យោងតាមព័ត៌មានថ្មីនៅថ្ងៃនេះ បានបង្ហាញថា ក្រុមហ៊ុន Xiaomi នឹងមិនរង់ចាំបន្តទៀតរហូតដល់ឆ្នាំ 2026 នោះទេ នៅក្នុងការប្រកាសចេញនូវស្មាតហ្វូនលំដាប់ថ្នាក់ប្រណិតចុងក្រោយបំផុតរបស់ខ្លួន។ ផ្អែកទៅលើការបែកធ្លាយថ្មីមួយចេញពីប្រទេសចិន នៅពេលនេះ បានអោយដឹងថា ស្មាតហ្វូនជំនាន់ថ្មី Xiaomi 17 Ultra អាចនឹងបង្ហាញខ្លួននៅក្នុងខែធ្នូខាងមុខនេះហើយ ដែលនេះនឹងក្លាយជាការផ្លាស់ប្តូរដ៏ធំពីកាលបរិច្ឆេទជាធម្មតានៃការបង្ហាញស្មាតហ្វូនថ្មីរបស់ក្រុមហ៊ុននេះ។
មើលទៅលើពាក្យចចាមអារ៉ាមថ្មីមួយចេញពីអ្នកទម្លាយ “Smart Pikachu” ដែលបានបង្ហោះនៅលើ Weibo បានអោយដឹងថា ក្រុមហ៊ុន Xiaomi ត្រៀមបង្ហាញស្មាតហ្វូន Xiaomi 17 Ultra នៅក្នុងខែនេះហើយ។ ទៅលើការ Pre-order ស្មាតហ្វូននេះ គឺចាប់ពីថ្ងៃទី 15 ខែធ្នូដល់ថ្ងៃទី 25 ខែធ្នូខាងមុខនេះ ដែលមានន័យថា អតិថិជននៅក្នុងប្រទេសចិនអាចនឹងទទួលបានស្មាតហ្វូននេះមុនដាច់ឆ្នាំ 2025។ បើមើលទៅលើស្មាតហ្វូន Xiaomi 14 Ultra និង 15 Ultra ដែលបង្ហាញខ្លួនមុននេះ ជាធម្មតា គឺតែងតែប្រកាសនៅចុងខែកុម្ភៈ។ គួរបញ្ជាក់ផងដែរថា នៅក្នុងឆ្នាំ 2025 នេះ ក្រុមហ៊ុន Xiaomi ធ្លាប់ត្រូវបានគេទម្លាយថា គឺមានគោលចង់ផ្លាស់ប្តូរទៅលើពេលវេលារបស់ខ្លួន។
ជាមួយនិងវត្តមានស្មាតហ្វូន Xiaomi 17 Ultra នេះ នឹងមានបំពាក់នូវកាមេរ៉ាគោលដែលមានសិនស័រទំហំ 1-អ៊ីង រួមជាមួយនឹងបច្ចេកវិទ្យាកម្រិតខ្ពស់ជាច្រើនថែមទៀត។ យ៉ាងណាមិញ ការបែកធ្លាយជាច្រើនបញ្ជាក់ថា ស្មាតហ្វូននេះ អាចនឹងបំពាក់នូវ 200MP telephoto ដែលដូចទៅនឹងស្មាតហ្វូន vivo X200 Ultra ផងដែរ។ ចំពោះលក្ខណៈសម្បត្តិជាច្រើនទៀតរបស់ស្មាតហ្វូននេះ គឺដូចទៅនឹងស្មាតហ្វូនត្រកូល Xiaomi 17 ផងដែររួមមានបន្ទះឈីប Snapdragon 8 Elite Gen 5 ជាដើម។
និយាយពីតម្លៃរបស់ស្មាតហ្វូននេះអាចនឹងប្រហែលទៅនឹងស្មាតហ្វូន Xiaomi 15 Ultra អញ្ចឹង។ តាមប្រភពជាច្រើន បានបញ្ជាក់ថា ការប្រកាសទីផ្សារសកលរបស់ស្មាតហ្វូនថ្មីនេះ គឺអាចនឹងធ្វើឡើងនៅក្នុងខែកុម្ភៈខាងមុខនេះជាពិសេសក្នុងព្រឹត្តិការណ៍ MWC 2026 ខាងមុខនេះ៕
