ជម្រើសពណ៌ និងទំហំផ្ទុកនៅលើ Huawei Mate XTs មានការបញ្ជាក់ច្បាស់ហើយ!

ក្រុមហ៊ុនបច្ចេកវិទ្យាយក្សរបស់ប្រទេសចិន Huawei នឹងធ្វើការប្រកាសចេញស្មាតហ្វូនអេក្រង់បត់បីបត់ជំនាន់ថ្មីរបស់ខ្លួន គឺ Mat XTs នៅថ្ងៃទី 4 ខែកញ្ញា ម៉ោង 2:30pm នៅក្នុងប្រទេសចិន។ ស្មាតហ្វូនអេក្រង់បត់បីបត់ជំនាន់ថ្មីត្រូវបាន Huawei ហៅថា Mate XTs Extraordinary Master។ ហើយនៅថ្ងៃនេះដែរ Huawei បានបញ្ជាក់ពីជម្រើសពណ៌ និងទំហំផ្ទុកដែលមានសម្រាប់ស្មាតហ្វូន Triple-Fold របស់ខ្លួនជាផ្លូវការណ៍។

តាមការបញ្ជាក់ពីក្រុមហ៊ុនបានឲ្យដឹងថា Huawei Mate XTs Extraordinary Master គឺមានជម្រើសពណ៌ចំនួន 4 មានដូចជា ពណ៌ក្រហម ស ខ្មៅ និងពណ៌ស្វាយថ្មី។ ហើយសម្រាប់ទំហំផ្ទុកទិន្នន័យស្រាប់វិញ គឺមានចាប់ពី 256GB/512GB ដល់ 1TB ជាមួយរ៉េមទំហំ 16GB។

នៅថ្ងៃនេះ វេលាម៉ោង 10:08AM, Huawei ក៏បានបើកទទួលការកក់មុន pre-reservations ស្ងាត់ៗ សម្រាប់ Huawei Mate XTs Extraordinary Master ថែមទៀតផង។ បើតាមរូបភាពដែលកាន់បង្ហាញដោយតារាសម្តែងល្បីឈ្មោះរបស់ប្រទេសចិន Yang Mi បានបង្ហាញពី Mate XTs Extraordinary Master ដែលមានពណ៌ស្វាយស្រស់ រួមជាមួយនឹងប៊ិច Stylus ដែលបញ្ជាក់យ៉ាងច្បាស់ថា ស្មាតហ្វូនអេក្រង់បត់បីបត់ជំនាន់ថ្មីនេះ គឺគាំទ្រការប្រើប្រាស់ជាមួយ Stylus Pen បាន។

សម្រាប់ការឌីស្សាញរូបរាងខាងក្រៅរបស់ Mate XTs Extraordinary Master គឺមិនខុសពីជំនាន់ដំបូងរបស់វានោះទេ ដោយក្នុងនោះមាននូវកញ្ចប់កាមេរ៉ាលើខ្នងខាងក្រោយដែលមានបង្កប់ដោយលែនកាមេរ៉ាបួនគ្រាប់ដែលមានដូចជា Main lens/ Periscope lens និង wide-ultra-angle lens ជាដើម ហើយសែនស័រកាមេរ៉ាបួនគ្រាប់ ក៏នឹងគាំទ្រនូវមុខងារ red maple ដើម្បីជួយបង្កើនកម្រិតគុណភាពទឹកពណ៌រូបភាពថែមទៀតផង។

Huawei Mate XTs Extraordinary Master នឹងដំណើរការនៅលើបន្ទះឈីប Kirin 9020 ដែលមានអង្គ CPU 1+3+4 ជាមួយល្បឿន 2.5GHz+2.15GHz+1.6GHz។ បន្ទះឈីបនេះភ្ជាប់មកជាមួយនឹងអង្គ GPU ស៊េរី Maleoon 920-840MHz និងគាំទ្រនូវប្រព័ន្ធភ្ជាប់ផ្កាយរណប satellite communication ផងដែរ៕