មានការព្យាករណ៍ថា ការលក់រថយន្តអេឡិចត្រូនិច នៅក្នុងប្រទេសចិន នឹងមានការកើនឡើង 50% នៅក្នុងឆ្នាំ 2021 នេះ

យោងតាមរបាយការណ៍ថ្មីមួយបានបញ្ជាក់ថា ការលក់រថយន្តអេឡិចត្រូនិចនៅក្នុងប្រទេសចិន គឺនឹងមានការកើនឡើងរហូតដល់ទៅ 50% នៅឆ្នាំ 2021 នេះ ខណៈដែលនៅក្នុងឆ្នាំ 2020 កន្លងទៅទីផ្សារចិន គឺមានការកើនឡើងត្រឹមតែ 8% ប៉ុណ្ណោះ ។ តាមការបញ្ជាក់នៅក្នុងរបាយការណ៍របស់ Canalys បានអោយដឹងថា ទីផ្សាររបស់ចិន គឺមានការនាំចេញរថយន្តអេឡិចត្រូនិចចំនួន 1.3 លានគ្រឿងកាលពីឆ្នាំមុននេះ។ ដែលនេះ គឺជាតួរលេខដែលគួរអោយចាប់អារម្មណ៍មែនទែន។ 

លោក Chris Jones ដែលជាអ្នកវិភាគរបស់ក្រុមហ៊ុន Canalys បាននិយាយថា “រថយន្តអេឡិចត្រូនិចរបស់ចិន នៅក្នុងទីផ្សារឆ្នាំ 2020 កន្លងទៅ គឺផ្តោតទៅលើរថយន្តចំនួន 2 ម៉ូដែលប៉ុណ្ណោះ គឺរថយន្ត Tesla Model 3 ដែលផលិតនៅក្នុងប្រទេសចិន ដែលនាំមុខគេនៅក្នុងឆមាសទី 1 ឆ្នាំ 2020 និងរថយន្ត Hongguang Mini EV របស់ក្រុមហ៊ុន SGMW ។”

សម្រាប់រថយន្តអេឡិចត្រូនិចចំនួន 1.3 លានគ្រឿង ដែលលក់នៅក្នុងប្រទេសចិន កាលពីឆ្នាំមុននេះ គឺមានចំនួន 41% នៃរថយន្តដែលលក់បាននៅជុំវិញពិភពលោក ស្របពេលដែលសហរដ្ឋអាមេរិក គឹមានចំនួនត្រឹមតែ 2.4% នៃការលក់សរុបនេះ។ លោក Jones បាននិយាយទៀតថា “រថយន្តអេឡិចត្រូនិចពេលនេះ ពិតជាមានតម្រូវការខ្លាំងមែនទែនពីអ្នកប្រើប្រាស់។”

ក្រុមហ៊ុន Canalys បានបញ្ជាក់ថា នៅក្នុងឆ្នាំ 2021 នេះ ទីផ្សាររបស់ចិន នឹងមានការនាំចេញរថយន្តអេឡិចត្រូនិចចំនួន 1.9 លានគ្រឿងដែលនេះ គឺមានការកើនឡើង 51% នៅក្នុងទីផ្សារសកល និងការកើនឡើងចំនួន 9% នៃទីផ្សាររថយន្តអេឡិចត្រូនិច នៅក្នុងទីផ្សាររថយន្តរបស់ចិន។ លោក Sandy Fitzpatrick អនុប្រធានរបស់ក្រុមហ៊ុន Canalys បាននិយាយថា “ចំណែកទីផ្សារនៃការលក់ក្នុងប្រទេសចិនសម្រាប់ឆ្នាំ 2020 នេះគឺមានចំនួន 6.3%។ រថយន្តអេឡិចត្រូនិចជាច្រើន គឺមានការកើនឡើងខ្លាំងមែនទែន។ ប៉ុន្តែក្រុមហ៊ុន Tesla រំពឹងថា នឹងមានការកើនឡើងជាច្រើនទៀតនៅក្នុងប្រទេសចិន៕”