ជម្រើសពណ៌ដែលប្រើប្រាស់នៅលើស្មាតហ្វូន Galaxy S25 FE ត្រូវបានបង្ហាញចេញហើយ!

Galaxy S25 FE គឺជាស្មាតហ្វូនម៉ូដែលពិសេសថ្មីមួយទៀតរបស់ក្រុមហ៊ុន Samsung ដែលត្រៀមនឹងធ្វើការប្រកាសចេញលក់នៅលើទីផ្សារនាពេលខាងមុខនេះហើយ។ គិតមកដល់ពេលនេះសម្រាប់ការឌីស្សាញ និងលក្ខណៈសម្បត្តិមួយចំនួននៅលើស្មាតហ្វូននេះ គឺធ្លាប់មានការបញ្ជាក់ខ្លះៗរួចហើយ។ មួយវិញទៀតបើទោះបីជាក្រុមហ៊ុននេះនៅមិនទាន់បានបញ្ជាក់ច្បាស់ពីព័ត៌មានទូទៅរបស់ស្មាតហ្វូនក៏ដោយក៏គ្រប់គ្នាប្រាកដជាធ្លាប់ដឹងហើយថា សម្រាប់ម៉ូដែល FE គឺជាស្មាតហ្វូនដែលមានតម្លៃសមរម្យ ប៉ុន្តែមានការប្រើប្រាស់នូវលក្ខណៈសម្បត្តិមួយចំនួនដូច Flagship អញ្ចឹង។

យោងតាមការទម្លាយថ្មីចេញពីប្រទេសហូឡង់តាមរយៈ NieuweMobiel.NL បានបង្ហាញថា Galaxy S25 FE នឹងមានជម្រើស 4 ពណ៌ រួមមានដូចជា Black, White, Light Blue ហើយនិង darker Blue ដែលស្រដៀងគ្នា “Blue Shadow” របស់ស្មាតហ្វូនអេក្រង់បត់បាន Galaxy Z Fold 7 និង Flip 7។ តាមរយៈព័ត៌មាននេះ អាចនិយាយថា ស្មាតហ្វូនអេក្រង់បត់បានថ្មីនេះ មានជម្រើសពណ៌តិចជាងជំនាន់មុន Galaxy S24 FE។ 

គួរបញ្ជាក់ថា កន្លងមក ស្មាតហ្វូននេះធ្លាប់ត្រូវបានគេទម្លាយថា នឹងមានកម្រ៉ាស់ស្តើងជាងជំនាន់មុន ដោយកម្រ៉ាស់ត្រឹមតែ 7.4mm ខណៈដែលម៉ូដែលមុនមានកម្រ៉ាស់ 8mm ហើយក៏មានការបង្ហើបថា ស្មាតហ្វូនថ្មីនេះ នឹងមានការបំពាក់នូវអេក្រង់ flexible OLED panel ទៀតផង។ Galaxy S25 FE ត្រូវបានគេរំពឹងថា នឹងមានអេក្រង់ទំហំ 6.7 អ៊ីង Dynamic AMOLED 2X ល្បឿន 120Hz refresh rate គាំទ្រដោយបច្ចេកវិទ្យា HDR10+ និងមានកម្រិតពន្លឺខ្ពស់ដល់ទៅ 2,600nits ដែលដូចគ្នាជាមួយនិងស្មាតហ្វូនថ្នាក់ប្រណិតៗរបស់ Samsung អញ្ចឹងដែរ។ 

Galaxy S25 FE ដំណើរការនៅលើបន្ទះឈីប Exynos 2400 រ៉េម 8GB និងអង្គចងចាំទំហំ 128GB ឬ 256GB ហើយនឹងអាចរត់នៅលើស្បែក One UI 8.0 ផ្អែកនៅលើប្រព័ន្ធប្រតិបត្តិការ Android 16 ដែលនឹងមានការអាប់ដែតដល់ទៅ 7 ឆ្នាំ។ ស្មាតហ្វូននេះនឹងមានថ្មទំហំ 4,500mAh គាំទ្រកម្លាំងសាក 45W fast charging មានបច្ចេកវិទ្យាការពារទឹក និងធូលីកម្រិត IP68 ព្រមជាមួយនិងបច្ចេកវិទ្យា AI ដែលមានការគាំទ្រដោយ Gemini ថែមទៀតផង។ Galaxy S25 FE អាចនឹងបង្ហាញខ្លួននៅខែកញ្ញា ឬតុលា ឆ្នាំ 2025 ខាងមុខនេះហើយ។