចចាមអារ៉ាមថានោះ គឺជាកុំព្យូទ័រ Mi Notebook Horizon Edition ថែមទៀតផង។
ក្រុមហ៊ុនបច្ចេកវិទ្យាយក្សរបស់ចិននេះ បានបញ្ជាក់បន្ថែមថា កុំព្យូទ័រជំនាន់ថ្មីសម្រាប់ទីផ្សាររបស់ប្រទេសឥណ្ឌានេះ គឺមានគោលដៅសម្រាប់អ្នកប្រើប្រាស់គ្រប់កម្រិត ដោយសារតែវាមានភ្ជាប់ជាមួយនឹងបន្ទះឈីប Intel Core i7 processor ជំនាន់ទី 10។ សម្រាប់តម្លៃរបស់កុំព្យូទ័រនេះ នៅមិនទាន់ដឹងនៅឡើយទេ៕