Huawei ចាប់ដៃជាមួយ Aito ដែលជាក្រុមហ៊ុនផលិតរថយន្តអគ្គិសនីដ៏ល្បីមួយក្នុងប្រទេសចិន បានត្រៀមធ្វើការប្រកាសចេញរថយន្ត SUV ស៊េរីថ្មីដ៏ទំនើបបំផុតម៉ូដែល Aito M9។ រថយន្ត SUV ស៊េរីទំនើបរបស់ Huawei និង Aito នេះធ្លាប់ត្រូវបានលេចធ្លាយគុណសម្បត្តិមួយចំនួនរួចហើយកាលពីដើមខែសីហាកន្លងទៅ ហើយឥលូវនេះ Huawei Aito M9 ក៏បានឆ្លងកាត់លិខិតអនុញ្ញាតិពីស្ថាប័ន MIIT របស់ចិនជាមួយនឹងការបញ្ជាក់ពីលក្ខណៈសម្បត្តិបន្ថែមមួយចំនួនទៀត រួមនឹងកាលបរិច្ឆេទនៃការមកដល់ផងដែរ។
បើតាមការបញ្ជាក់នៅលើបញ្ចីរបស់ MIIT បានឲ្យដឹងថា Aito M9 នឹងមានមកជាមួយជម្រើសពីរប្រភេទ គឺប្រភេទ EREV និង BEV។ ដោយជម្រើសម៉ូដែល Aito M9-EREV នឹងត្រូវបានបំពាក់ម៉ាស៊ីនជំនួយចំនុះ 1.5liter generator មានកម្លាំង 112Hp ធ្វើការរួមគ្នាជាមួយម៉ូទ័រអេឡិចត្រិចចំនួន 2 អាចផលិតកម្លាំងបាន221Hp សម្រាប់ម៉ូទ័រខាងមុខជាប្រភេទ axle-motor និងម៉ូទ័រខាងក្រោយអាចផលិតកម្លាំងបាន 268Hp។
ដោយឡែកសម្រាប់ម៉ូដែល Aito M9-BEV វិញ គឺមានកំលាំងខ្លាំងជាមួយនឹងការបំពាក់ម៉ូទ័រអគ្គិសនីដែលផលិតដោយ Huawei ផ្ទាល់ ក្នុងនោះសម្រាប់ម៉ូទ័រខាងមុខអាចផលិតកំលាំងបាន 215Hp និងម៉ូទ័រខាងក្រោយអាចផលិតកំលាំងបាន 308Hp។ ហើយម៉ូដែល BEV នេះ ប្រើប្រាស់កញ្ចប់អាគុយដែលផ្គត់ផ្គង់ដោយក្រុមហ៊ុន CATL។
ជាចុងក្រោយ Huawei-Aito អាចនឹងធ្វើការប្រកាសចេញផ្លូវការណ៍រថយន្ត SUV ម៉ូដែល Aito M9 ដ៏ទំនើបនេះនៅចុងឆ្នាំ 2023 នេះ ដែលរថយន្តស៊េរីថ្មីនេះក៏នឹងបំពាក់នូវប្រព័ន្ធបច្ចេកវិទ្យាដ៏ទំនើបចុងក្រោយរបស់ Huawei និងប្រព័ន្ធបច្ចេកវិទ្យាសាកភ្លើងជំនាន់ថ្មីចុងក្រោយ 800V high-voltage platform ផងដែរ៕
