ក្រុមហ៊ុន Huawei បានប្រកាសផ្លូវការណ៍ថា ព្រឹត្តិការណ៍បង្ហាញផលិតផលថ្មីរបស់ខ្លួននឹងធ្វើឡើងនៅថ្ងៃទី 04 ខែកញ្ញា ខាងមុននេះ វេលាម៉ោង 2:30pm ម៉ោងនៅក្នុងប្រទេសចិន។ នៅក្នុងព្រឹត្តិការណ៍ថ្ងៃនោះ Huawei ត្រូវបានគេដឹងថា នឹងមានការដាក់បង្ហាញចេញស្មាតហ្វូនអេក្រង់បត់បីបត់ជំនាន់ថ្មី Mate XTs។ ស្មាតហ្វូនអេក្រង់បត់បីបត់ជំនាន់ថ្មីរបស់ Huawei ត្រូវបានគេរាយការណ៍ថា នឹងមានការបង្កើនសមត្ថភាពទៅលើប្រព័ន្ធដំណើរការ ប្រព័ន្ធកាមេរ៉ា និងគុណភាពនៃការឌីស្សាញ ខណៈតម្លៃក៏នឹងទាបជាងជំនាន់ដំបូង Mate XT។
.jpg)
Huawei Mate XTs Extraordinary Master នឹងក្លាយជាម៉ាកយីហោថ្មីទីពីរក្នុងគ្រួសារស្មាតហ្វូនអេក្រង់បត់បីបត់របស់ Huawei។ បើតាមការចេញផ្សាយដោយគណនី Digital Chat Station បានឲ្យដឹងថា ស្មាតហ្វូនអេក្រង់បត់ Triple-Fold ជំនាន់ថ្មីរបស់ Huawei មិនត្រឹមតែមានការបង្កើនគុណភាពផលិត និងសមត្ថភាពប្រព័ន្ធដំណើរការខ្លាំងជាងជំនាន់មុននោះទេ ក្រុមហ៊ុនក៏នឹងបន្ថែមមកជាមួយជម្រើសពណ៌ថ្មីចំនួនពីរ គឺពណ៌ស និងពណ៌ស្វាយហៅថា Crimson Purple ផងដែរ។
Huawei Mate XTs នឹងបំពាក់នូវបន្ទះឈីប HiSilicon Kirin 9020 ដែលប្រើនៅលើបងប្អូនកំពូលស្មាតហ្វូន Huawei Pura 80។ ដែលបន្ទះឈីបនេះត្រូវបានផលិតឡើងដោយប្រើស្ថាបត្យកម្ម Core-CPU 1+3+4 និងភ្ជាប់មកជាមួយ Maleoon 920 GPU ព្រមទាំងគាំទ្រនូវប្រព័ន្ធតភ្ជាប់បណ្តាញផ្កាយរណបផងដែរ។
Mate XTs នឹងប្រើប្រាស់នូវប្រព័ន្ធបច្ចេកវិទ្យាត្រចៀកបត់ថ្មីហៅថា Tiangong Hinge System ដែលផ្តល់នូវភាពធន់នឹងការកាច់បត់ និងកាត់បន្ថយស្នាមផ្តត់អេក្រង់បានល្អប្រសើរជាងមុន។សម្រាប់ប្រព័ន្ធកាមេរ៉ាវិញ Huawei Mate XTs នឹងដំឡើងមកជាមួយសែនស័រគោលទំហំ 50MP គាំទ្រមុខងារ Variable Aperture និងគាំទ្រមុខងារ Red Maple ក្នុងការបង្កើនគុណភាពទឹកពណ៌នៅលើរូបឲ្យកាន់តែមានភាពសុក្រិតបំផុត។ ជាមួយគ្នានេះ លែន Periscope telephoto នឹងមានវត្តមាននៅលើ Mate XTs ផងដែរ ដើម្បីបង្កើនសមត្ថភាព zoom។
Huawei Mate XTs នឹងគាំទ្រការប្រើប្រាស់ប៊ិច Stylus Pen ផងដែរ។ តាមការព្យាករណ៍ Huawei Mate XTs អាចនឹងមានតម្លៃចាប់ផ្តើមពី $2,060 ធូរថ្លៃជាងជំនាន់ Mate XT ដែលមានតម្លៃដល់ $2,750។ សូមបញ្ជាក់ថា មកទល់នឹងពេលនេះ Huawei Mate XT លក់បានចំនួន 500,000 គ្រឿង រកចំណូលបានប្រមាណ 1.73 ពាន់លានដុល្លារ អោយ Huawei។ ដោយឡែកសម្រាប់ម៉ូដែលជំនាន់ថ្មី Mate XTs ត្រូវបានគេរំពឹងទុកថា អាចលក់បានដល់ 1 លានគ្រឿង៕
