Huawei គ្រប់គ្រងចំណែកដល់ទៅ 3/4 ទៅលើទីផ្សារស្មាតហ្វូនអេក្រង់បត់នៅចិននាត្រីមាសទី 1 ឆ្នាំ 2025!

នៅពេលនេះ ក្រុមហ៊ុន Huawei បាននឹងកំពុងបង្កើនទៅលើការគ្រប់គ្រងទីផ្សារស្មាតហ្វូនបត់បានរបស់ខ្លួននៅក្នុងប្រទេសចិន កាន់តែធំឡើងៗហើយ គិតមកត្រឹមឆមាសទី 1 ឆ្នាំ 2025 នេះ ក្រុមហ៊ុននេះបានគ្រប់គ្រងចំណែកទីផ្សារដល់ទៅ 75% នេះបើតាមការបញ្ជាក់ចេញពីរបាយការណ៍មួយរបស់ IDC ។ ការនាំចេញស្មាតហ្វូនបត់បាននៅក្នុងប្រទេសចិននេះ គឺមានការកើនឡើង 12.6% ធៀបទៅនឹងឆ្នាំមុននេះនៅក្នុងរយៈពេលដូចគ្នា។ គួរបញ្ជាក់ថា បន្ទាប់ពីការបង្ហាញស្មាតហ្វូនបត់បាននៅក្នុងឆ្នាំ 2019 ក្រុមហ៊ុន Huawei បាននាំចេញស្មាតហ្វូនបត់បានច្រើនជាង 10 លានគ្រឿងហើយ។ 

Huawei ត្រូវបានគេមើលឃើញថា គឺជាក្រុមហ៊ុនម៉ាកយីហោស្មាតហ្វូនដំបូងបំផុតរបស់ចិនដែលសម្រេចបាននូវសមិទ្ធិផល ជាទីគាប់ចិត្ត ដែលភាពជោគជ័យនេះ គឺបានបង្ហាញអំពីកំណើនដ៏ខ្លាំងក្លា និងការទទួលយករបស់អ្នកប្រើប្រាស់។ សម្រាប់ត្តា ភាពជោគជ័យនេះ គឺដោយសារតែឆន្ទៈរបស់ក្រុមហ៊ុន Huawei នៅក្នុងការផ្តល់នូវភាពច្នៃប្រឌិតថ្មីបំផុតទៅលើស្មាតហ្វូនបត់បានថ្មីរបស់ខ្លួន។ ជាក់ស្តែង Mate XT ដែលជាស្មាតហ្វូនបត់បាន 3 តង់ដំបូងបំផុតរបស់ពិភពលោក នៅមិនទាន់មានក្រុមហ៊ុនណាអាចប្រកួតប្រជែងបាននៅឡើយទេនៅក្នុងពេលជិត 1 ឆ្នាំនេះ។

ក្រុមហ៊ុន IDC បាននិយាយថា ស្មាតហ្វូនបត់បាន 3 តង់នេះ មានការនាំចេញជិត កន្លះលានគ្រឿងនៅក្នុងពេល 6 ខែ។ នៅដើមឆ្នាំ 2025 នេះ ក្រុមហ៊ុន Huawei បានបន្ថែមនូវ Category ថ្មីជាមួយនឹងស្មាតហ្វូន Pura X ដែលស្ថិតនៅក្នុងផ្នែក  “wide-foldable”។ ក្រុមហ៊ុននេះ ក៏បានបញ្ចេញនូវកុំព្យូទ័របត់បាន MateBook Fold Ultimate Design ដែលមានទំហំដល់ទៅ 18-inch ។ 

បច្ចុប្បន្ននេះ ក្រុមហ៊ុនជាច្រើន ក៏បានចាប់ផ្តើមបញ្ចេញនូវស្មាតហ្វូនដែលអាចបត់បានជាច្រើនដែលមានការពង្រឹងទៅលើផ្នែក Software និង Hardware។ បន្ថែមពីនេះ ក្រុមហ៊ុនទាំងនេះ ក៏បានបង្កើនទៅលើសមត្ថភាព AI កាន់តែប្រសើរផងដែរ។ សម្រាប់ក្រុមហ៊ុនជាច្រើនទៀតនៅមិនទាន់មានចំនួនតួរលេខអាចប្រជែងទៅនឹងក្រុមហ៊ុន Huawei បាននៅឡើយទេ។ ក្រុមហ៊ុន Honor  មានចំណែកទីផ្សារចំនួន 8.4% ដែលមានការជម្រុញពីស្មាតហ្វូន Magic V5 ។ ក្រុមហ៊ុន OPPO មានចំនួន 6.1% ខណៈពេលដែលក្រុមហ៊ុន Xiaomi និង Vivo មានចំណែកទីផ្សារចំនួន 3.7% និង 3% រៀងគ្នា៕