ឡានអគ្គិសនី SUV ស៊េរីថ្មី តម្លៃជាង 2 ម៉ឺនទេ តែអាចបើកបរបានចម្ងាយដល់ទៅ 901km

នៅថ្ងៃនេះ Voyah ដែលជាក្រុមហ៊ុនបុត្រសម្ព័ន្ធរបស់ Dongfeng Motor បានប្រកាសចេញនូវអគ្គិសនី SUV ស៊េរីថ្មី Zhiyin SUV ដែលមានការបំពាក់នូវប្រព័ន្ធបើកបរឆ្លាតវៃរបស់ក្រុមហ៊ុន Huawei មានតម្លៃ $28,450 ដុល្លារ។ ឡានស៊េរីថ្មីនេះតួខ្លួនប្រវែង 4,810mm ទទឹងប្រវែង 1,900mm និងកំពស់ 1,636mm ខណៈដែលគម្លាតកង់មុខក្រោយ គឺមានប្រវែង 2,925mm។ ប្រៀបធៀបជាមួយនិងម៉ូដែលមុន គឺមានប្របវែង 4,725mm, ទទឹង 1,900mm និងកំពស់ 1,636 ខណៈដែលគម្លាតកង់មុខក្រផយមានប្រវែង 2,900mm។

សម្រាប់ការអាប់ដែតសំខាន់ទៅលើឡានថ្មីនេះ គឺមានដូចជា ការបំពាក់នូវប្រព័ន្ធបើកបរឆ្លាតវៃ Qiankun ADS 4 smart driving system របស់ Huawei និង HarmonySpace 5 cockpit system។ នៅក្នុងនោះក៏មានសិនស័រជំនួយការបើកបរឆ្លាតវៃ Roof-Mounted 192-Channel LiDAR ក៏ដូចជាជំនួយការចូលចតស្វ័យប្រវត្តិជាដើម។  

ឡានអគ្គិសនី SUV ស៊េរីថ្មីថ្មីនេះ មានជម្រើសម៉ូទ័រមួយ គាំទ្រដោយអាគុយទំហំ 81kWh និងទំហំ 112 kWh ដែលអាចបើកបរបានចម្ងាយ 650km និង 901km តាមស្តង់ដារ CLTC។ ចំពោះម៉ូដែលបំពាក់នូវម៉ូទ័រខាងក្រោយមួយ គឺមានម្លាំង 230kW (309 សេះ) និងមានកម្លាំងរមួល 395Nm អាចបង្កើនល្បឿនពី 0 ទៅ 100 km/h ស៊ីពេល 6.8 វិនាទី ខណៈដែល AWD គឺមានបន្ថែមនូវម៉ូទ័រខាងមុខកម្លាំង 175kW អាចបង្កើតល្បឿពី 0-100km/h ស៊ីពេលត្រឹមតែ 4.3 វិនាទីប៉ុណ្ណោះ។ ឡានថ្មីនេះ ដំណើរការលើប្រព័ន្ធសាក 5C fast charging ដែលសាកត្រឹម 3 នាទី អាចជិះបាន 100km។

គួរបញ្ជាក់ថា បន្ទាប់ពីការប្រកាសជាផ្លួវការណ៌ ក្រុមហ៊ុននេះ បានបញ្ជាក់ថា ត្រឹមតែរយៈពេល 12 នាទីប៉ុណ្ណោះ ឡានអគ្គិសនី SUV ស៊េរីថ្មី មានការបញ្ជាទិញភ្លាមៗដល់ទៅជាង 3,000 គ្រឿង។