អេក្រង់ កាមេរ៉ា និងពេលវេលានៃការប្រកាសចេញ Honor 500 Series ត្រូវបានទម្លាយហើយ!

ក្រុមហ៊ុន Honor បានត្រៀមខ្លួននៅក្នុងការប្រកាសចេញនូវស្មាតហ្វូនជាច្រើននៅមុនដាច់ឆ្នាំ 2025 នេះ។ យោងតាមរបាយការណ៍ជាច្រើនបានទម្លាយថា ស្មាតហ្វូន Honor Magic 8 នឹងបង្ហាញខ្លួនជាផ្លូវការណ៌នៅក្នុងខែតុលាខាងមុខនេះហើយ។ បន្ថែមពីនេះ ស្មាតហ្វូនជំនាន់ថ្មី Honor GT 2 Series ក៏អាចនឹងបង្ហាញខ្លួន បន្ទាប់ពីការប្រកាសស្មាតហ្វូនជំនាន់ថ្មី Magic 8 Series នៅក្នុងប្រទេសចិនរួចរាល់ផងដែរ។ នៅពេលនេះ យោងតាមការបែកធ្លាយថ្មីមួយ បានអះអាងថា ស្មាតហ្វូន Honor 500 series ក៏អាចនឹងបង្ហាញខ្លួននៅឆ្នាំនេះផងដែរ។

គួរបញ្ជាក់ថា កាលពីខែមិថុនា ឆ្នាំ 2025 កន្លងទៅនេះ ក្រុមហ៊ុន Honor បានបង្ហាញស្មាតហ្វូន Honor 400 និង 400 Pro នៅក្នុងប្រទេសចិន។ ស្មាតហ្វូននេះ គឺមានភាពខុសប្លែកពី Global Versions ដោយស្មាតហ្វូន Chinese version មានអេក្រង់ទំហំ 6.55-អ៊ីង និងមានកាមេរ៉ាគោលទំហំ 200MP។ យោងតាមការបញ្ជាក់ចេញពីអ្នកទម្លាយ Digital Chat Station បានអោយដឹងថា ស្មាតហ្វូនជំនាន់ទាំងពីរនេះ គឺស្ថិតនៅក្រោមត្រកូលស្មាតហ្វូន Honor 500 Series ដែលនឹងបង្ហាញខ្លួននៅចុងឆ្នាំ 2025 នេះ។

ខណ:ដែលឈ្មោះផ្លូវការបស់ស្មាតហ្វូននេះមិនទាន់បានបញ្ជាក់នៅឡើយទេនោះ ស្មាតហ្វូននេះត្រូវបានគេដឹងថា គឺជា ស្មាតហ្វូន Honor 500 និង Honor 500 Pro រួចហើយ។ ស្មាតហ្វូនម៉ូដែលថ្មីនេះ ត្រូវបានគេមើលឃើញថា នឹងមានការឌីស្សាញថ្មី ដែលមានការជម្រុញពីរូបរាងរបស់ស្មាតហ្វូន iPhone ផងដែរ។ ស្មាតហ្វូន Honor 500 នេះ នឹងផ្តោតទៅលើរូបរាងស្លីម និងទម្ងន់ស្រាលក្នុងការប្រើប្រាស់ ហើយវាមានអេក្រង់ទំហំ 6.5 អ៊ីង និងមានកាមេរ៉ាគោលទំហំ 200MP។ ស្មាតហ្វូននេះអាចនឹងបង្ហាញខ្លួននៅក្នុងខែធ្នូ ឆ្នាំនេះ។

ទាក់ទងស្មាតហ្វូនថ្មីនេះ អ្នកទម្លាយ DCS ក៏បានចែកចាយនូវគំរូរបស់ Honor GT 2 ដែលមានអេក្រង់ទំហំ 6.83 អ៊ីង ផងដែរ។ ស្មាតហ្វូនដែលមានអេក្រង់ទំហំ 6.83 អ៊ីង នេះ អាចនឹងមានការបំពាក់នូវបន្ទះឈីប Snapdragon 8 Gen 5 ឬ Snapdragon 8 Elite SoC ខណៈពេលដែលស្មាតហ្វូន GT 2 Pro អាចនឹងមានបន្ទះឈីប Snapdragon 8 Elite 2 ។ តាមការបញ្ជាក់នៅក្នុងរបាយការណ៍ថ្មីនេះ បានអោយដឹងថា ស្មាតហ្វូន GT 2 នេះ អាចនឹងមានថាមពលថ្មទំហំ 8,800mAh រ៉េមទំហំ 24GB និងម៉េមូរីទំហំ 1TB ។

អ្នកទម្លាយ DCS បានបន្ថែមថា ស្មាតហ្វូន Honor Power 2 អាចនឹងបង្ហាញខ្លួននៅក្នុងត្រីមាសទី 1 ឆ្នាំ 2026 ខាងមុខនេះ ជាមួយនឹងថាមពលថ្មធំមិនធម្មតានោះទេ។ នៅក្នុងរបាយការណ៍ជាច្រើន បានទម្លាយថា ស្មាតហ្វូន Honor Power 2 នេះ នឹងមានអេក្រង់ទំហំ 6.79 អ៊ីង បន្ទះឈីប Dimensity 8500 chipset និងមានថាមពលថ្មទំហំ 10,000mAh ៕