រោងចក្រតម្លើងរថយន្ត BYD ដំបូងនៅប្រទេសកម្ពុជា តម្លៃ 32 លានដុល្លារ គ្រោងនឹងផ្តើមដំណើរការចុងឆ្នាំ 2025

ស្របពេលដែលសន្ទុះនៃការលក់រថយន្តអគ្គិសនីរបស់ខ្លួនមានការកើនឡើងទ្វេរដងក្នុងទីផ្សារប្រទេសកម្ពុជា ក្រុមហ៊ុន BYD គ្រោងបង្កើនបណ្តាញលក់រថយន្តរបស់ខ្លួនចំនួន 13 Showroom បន្ថែមទៀតនៅមុនដំណាច់ឆ្នាំ 2025 នេះ។  BYD គ្រោងនឹងបង្កើនបណ្តាញលក់របស់ខ្លួនទ្វេដងនៅក្នុងប្រទេសកម្ពុជាក្នុងឆ្នាំនេះ ដោយសារតែរោងចក្រដំឡើងរថយន្តដំបូងរបស់ខ្លួនត្រៀមបើកប្រតិបត្តិការផ្លូវការណ៍ក្នុងត្រីមាសទី 4 ឆ្នាំនេះ។ រោងចក្រដំបូងរបស់ BYD ក្នុងប្រទេសកម្ពុជា មានសមត្ថភាពផលិតរថយន្តអគ្គិសនីថ្មីដំណាក់កាលដំបូងបានចំនួន 10,000 គ្រឿងក្នុងមួយឆ្នាំ។

រោងចក្រដំឡើងរថយន្ត BYD ដំបូងក្នុងប្រទេសកម្ពុជា ឬហៅថា CKD មានទីតាំងស្ថិតនៅតំបន់សេដ្ឋកិច្ចពិសេសក្រុងព្រះសីហនុ ត្រូវបានបើកការដ្ឋានសាងសង់នាអំឡុងខែមេសា ឆ្នាំ 2025 នៅលើផ្ទៃដីសរុប 12 ហិតា និងចំនាយថវិកាសាងសង់សរុប 32 លានដុល្លារអាមេរិច ហើយការសាងសង់នឹងបញ្ចប់នាដើមខែ វិច្ឆកា ឆ្នាំ 2025។

ទន្ទឹមនឹងនេះ BYD ត្រៀមធ្វើការប្រកាសចេញលក់រថយន្តស៊េរីថ្មីចំនួនពីរម៉ូដែល គឺ BYD Sealion 7 SUV និង BYD M9 MPV ក្នុងទីផ្សារប្រទេសកម្ពុជា ក្នុងខែតុលា ឆ្នាំ 2025 ផងដែរ បន្ទាប់ពីម៉ូដែល Sealion 5 និង Atto 2 កាលពីខែមីនា។

ក្រុមហ៊ុនផលិតរថយន្តអគ្គិសនីឈានមុខងារគេរបស់ប្រទេសចិនមួយនេះ មានគោលបំណងពង្រីកវត្តមានរបស់ខ្លួនកាន់តែខ្លាំងក្នុងទីផ្សារកម្ពុជាតាមរយះការបង្កើន Showroom បន្ថែមចំនួន 13 ទីតាំង និងមជ្ឈមណ្ឌលផ្តល់សេវាកម្មអតិថិជនចំនួន 6 កន្លែងទៀតនៅមុនដំណាច់ឆ្នាំ 2025។

បច្ចុប្បន្ន BYD កំពុងប្រតិបត្តិការ Showroom លក់របស់ខ្លួនចំនួន 7 ទីតាំង និងមជ្ឈមណ្ឌលសេវាកម្មក្រោយការលក់តែមួយ 1 ប៉ុណ្ណោះនៅទីក្រុងភ្នំពេញ។ គួរកត់សំគាល់ថា សន្ទុះនៃការលក់រថយន្តអគ្គិសនីរបស់ BYD ក្នុងទីផ្សារប្រទេសកម្ពុជា មានការកើនឡើងខ្លាំងក្នុងឆ្នាំ 2025 នេះ ហើយកាលពីថ្ងៃទី 23 ខែ សីហា ថ្មីៗនេះ BYD បានប្រារព្ធព្រឹត្តិការណ៍ប្រគល់រថយន្តគ្រឿងទី 2,500 ដល់អតិថិជនរបស់ខ្លួន៕