ប្រាក់ចំណូល Huawei នៅឆមាសទី 1 ឆ្នាំ 2025 មានការកើនឡើង 4%

នៅថ្ងៃនេះ ក្រុមហ៊ុន Huawei បានប្រកាសអំពីរបាយការណ៍នៃប្រាក់ចំណេញសម្រាប់ឆមាសទី 1 ឆ្នាំ 2025 កន្លងទៅនេះ ដោយក្រុមហ៊ុនបច្ចេកវិទ្យាចិនមួយនេះ ត្រូវបានគេមើលឃើញថា មាននូវកំណើនប្រាក់ចំណូលដល់ទៅ 4% ដែលនេះគឺជាសញ្ញាល្អមួយសម្រាប់ក្រុមហ៊ុននេះនៅក្នុងប្រជែងសម្រាប់ទីផ្សារស្មាតហ្វូន។ បើមើលតាមព័ត៌មានលម្អិតនេះ ក្រុមហ៊ុន Huawei រកប្រាក់ចំណូលបាន 427 ពាន់លានយ៉ន់ ស្មើរនឹង $59.7 ពាន់លានដុល្លារនៅក្នុងឆមាសទី 1 ឆ្នាំ 2025 នេះ កើនឡើង 4% នៅក្នុងប្រាក់ចំណូលបើធៀបទៅនឹងឆ្នាំមុននេះ។

ការទទួលបាននូវលទ្ធផលល្អនេះគឺដោយសារតែការលក់នូវស្មាតហ្វូន Flagship នៅក្នុងរយៈពេល 2 ត្រីមាសឆ្នាំ 2025 នេះ។ ក្រុមហ៊ុន Huawei បានលក់ស្មាតហ្វូនបានជិត 26.6 លានគ្រឿង នៅជុំវិញពិភពលោកសម្រាប់ឆមាសទី 1 ឆ្នាំ 2025 នេះ។ វាមានការកើនឡើង 1.7% ធៀបទៅនឹងឆ្នាំមុននេះ។ ស្មាតហ្វូន Pura 80 Series បានជាផ្នែកមួយដែលបង្កើនទៅលើការកើនឡើងនៃប្រាក់ចំណូលផងដែរ។ គួរបញ្ជាក់ថា ក្រុមហ៊ុន Huawei ទើបតែបង្ហាញស្មាតហ្វូន Flagship នៅថ្ងៃទី 10 ខែកក្កដានេះដែលមានកាមេរ៉ា Switchable Dual-Telephoto ជាមួយនឹង EMUI 15 និងមុខងារជាច្រើនទៀតផង។

បន្ថែមពីនេះ នៅលើស្មាតហ្វូននេះ ក៏មានការ Upgrade ច្រើនទៅលើស្មាតហ្វូនជំនាន់ថ្មីនេះ ដើម្បីទាក់ទាញអ្នកប្រើប្រាស់ជាច្រើននៅលើទីផ្សារ។ បន្ថែមពីនេះ អ្នកប្រើប្រាស់ជាច្រើន ក៏ផ្លាស់ប្តូរទៅប្រើប្រាស់ស្មាតហ្វូនថ្មីនេះដើម្បីទទួលបាននូវ software version ចុងក្រោយបំផុតថែមទៀតផង។ ខណៈពេលដែលការនាំចេញ 95% គឺសម្រាប់ទីផ្សារស្មាតហ្វូននៅចិននោះ ក្រុមហ៊ុននេះ គឺទទួលបាននូវលទ្ធផលយ៉ាងល្អសម្រាប់ឆមាសទី 1 ឆ្នាំ 2025 នេះ។ ពេលនេះ ក្រុមហ៊ុន Huawei ក៏ត្រៀមបញ្ចេញស្មាតហ្វូន Mate 80, Mate XTs និងជាច្រើនទៀត ដើម្បីបង្កើនទៅលើប្រាក់ចំណូលរបស់ខ្លួនសម្រាប់ឆមាសទី 2 ឆ្នាំ 2025 នេះ៕