ការបង្ហាញខ្លួនរបស់ Pixel 10 Pro Fold នឹងពន្យាពេលទៅខែតុលាខាងមុខ

បន្ទាប់មានការបញ្ចេញនូវព័ត៌មានថ្មីៗជាច្រើនអស់មួយរយៈមក Pixel 10 Series ដែលជាស្មាតហ្វូនជំនាន់ថ្មី របស់ Google នៅពេលនេះ គឺកំពុងតែមានការចាប់អារម្មណ៌ជាខ្លាំងពីសំណាក់អ្នកតាមដានជាច្រើននៅជុំវិញពិភពលោក។ យោងតាមព័ត៌មានថ្មីនៅថ្ងៃនេះ បានបង្ហើបថា ការមកដល់របស់ស្មាតហ្វូននេះ អាចនឹងមានការប្រែប្រួលហើយ។ ផ្អែកតាមរបាយការណ៌ថ្មីរបស់ក្រុមហ៊ុននេះ ដែលគ្រោងនឹងប្រកាសចេញនូវស្មាតហ្វូនអេក្រង់បត់បានថ្មីរបស់ខ្លួននាពេលខាងមុខនេះ អាចនឹងមានការយឺតយ៉ាវហើយ។

នៅថ្ងៃនេះ បើតាមរបាយការណ៌របស់ WinFuture ដែលជាប្រភពជឿជាក់បាននោះ បានរាយការណ៌ថា ស្មាតហ្វូនជំនាន់ថ្មីរបស់ Google ដែលមានដូចជា Pixel 10, 10 Pro និង 10 Pro XL គឺនឹងមានការដាក់អោយកក់មុនបានចាប់ពីថ្ងៃទី 20 ខែសីហាខាងមុខនេះហើយនឹងធ្វើការដឹកជញ្ជូននៅថ្ងៃទី 28 ខែសីហា។ ប៉ុន្តែសម្រាប់ស្មាតហ្វូនអេក្រង់បត់បានជំនាន់ថ្មី Pixel 10 Pro Fold គឺមិនទាន់មកដល់ទេ ដោយក្រុមហ៊ុននឹងធ្វើការពន្យាពេលដល់ថ្ងៃទី 9 ខែតុខាងមុខវិញ។ 

ជាមួយនិងវត្តមានរបស់ Pixel 10 Series នៅថ្ងៃទី 20 ខែសីហាខាងមុខនេះ ក្រុមហ៊ុន Google ក៏នឹងមានការប្រកាសចេញនូវផលិតផលថ្មីៗមួយចំនួនទៀតផងដែរ ក្នុងនោះមានដូចជា Pixel Watch 4 និង Pixel Buds 2a ជាដើម។ គួរបញ្ជាក់ថា Pixel 10 Pro Fold គឺជាស្មាតហ្វូនអេក្រង់បត់បានថ្មីមួយ ដែលគេជឿជាក់ថា នឹងអាចប្រកួតប្រជែងជាមួយនិង Galaxy Z Fold 7 ដែលជាស្មាតហ្វូនអេក្រង់បត់បានជំនាន់ថ្មីរបស់ Samsung ផងដែរ។ ស្មាតហ្វូននេះមានថ្មទំហំ 5,015mAh និងមានការគាំទ្រដោយកម្លាំងសាក Qi2 wireless charging ទៀតផង។