យោងតាមការបញ្ជាក់នៅក្នុងរបាយការណ៍ជាច្រើននាពេលថ្មីៗនេះ បាននិយាយថា ក្រុមហ៊ុន Huawei នឹងដាក់លក់នូវរថយន្តជាច្រើននៅហាង Experience Stores ជាលើកដំបូងបំផុត។ ហើយរថយន្តដំបូងដែលក្រុមហ៊ុន Huawei នឹងដាក់លក់នោះ គឺជាម៉ូឌែល Cyrus SF5 ដែលជារថយន្តឆ្លាតវៃរបស់ក្រុមហ៊ុនចិន Chongqing Xiaokang។
ក្រុមហ៊ុន Chongqing Xiaokang នេះ ក៏បានបង្កើតនូវម៉ូតូអគ្គិសនីផងដែរ។ ក្រុមហ៊ុននេះ បានធ្វើការសហការជាមួយនឹងក្រុមហ៊ុនផលិតជាច្រើនទៀតដើម្បីធ្វើការផលិត និងលក់នូវម៉ូតូផងដែរ។ នៅពេលនេះ វាគឺដល់ពេលសម្រាប់អាជីវកម្មរថយន្តឆ្លាតវៃ។ បើនិយាយអំពីរថយន្ត Cyrus នេះ គឺមិនទាន់ត្រូវបានគេស្គាល់ច្រើននៅក្នុងឧស្សាហកម្មរថយន្តនៅក្នុងប្រទេសចិននោះទេ នេះគឺដោយសារតែក្រុមហ៊ុននេះ មិនសូវមានការចាប់អារម្មណ៍ខ្លាំងនៅលើទីផ្សារ ប៉ុន្តែពេលនេះ ក្រុមហ៊ុន Huawei នឹងធ្វើអោយមានការផ្លាស់ប្តូរជាក់ជាមិនខាន។
ក្រុមហ៊ុន Huawei កំពុងតែប្រែក្លាយនូវម៉ាកយីហោរថយន្ត Cryus ដែលមិនដែលមានអ្នកចាប់អារម្មណ៍អោយក្លាយជាម៉ាកយីហោដែលមនុស្សជាច្រើនចាប់អារម្មណ៍នៅក្នុងពេលតែមួយយប់ប៉ុណ្ណោះ។ នៅក្នុងមួយសប្តាហ៍ដំបូងនៅក្នុង Huawei Mall គឺមានការបញ្ជាទិញរថយន្ត Cyrus SF5 នេះ បានច្រើនជាង 60,00 គ្រឿងផងដរ ដែលនេះ គឺជាឥទ្ធិពលរបស់ក្រុមហ៊ុន Huawei នៅក្នុងទីផ្សាររបស់ចិនដោយចំនួននេះគឺច្រើនជាង 6 ដងនៃការបញ្ជាទិញរថយន្តនេះសរុបកាលពីឆ្នាំ 2020 កន្លងទៅ។
គួរបបញ្ជាក់ថា ក្រុមហ៊ុន Huawei និង Cyrus បានចាប់ផ្តើមសហការគ្នាតាំងតែពីឆ្នាំ 2019 មកម្លេះ។ ក្រុមហ៊ុនទាំងពីរនេះបានធ្វើការសហការគ្នាទៅលើផ្នែកសំខាន់ៗដូចជា motors, MCUs, Hicar, smart cockpits និងផលិតផលជាច្រើនទៀតដែលជាផ្នែកសំខាន់សម្រាប់រថយន្តឆ្លាតវៃនេះ៕
