តារាសម្តែង Andy Lau ត្រូវបានជ្រើសតាំងជាតារាតំណាងស្មាតហ្វូនជំនាន់ថ្មី Mate XT Ultimate Design

ក្រុមហ៊ុន Huawei បានបង្កើតនូវភាពភ្ញាក់ផ្អើលថ្មីទៀតហើយទាក់ទងជាមួយនិងស្មាតហ្វូនអេក្រង់បត់បាន 3 តង់របស់ខ្លួន ដោយនៅថ្ងៃនេះ ក្រុមហ៊ុននេះបានធ្វើការចែកចាយរូបភាពផ្លូវការដំបូងបំផុតរបស់ស្មាតហ្វូន Mate XT tri-fold phone ថ្មីទៀតហើយ។ បើមើលទៅលើការឌីស្សាញរូបរាងរបស់ស្មាតហ្វូនអេក្រង់បត់ 3 តង់នេះ គឺមានការឌីស្សាញខ្នងក្រោយស្រដៀងគ្នាជាមួយនិងស្មាតហ្វូនម៉ូដែល Mate 60 RS Ultimate Design អញ្ចឹងដែរ។

គួរបញ្ជាក់បន្ទាប់ពីមានការរង់ចាំអស់រយៈពេលជាយូរមកហើយនោះ នៅថ្ងៃនេះ ក្រុមហ៊ុន Huawei បានបង្ហាញចេញនូវរូបភាពផ្លូវការណ៌ជាលើកដំបូងរបស់ស្មាតហ្វូនអេក្រង់បត់បាន 3 តង់ Mate XT tri-foldable នេះហើយ តាមរយៈរូបភាពនេះ គឺមានការបង្ហាញនូវខ្នងក្រោយរបស់ស្មាតហ្វូននេះយ៉ាងច្បាស់។ ការឌីស្សាញនេះត្រូវបានគេបញ្ជាក់ថា គឺមានការបំផុសគំនិតចេញពីស្មាតហ្វូនម៉ូដែលពិសេស Ultimate Design branding របស់ Mate 60 RS ដោយប្រើប្រាស់នូវម៉ូឌុលកាមេរ៉ាផុសចេញពីតួពីមើលទៅប្រណិតមែនទែន។ 

នៅលើម៉ូឌុលកាមេរ៉ាស្មាតហ្វូនអេក្រង់បត់ 3 តង់នេះ គឺមានការតម្លើងនូវសិនស័រ 3 គ្រាប់រួមជាមួយនិង Periscope Sensor ផងដែរ។ កាមេរ៉ានេះមានការគាំទ្រនូវបច្ចេកវិទ្យាកាមេរ៉ា XMAGE branding ហើយនិងមានអំពូល LED Flash បញ្ឈរនៅកណ្តាលនៃកាមេរ៉ាផងដែរ។ ខ្នងក្រោយរបស់ស្មាតហ្វូននេះ មើលទៅគឺមានការឌីស្សាញចេញពីស្បែក ហើយក៏មានការបង្ហាញខ្លួនជាមួយនិងតារាល្បីរបស់ចិនទៀតផង ស្មាតហ្វូននេះ មានទំហំ និងមានកម្រ៉ាស់ស្តើង ហើយនិងមានទម្ងន់ស្រាល។ ស្មាតហ្វូននេះអាចនឹងមានកម្រ៉ាស់ត្រឹមតែ 5mm ប៉ុណ្ណោះ។ 

ជាមួយនិងការបញ្ចេញនូវវីដេអូថ្មីនៅថ្ងៃនេះ ក្រុមហ៊ុន Huawei ក៏បានប្រកាសថា លីតៅហ័រ ឬ Andy Lau គឺជាតារាតំណាងរបស់ស្មាតហ្វូនជំនាន់ថ្មី Mate XT Ultimate Design triple foldable phone នេះផងដែរ។ 

ស្មាតហ្វូនអេក្រង់បត់បាន 3 តង់ Mate XT tri-foldable នឹងមានអេក្រង់ទំហំ 10-អ៊ីង ដែលធំជាងពាក់កណ្តាល ឬ 50% ប្រៀបធៀបជាមួយនិងស្មាតហ្វូនអេក្រង់បត់ធម្មតា។ ស្មាតហ្វូននេះ នឹងមានជម្រើសពណ៌ត្នោត ក៏ដូចជា golden shades។ ស្មាតហ្វូនថ្មីនេះ អាចនឹងមានតម្លៃ 14,900 យ៉ន់ ហើយនិងមានលក់ចំនួនកំនត់ថែមទៀតផង។