តម្លៃ និងជម្រើសពណ៌របស់ Google Pixel 9, Pixel 9 Pro, Pixel 9 Pro XL និង Pixel 9 Pro Fold ត្រូវបានគេទម្លាយចេញហើយ

ថ្មីៗនេះមានការទម្លាយចេញតម្លៃបឋមរបស់ស្មាតហ្វូបនជំនាន់ថ្មីចំនួន 4 ម៉ូដែលរបស់ក្រុមហ៊ុន Google ដែលត្រៀមបង្ហាញវត្តមានឆាប់ៗនៅមុនដំណាច់ឆ្នាំនេះ។ ស្មាតហ្វូនជំនាន់ថ្មីរបស់ Google រួមមានម៉ូដែល Pixel 9, Pixel 9 Pro, Pixel 9 Pro XL និង Pixel 9 Pro Fold។ តាមការបង្ហាញតម្លៃបឋមរបស់ស្មាតហ្វូនជំនាន់ថ្មីនេះ គឺមានការកើនឡើងខ្ពស់ជាងតម្លៃរបស់ Google Pixel 8 Series បច្ចុប្បន្ន។

យោងទៅលើប្រភពដែលបានទម្លាយតម្លៃស្មាតហ្វូន Pixel ជំនាន់ថ្មីនេះ គឺម៉ូដែល Pixel 9 ទំហំផ្ទុក 128GB គឺខ្ទង់ €899 ខណៈម៉ូដែល 256GB មានតម្លៃខ្ទង់ €999 (អឺរ៉ូ)។ Google Pixel 9 នឹងមានជម្រើសពណ៌ខ្មៅ ស ផ្កាឈូក និងបៃតង។ ដោយឡែកសម្រាប់ម៉ូដែល Pixel 9 Pro អាចនឹងមានទំហំប៉ុននឹងម៉ូដែល Pixel 9 ដែរ គ្រាន់តែមានកាមេរ៉ាច្រើនគ្រាប់ជាង រីតម្លៃវិញ Pixel 9 Pro មានអង្គផ្ទុកទិន្នន័យទំហំ 128GB មានតម្លៃខ្ទង់ប្រហែល €1,099, ម៉ូដែល 256GB មានតម្លៃខ្ទង់ €1,199 និងម៉ូដែល 512GB មានតម្លៃប្រហែល €1,329។ Pixel 9 Pro នឹងមានជម្រើសពណ៌ខ្មៅ និងប្រផេះ ហើយអាចនឹងមានពណ៌ផ្កាឈូកផងដែរ។

ចំនែកម៉ូដែល Pixel 9 Pro XL វិញ នឹងមានទំហំខ្លួនប៉ុននឹងម៉ូដែល Pixel 8 Pro បច្ចុប្បន្ន។ ម៉ូដែលនេះអាចនឹងមានតម្លៃចាប់ពីខ្ទង់ €1,199 សម្រាប់ម៉ូដែល 128GB, €1,299 សម្រាប់ម៉ូដែល 256GB, €1,429 សម្រាប់ម៉ូដែល 512GB, និង €1,689 សម្រាប់ម៉ូដែល។ Pixel 9 Pro XL ទំនងជានឹងមានជម្រើសពណ៌ស ប្រផេះ និងផ្កាឈូក។ 

ជាចុងក្រោយ គឺម៉ូដែលស្មាតហ្វូនអេក្រង់បត់ Google Pixel Pro Fold ដែលជាជំនាន់ថ្មីបន្តពីម៉ូដែល Google Pixel Fold។ ស្មាតហ្វូនអេក្រង់បត់ជំនាន់ថ្មីនេះ អាចនឹងមានតម្លៃខ្ទង់ €1,899 សម្រាប់ម៉ូដែល 256GB និងខ្ទង់ €2,029 សម្រាប់ម៉ូដែល 512។ Pixel Pro Fold នឹងមានជម្រើសពីរពណ៌ គឺខ្មៅហៅថា Obsidian និងពណ៌ស ហៅថា Porcelain។ ទាំងនេះ គឺជាតម្លៃសម្រាប់ទីផ្សារសហភាពអឺរ៉ុប ហើយតម្លៃ គឺនឹងមានការប្រែប្រួលតាមទីផ្សារក្នុងតំបន់ និងតម្លៃពន្ធអាករផងដែរ៕