Hyundai ត្រៀមបង្ហាញឡានអគ្គិសនីដំបូងរបស់ខ្លួននៅចិននៅខែកញ្ញានេះហើយ

Beijing Hyundai ដែលជាក្រុមហ៊ុនថ្មីមួយដែលមានការចាប់ដៃគ្នារវាង Hyundai Motor Company និង BAIC នៅថ្ងៃនេះ បានប្រកាសចេញនូវកាលបរិច្ឆេតនៃការបង្ហាញវត្តមានឡានអគ្គិសនីថ្មីម៉ូដែល SUV ដំបូងរបស់ខ្លួនមានឈ្មោះថា EO ហើយ។ សូមជំរាបផងដែរថា កន្លងមកឡានថ្មីនេះ គឺមានឈ្មោះថា Elexio ហើយក្រុមហ៊ុននេះ គ្រោងនឹងដាក់លក់នៅលើទីផ្សារប្រទេសចិននាខែកញ្ញាឆ្នាំ 2025 ខាងមុខ ដោយបញ្ជាក់ពីការចាប់ផ្តើមរបស់ Beijing Hyundai ជាមួយនិងការប្រើប្រាស់នូវថាមពលថ្មី  “Year of New Energy.”។

តាមការបញ្ជាក់របស់ក្រុមហ៊ុននេះ បានបង្ហើបអោយដឹងថា ខ្លួននឹងមានការបង្ហាញចេញនូវឡានអគ្គិសនីជំនាន់ថ្មីរបស់ខ្លួនចំនួន 5 ម៉ូដែលនៅក្នុងរយៈពេល 3 ឆ្នាំ ខាងមុខ និងមានតម្លៃចាប់ពី 100,000 យ៉ន់ ទៅ 300,000 យ៉ន់ ប្រហាក់ប្រហែល 14,000 ដុល្លារ ទៅ 42,000 ដុល្លារ។

ទៅលើការឌីស្សាញរូបរាងវិញ Hyundai Elexio ត្រូវបានរចនារូបរាងឡើងជាទម្រង់អក្សរ U ដែលរំលេចដោយចង្កៀង Daytime running light រចនាបថ Crystal ផ្គុំចេញជារាងលេខ 8 ដែលជាលេខហ៊ុងស៊ុយសម្រាប់ប្រជាជនចិន។ នៅផ្នែកចំហៀងមានបំពាក់នូវដៃទ្វារលាក់ចូលក្នុងតួរ ឬ Hidden-door-handle ជាមួយយ៉ាន់កង់រចនាជាកាំ Multi-spoke rim ទំហំ 20-inch។ នៅផ្នែកខាងក្នុងត្រូវបានរចនាជាមួយនឹងពណ៌ប្រណិត បំពាក់កៅអីស្បែកទំនើប និងប្រព័ន្ធបច្ចេកវិទ្យាប្រើប្រាស់ទំនើបបំផុត។ 

Elexio នឹងបំពាក់នូវគំរូបច្ចេកវិទ្យាអេក្រង់ព័ត៌មានបើកបរថ្មីទំនើបដែលដំណើរការដោយបន្ទះឈីប Qualcomm Snapdragon 8295P ហើយនិងគាំទ្រនូវមុខងារបង្ហាញផ្លូវ online navigation, ប្រព័ន្ធកម្សាន្តក្នុងរថយន្ត entertainment, ការតភ្ជាប់ជាមួយស្មាតហ្វូន smartphone connectivity, អាចធ្វើបច្ចុប្បន្នភាពប្រព័ន្ធក្នុងរថយន្ត OTA updates, មុខងារបញ្ជាដោយសំឡេង voice interaction, និងការបញ្ជាពីចម្ងាយ remote control…ជាដើម។

ទៅលើប្រព័ន្ធជំនួយការបើកបរឆ្លាតវៃវិញ Elexio នឹងគាំទ្រនូវប្រព័ន្ធជំនួយការបើកបរកម្រិត L2+ System ជាមួយមុខងារ Highway navigation ថែមទៀតផង។ ក្រុមហ៊ុន Beijing Hyundai មានគម្រោងធ្វើបច្ចុប្បន្នភាពលើមុខងារ automatic assisted driving និងការដាក់បង្ហាញនៅប្រព័ន្ធ memory parking ក្នុងឆ្នាំ 2025 ហើយសម្រាប់មុខងារជំនួយការបើកបរក្នុងក្រុង urban assisted driving ត្រូវបានរំពឹងថានឹងដាក់ចេញនៅឆ្នាំ 2026។ រថយន្តអគ្គិសនី SUV ម៉ូដែលថ្មីនេះ នឹងគាំទ្រដំណើរការជាមួយប្រតិបត្តិការ Harmony OS Intelligent Mobility សម្រាប់ដំណើរការមុខងារទាំងអស់នៅលើរថយន្ត។

Elexio SUV ត្រូវបានរចនាផលិតឡើងដោយប្រើនូវទម្រង់នៃប្រព័ន្ធគ្រោងឆ្អឹងរថយន្តអគ្គិសនីសុទ្ធប្រភេទ Electric Global Modular Platform (E-GMP) របស់ក្រុម Hyundai។ រថយន្តស៊េរីថ្មីនឹងមានសមត្ថភាពអាចជិះបានចម្ងាយផ្លូវដល់ជាង 700km ហើយនិងគាំទ្រនូវបច្ចេកវិទ្យាសាកភ្លើងល្បឿនលឿន ដែលមានសមត្ថភាពសាកបំពេញភាគរយឲ្យកញ្ចប់អាគុយពី 30% ឡើងទៅ 80% ប្រើពេលប្រមាណតែ 27 នាទីប៉ុណ្ណោះ។ ទោះជាយ៉ាងណាសម្រាប់មុខងារ អនុភាពកំលាំងម៉ូទ័រអគ្គិសនី និងបច្ចេកវិទ្យាផ្សេងៗទៀត រួមនឹងតម្លៃរបស់ Elexio ក្រុមហ៊ុនមិនទាន់បង្ហើបឲ្យដឹងនៅឡើយទេក្នុងពេលនេះ៕