Honor Magic V Flip 2 អាចនឹងឈ្នះ Galaxy Z Flip 7 ដោយសារតែថ្មធំ និងបច្ចេកវិទ្យាសាកល្បឿនលឿន!

យោងតាមការព័ត៌មានថ្មី ដែលបានចេញរយៈពេលចុងក្រោយនេះ បានអោយដឹងថា ក្រុមហ៊ុន Honor បានត្រៀមលក្ខណៈរួចជាស្រេចហើយនៅក្នុងចូលរួមធ្វើការប្រជែងជាមួយនឹងស្មាតហ្វូនលំដាប់ថា្នក់ប្រណិត Flagship ជាច្រើនក្នុងពេលបច្ចុប្បន្ននេះ។ ជាក់ស្តែងស្មាតហ្វូនអេក្រង់បត់បានស៊េរីថ្មី  Magic V Flip 2 ឬ Magic V2 Flip ដែលនឹងមានការប្រកាសនៅលើទីផ្សារនាពេលខាងមុខនេះ ត្រូវបានគេបញ្ជាក់ថាគឺនឹងមានថាមពលថ្មធំជាងមុន និងបច្ចេកវិទ្យាសាកថ្មលឿនជាងមុនទៀតផង។

បើមើលតាមការបង្ហោះរបស់អ្នកទម្លាយ Digital Chat Station នៅលើបណ្តាញសង្គម Weibo បានធ្វើការចែករំលែកនូវព័ត៌មានមួយចំនួនរបស់ស្មាតហ្វូនអេក្រង់បត់បានម៉ូដែលថ្មី Magic V Flip 2 នេះហើយ ដោយគាត់បង្ហាញនូភាពជឿជាក់ថា នៅលើស្មាតហ្វូនបត់បានជំនាន់ថ្មីរបស់ក្រុមហ៊ុន Honor នេះ អាចនឹងមានការទ្រទ្រង់ទៅលើបច្ចេកវិទ្យាសាកថ្មល្បឿនលឿន 80W wired fast charging។ 

ក្រឡេកមកមើលស្មាតហ្វូនអេក្រង់បត់បាន Galaxy Z Flip 7 របស់ក្រុមហ៊ុន Samsung ដែលទើបតែចេញចុងក្រោយបំផុតនេះវិញ គឺមានថាមពលថ្មធំជាងស្មាតហ្វូនជំនាន់មុន។ ក្រុមហ៊ុនបច្ចេកវិទ្យាយក្សកូរ៉េខាងត្បូងមួយនេះ ក៏បានធ្វើការបង្កើនថ្មទៅកាន់ទៅលើម៉ូដែលថ្មីនេះដល់ 4,300mAh ហើយថែមទាំងមានការដាក់អោយប្រើប្រាស់នូវបច្ចេកវិទ្យាសាកថ្មលឿន 25W wired fast charging និង 15W wireless charging ទៀតផង។

ដូច្នេះបើផ្អែកលើការលើកឡើងខាងលើនេះ អាចនិយាយបថា Honor Magic V Flip 2 អាចប្រជែងឈ្នះ Galaxy Z Flip 7 ទៅលើថ្មធំជាង និងបច្ចេកវិទ្យាសាកលឿនជាង។ Honor Magic V Flip 2 អាចនឹងមានការបង្ហាញខ្លួននៅក្នុងទីផ្សារនៃប្រទេសចិននៅក្នុងខែសីហាឆ្នាំ 2025 នេះ ប៉ុន្តែមិនទាន់មានការប្រកាសជាផ្លូវការនៅឡើយទេ។ ថ្មីៗនេះ ស្មាតហ្វូនអេក្រង់បត់បានថ្មីនេះ ក៏ត្រូវបាគេឃើញថាបានបង្ហាញខ្លួននៅលើវិញ្ញាបនបត្រ CMIIT របស់ចិន និង 3C រួចហើយផងដែរ។ 

ស្មាតហ្វូន Magic V Flip 2 នេះអាចនឹងមានអេក្រង់បត់ខាងក្នុងទំហំ 6.8-អ៊ីង flexible LTPO OLED គាំទ្រជាមួយនឹងកម្រិតភាពច្បាស់ FHD+ resolution និង refresh rate ខ្ពស់ជាងមុនផងដែរ។ ចំពោះអេក្រង់ខាងក្រៅ ឬ Cover Display របស់ស្មាតហ្វូននេះ អាចនឹងមានទំហំ 4-អ៊ីង។ សម្រាប់កម្លាំងម៉ាស៊ីននៅលើស្មាតហ្វូនអេក្រង់បត់បាននេះ គឺអាចនឹងប្រើប្រាស់នូវបន្ទះឈីប Snapdragon 8s Gen 4 ឬ Snapdragon 8 Elite៕