Samsung Galaxy S26 Edge ថ្មកាន់តែធំ កម្រ៉ាស់កាន់តែស្តើងជាងមុន

Galaxy S26 Edge ដែលជាស្មាតហ្វូនជំនាន់ថ្មីមួយទៀតរបស់ Samsung ត្រូវបានគេទម្លាយថា នឹងមានការអាប់ដែតកាន់តែខ្លាំងទៅលើថាមពលថ្ម បន្ទាប់ពីការបង្ហាញវត្តមានម៉ូដែលមុនត្រូវបានអ្នកប្រើប្រាស់មានការរិះគន់ទៅលើថាមពលថ្មតូច។ យោងតាមការបែកធ្លាយថ្មីនៅថ្ងៃនេះ បានបង្ហាញថា សម្រាប់ម៉ូដែល Galaxy S26 Edge ដែលនឹងចេញនៅឆ្នាំ 2026 គឺនឹងមានការម្រ៉ាស់កាន់តែស្តើង ប៉ុន្តែថាមពលថ្មកាន់តែធំជាងមុន។ 

យោងតាមការបង្ហោះរបស់អ្នកទម្លាយ Setsuna Digital នៅបណ្តាញ Weibo បាននិយាយថា Galaxy S26 Edge ប្រហែលជាននឹងមានថ្មទំហំ 4,400mAh ដែលធំជាងម៉ូដែល Galaxy S25 Edge មានទំហំត្រឹមតែ 3,900mAh ប៉ុណ្ណោះ។ សូមជំរាបថា មុននេះ ធ្លាប់មានព័ត៌មានថ្មីនិយាយថា ស្មាតហ្វូនថ្មីនេះ គឺនឹងមានថ្មទំហំត្រឹម 4,200mAh ប៉ុណ្ណោះ។ គួរបញ្ជាក់ផងដែរថា ក្រៅតែពីការតម្លើងនូវថាមពលថ្មធំហើយ នៅលើស្មាតហ្វូន S26 Edge ក៏ត្រូវបានគេរាយការណ៌ថា នឹងមានកម្រ៉ាស់ស្តើងជាង Galaxy S25 Edge ដែលមានកម្រ៉ាស់ 5.8mm ទៀតផង។។ 

របាយការណ៌ខាងលើនេះបន្តថា ជាមួយនិងវត្តមានរបស់ Galaxy S26 Edge នេះ ត្រូវបានគេព្យាករណ៌ថា នឹងមកជំនួសកន្លែងស្មាតហ្វូន Galaxy S26 Plus។ ខណៈដែលស្មាតហ្វូន Galaxy S26 Edge ថ្មីនេះ នឹងមានថ្មទំហំ 4,400mAh នោះ ក៏ ត្រូវបានគេនិយាយថា មិនទាន់ធំដូចការចង់បានរបស់អ្នកប្រើប្រាស់នោះទេ ប៉ុន្តែទំហំនេះក៏ជាការអាប់ដែតថ្មីមួយរបស់ក្រុមហ៊ុន Samsung ទៅលើថាមពលថ្មនៅលើស្មាតហ្វូនជំនាន់ថ្មីរបស់ខ្លួនផងដែរ។