នៅពេលនេះ ក្រុមហ៊ុន Samsung បានចេញមកបញ្ជាក់អំពីព្រឹត្តិការណ៍ Galaxy Event របស់ខ្លួននៅថ្ងៃទី 4 ខែកញ្ញាខាងមុខនេះហើយ ដែលកម្មវិធីនេះ គឺធ្វើឡើងនៅមុនព្រឹត្តិការណ៍ IFA 2025 នៅក្នុងទីក្រុងប៊ែកឡាំង។ តាមការបញ្ជាក់ពីក្រុមហ៊ុនបានអោយដឹងទៀតថា ព្រឹត្តិការណ៍នេះ នឹងធ្វើការផ្សាយផ្ទាល់អនឡាញចាប់ពីម៉ោង 11:30 AM CEST (3:00 PM IST) នៅលើវេបសាយ Samsung.com និង YouTube។ ដូចអ្វីដែលបានរំពឹងទុកអញ្ចឹង Galaxy AI ក៏អាចនឹងក្លាយជាផ្នែកមួយដ៏សំខាន់នៃព្រឹត្តិការណ៍សម្ភោធន៍នេះផងដែរ។
.jpg)
សម្រាប់ផលិតផលថ្មីដែលពិសេសមួយនៅក្នុងព្រឹត្តិការណ៍នេះ គឺការបង្ហាញវត្តមានរបស់ស្មាតហ្វូនជំនាន់ថ្មី Galaxy S25 FE ដែលមានការបែកធ្លាយនៅលើពាក្យចចាមអារ៉ាម និងវិញ្ញាបនបត្រជាច្រើនរួចមកហើយ។ បើមើលទៅលើបញ្ជី Google Play Console វិញ គឺបានបង្ហាញថា ស្មាតហ្វូននេះ គឺមានលេខកូដ SM-S731B ដែលមានបន្ទះឈីប Exynos 2400 និងរ៉េមទំហំ 8GB និងមានអេក្រង់កម្រិត FHD+។ ស្មាតហ្វូនជំនាន់ថ្មីនេះ មានថាមពលថ្មទំហំ 4,900mAh ជាមួយនឹង 45W fast charging។ សម្រាប់តម្លៃរបស់ស្មាតហ្វូននេះ អាចនឹងប្រហែលជា $649 ដែលបានធ្វើអោយស្មាតហ្វូននេះ បានក្លាយជាស្មាតហ្វូនដែលមានតម្លៃសមរម្យនៅក្នុងត្រកូល S25 ផងដែរ។
នៅក្នុងព្រឹត្តិការណ៍ខាងលើនេះ ក្រុមហ៊ុន Samsung ក៏អាចនឹងមានការប្រកាសចេញវត្តមានស្មាតហ្វូន Galaxy Tab S11 Series ដែលមានអេក្រង់ទំហំ 11 អ៊ីង និងម៉ូដែលមួយទៀត Ultra version មានទំហំ 14.6 អ៊ីង។ ក្រុមហ៊ុន Samsung នឹងបំពាក់នូវបន្ទះឈីប MediaTek Dimensity 9400+ ដែលជា upgrade version នៃបន្ទះឈីប Dimensity 9300+។ ស្មាតហ្វូន Galaxy S25 FE និង Galaxy Tab S11 នេះ នឹងបង្ហាញខ្លួនជាមួយនឹងប្រព័ន្ធប្រតិបត្តិការ Android 16 និង One UI 8 ។ ក្រុមហ៊ុន Samsung មិនទាន់ប្រកាសជាផ្លូវការនូវឈ្មោះនៃឧបករណ៍ដែលនឹងបង្ហាញខ្លួននៅក្នុងព្រឹត្តិការណ៍ខាងមុខនេះទេ ប៉ុន្តែវានឹងផ្តោតខ្លាំងទៅលើបច្ចេកវិទ្យា AI នោះទេ៕
