បើទោះបីជា LG Electronics ប្រកាសលាងដៃដើរចេញពីអាជីវកម្មស្មាតហ្វូននៅទូទាំងពិភពលោកកាលពីពេលថ្មីៗនេះក្តី ប៉ុន្តែក្រុមហ៊ុនបច្ចេកវិទ្យាយក្សលំដាប់ថ្នាក់ពិភពលោករបស់កូរ៉េខាងត្បូងមួយនេះនៅមានអាជីវកម្មស្នូលជាច្រើនមុខទៀតដែលរាប់ចាប់តាំងពីអាជីវកម្មគ្រឿងបរិក្ខាប្រើប្រាស់ក្នុងគេហដ្ឋាន (SmartHome Appliance) រហូតដល់ទីផ្សារគ្រឿងបង្គុំរថយន្ត (Electronic Vehicle Components) ជាដើម។ ហើយនៅក្នុងពេលនេះក្រុមហ៊ុន LG ក៏បាននាំយកនូវផលិតផលបំពងសំឡេងជំនាន់ថ្មីស៊េរីឆ្នាំ 2021 ( LG Soundbar 2021-Series) របស់ខ្លួនទៅប្រកាសចេញលក់នៅលើទីផ្សារសកលផងដែរ។
ផលិតផល LG Soundbar 2021-Series ត្រូវបានក្រុមហ៊ុនធ្វើកំនែ Update ថ្មីដែលអាចគាំទ្រជាមួយនឹងបច្ចេកវិទ្យា AirPlay2 ក្នុងការតភ្ជាប់ដើម្បីទាញយកបទចម្រៀងចេញពីឧបករណ៍របស់ក្រុមហ៊ុន Apple រួមមានដូចជាទូរស័ព្ទ iPhones, ឧបករណ៍ iPads និងម៉ាស៊ីនកុំព្យូទ័រ Macs ជាដើមបានដោយមិនចាំបាច់ប្រើខែ្ស។ បន្ថែមពីនេះ LG Soundbar 2021-Series នូវទ្រទ្រង់បច្ចេកវិទ្យាបញ្ជាដោយសំឡេងតាមរយះកម្មវិធី Google Assistant និង Amazon Alexa ថែមទៀតផង។ ទៅលើប្រព័ន្ធ Speaker របស់ពូកវាវិញគឺទ្រទ្រង់នូវបច្ចេកវិទ្យា Dolby Atmos និង DTS:X surround sound ផងដែរ ដែលធ្វើអោយការបំពងសំឡេងកាន់តែមានគុណភាពខ្ពស់ ស្តាប់បានកាន់តែលឺពិរោះរណ្តំជាងមុន។
ហើយអ្វីដែលកាន់ពិសេសបំផុតនោះ LG Soundbar 2021-Series នៅមានភ្ជាប់នូវមុខងារឆ្លាតវៃថ្មីហៅថា AI Room Calibration ដែលមានសមត្ថភាពអាចវាស់ស្ទង់កំនត់កម្រិតសំឡេងទៅតាមមជ្ឍដ្ឋានជុំវិញ ឬវាស់នូវវិមាត្របន្ទប់ស្វ័យប្រវិត្តដោយប្រើនូវបច្ចេកវិទ្យា Spatial Awareness technology ដើម្បីធ្វើការកំនត់សំឡេងដើម្បីតម្រូវវិមាត្ររបស់បន្ទប់ និងមជ្ឈដ្ឋានទាំងនោះ។ ជាមួយគ្នានេះដែរសម្រាប់ម៉ូដែលមួយចំនួនក៏ទ្រទ្រង់នូវមុខងារ Hi-Res Audio ជាមួយកម្រិតសំឡេង 24-bit/96kHz ផងដែរ រួមនឹងមុខងារពិសេសៗថ្មីៗជាច្រើនទៀត។
សម្រាប់ឧបករណ៍បំពងសំឡេង LG Soundbar 2021-Series ដែល LG នាំយកទៅប្រកាសចេញលក់នៅលើទីផ្សារសកលនោះរួមមានម៉ូដែល SP11RA, SP9YA, SP8YA, SP7Y និង SPD7Y បន្ថែមពីនេះ LG ត្រូវបានគេដឹងទៀតថា ត្រៀមបញ្ចេញម៉ូដែលថ្មីមួយចំនួនទៀតនៅចុងឆ្នាំ 2021 នេះ។ ហើយសម្រាប់ទីផ្សារដែល LG ផ្តោតសំខាន់ក្នុងការចេញលក់ Soundbar 2021-Series របស់ខ្លួនរួមមានដូចជាអាមេរិកខាងជើង និងទីផ្សារអឺរ៉ុប ប៉ុន្តែ LG មិនបានរាយពីតារាងបញ្ចីតម្លៃសម្រាប់ឧបករណ៍ Soundbar ជំនាន់ថ្មីស៊េរីឆ្នាំ 2021 របស់ខ្លួននោះទេ៕