ស្មាតហ្វូនកំពូលកម្រិត Flagship ជំនាន់ថ្មីរបស់ Xiaomi ម៉ូដែល Xiaomi 14 Pro នឹងបំពាក់នូវបច្ចេកវិទ្យាអេក្រង់ថ្មីដ៏អស្ចារ្យ នេះបើតាមការបង្ហើបឲ្យដឹងពីគណនី Ice Universe។ បើតាមគំរូរូបភាព render ថ្មីមួយដែលបានបង្ហោះនៅលើគណនី Twitter បានបង្ហាញថា អេក្រង់របស់ Xiaomi 14 Pro គឺជាអេក្រង់មានគែមកោងទាំងបួនជ្រុងតែម្តង Quad-curved Display ព្រមទាំងមានកែម Bezel ជុំវិញរួមតូចស្តើងបំផុត។ ប៉ុន្តែ គួរឲ្យស្តាយដោយសារតែប្រភពមិនបានបញ្ជាក់ពីទំហំអេក្រង់ និងបច្ចេកវិទ្យាអេក្រង់ដែលត្រូវបំពាក់នៅលើ Xiaomi 14 Pro នោះទេ។
ជាធម្មតា Xiaomi ត្រូវបានគេទទួលស្គាល់ថា ជាក្រុមហ៊ុនផលិតស្មាតហ្វូនដែលតែងតែបញ្ចេញកំពូលស្មាតហ្វូនជំនាន់ថ្មីដែលបំពាក់នូវកំពូលឈីបជំនាន់ថ្មីចុងក្រោយរបស់ Qualcomm មុនគេជារៀងរាល់ឆ្នាំ។ ជាការពិតណាស់ Xiaomi 14 Pro អាចនឹងក្លាយជាកំពូលស្មាតហ្វូន Flagship ដំបូងគេដែលនឹងបំពាក់កំពូលឈីបនាគរាជជំនាន់ទី 3 គឺ Snapdragon 8 Gen 3។ ជាក់ស្តែងបើតាមប្រភពបញ្ចេញដោយ Digital Chat Station បានបង្ហាញថា Xiaomi 14 Pro បានបំពាក់បន្ទះឈីបដែលមានលេខកូដ SM8650 ដែលត្រូវបានគេជឿជាក់ថាជាលេខកូដសំគាល់នៃឈីប Snapdragon 8 Gen 3។
កំពូលឈីបនាគរាជជំនាន់ថ្មីនេះនឹងត្រូវផលិតឡើងតាមខ្នាតស្តង់ដារថ្មី 4nm របស់ TSMC ដែលនឹងផ្តល់នូវអនុភាពល្បឿនប្រតិបត្តិការខ្លាំងក្លាជាងជំនាន់មុន។ សម្រាប់គុណសម្បត្តិបឋមរបស់ឈីប Snapdragon 8 Gen 3 គឺនឹងមានអង្គគណនាជំនាន់ថ្មី Cortex-X4 ដែលមានល្បឿនដល់ទៅ 3.72GHz គូបផ្សំជាមួយ Cortex-A715 និង Cortex-A515 រួមជាមួយ Adreno 750 GPU។ Xiaomi 14 Pro ត្រូវបានគេរាយការណ៍ថា នឹងបំពាក់ថាមពលថ្មទំហំ 5,000mAh គាំទ្របច្ចេកវិទ្យាសាកភ្លើងកំលាំង 90W ទៅ 120W Wired Charging និង Wireless Charging 50W។
កំពូលស្មាតហ្វូនជំនាន់ថ្មីនេះ ក៏នឹងមានការបង្កើនសមត្ថភាពលែនកាមេរ៉ាផងដែរដោយក្នុងនោះអាចនឹងប្រើប្រាស់នូវលែនថ្មីប្រភេទ WLG High-Lens ថែមទៀតផង។ Xiaomi 14 Series នឹងមានជម្រើសម៉ូដែល Xiaomi 14 ដែលបំពាក់អេក្រង់ស្មើរ Flat-Display។ កំពូលស្មាតហ្វូនជំនាន់ថ្មីនេះ អាចនឹងបង្ហាញវត្តមាននៅក្នុងខែវិច្ឆិកា ឆ្នាំ 2023៕
