realme ចេញគំរូស្មាតហ្វូន 2 ដែលមួយមានថ្ម 15,000mAh និងមួយទៀតមានការបំពាក់កង្ហាដូចឡែបថប់ចឹង

ក្រុមហ៊ុន realme បានប្រកាសចេញនូវគំរូស្មាតហ្វូនជំនាន់ថ្មីចំនួន 2 នៅក្នុងព្រឹត្តិការណ៌ 828 Fan Festival នៅលើទីផ្សារប្រទេស ចិន។ ស្មាតហ្វូនដំបូងនេះ គឺជាសមិទ្ធិផលថ្មីមួយទៀតរបស់ក្រុមហ៊ុនមានថ្មទំហំដល់ទៅ 15,000mAh ដែលសាកពេញម្តង អាចប្រើប្រាស់បានដល់ទៅ 5 ថ្ងៃ។ សម្រាប់ម៉ូដែលទី 2 មានថ្មទំហំ 10,000mAh មានការតម្លើងមកជាមួយនូវកង្ហាត្រជាក់ cooling fan រួមនិង Thermoelectric cooler ដែលមានសមត្ថភាពអាចធ្វើអោយស្មាតហ្វូនមានសីតុណ្ហភាពត្រឹម 6°C ទៀតផងនេះបើតាមការបញ្ជាក់់់ពី realme។

ជាមួយនិងស្មាតហ្វូន realme ដែលមានថ្មទំហំ 15,000mAh  នេះ គឺប្រើប្រាស់នូវថាមពលថ្ម 100% Silicon Anode Battery។ ក្រុមហ៊ុន realme បានបញ្ជាក់ថា គ្រប់គ្នាអាចប្រើប្រាស់ស្មាតហ្វូនថ្មីនេះ មានរយៈពេលច្រើនជាងស្មាតហ្វូនធម្មតាបានដល់ទៅ 4 ដង។ ថាមពលថ្មថ្មីនះមានការប្រើប្រាស់នូវថាមពលកម្រិត 1,200 Wh/L។ ជាមួយនិងស្មាតហ្វូននេះ គ្រប់គ្នាអាចទស្សនាវីដេអូបានដល់ទៅជាង 50 ម៉ោង ហើយនិងអាចលេងហ្គេមបានចាប់ពី 18 ម៉ោង ទៅ 30 ម៉ោង។ ស្មាតហ្វូននេះមានកម្រាស់ត្រឹមតែ 8.89 ប៉ុណ្ណោះ។ ក្រុមហ៊ុន realme បានទម្លាយថា ថាមពលថ្ម ដែលប្រើប្រាស់នៅលើស្មាតហ្វូននេះមានកម្រ៉ាស់ 6.48mm ហើយអាចធ្វើជាង Powerbank សម្រាប់សាកទៅកាន់ស្មាតហ្វូនផ្សេងបានទៀតផង។

ខណៈដែល realme នៅមិនទាន់មានការទម្លាយពីលក្ខណៈសម្បត្តិស្មាតហ្វូននេះនៅឡើយនោះ ថ្មីៗនេះមានការបង្ហោះនៅលើ Weibo ថា ស្មាតហ្វូនជំនាន់ថ្មីនេះ នឹងដំណើរការនៅលើបន្ទះឈីប MediaTek Dimensity 7300 រ៉េម 12GB និងមានអង្គចងចាំទំហំ 256GB។ ស្មាតហ្វូននេះ នឹងមានអេក្រង់ទំហំ 6.7 អ៊ីង រត់នៅលើស្បែកកម្មវិធី realme UI 6.0 ផ្អែកជាមួយនិង Android 15។

ក្រឡេកមកមើល realme Chill Fan វិញ គឺមានការរតម្លើងនូវប្រព័ន្ធត្រជាក់ចំនួន 3 និងមានបន្ទះទប់កំដៅទំហំ 7,700mm2 vapor chamber ដែលជួយអោយស្មាតហ្វូននេះកាន់តែត្រជាក់។ ស្មាតហ្វូននេះអាចរត់បានជាមួយនិងកម្រិតសីតុណ្ហភាព 6°C ទៀតផង។ Chill Fan Phone នេះមើលទៅដូចគ្នាជាមួយ realme GT7 series និងមានខ្នងក្រោយឌីស្សញជាមួយនិងIseSense Ultra ដែលអាចប្តូរពីពណ៌សទៅពណ៌ខៀវនៅពេលដែលស្មាតហ្វូននេះត្រជាក់។ ស្មាតហ្វូនទាំងពីរនេះ គឺស្ថិតនៅក្នុងជាគំរូប៉ុណ្ណោះ មិនទាន់ដឹងថា នឹងមានលក់នៅលើទីផ្សរពេលណានោះទេ។