កាលពីត្រីមាសទី 1 ឆ្នាំ 2019 កន្លងទៅនេះ ក្រុមហ៊ុន vivo បានបង្ហាញនូវក្រុមហ៊ុនបុត្រសម្ព័ន្ធថ្មីរបស់ខ្លួនឈ្មោះហៅថា iQOO នូវឈ្មោះថា “flagship-killer”។ សម្រាប់ម៉ាកយីហោស្មាតហ្វូនថ្មីនេះ គឺមានរយៈពេលត្រឹមតែ 1 ឆ្នាំប៉ុណ្ណោះ ប៉ុន្តែក្រុមហ៊ុននេះក៏ក្លាយជាដៃគូផ្លូវការរបស់ BMW M Motorsport សម្រាប់រដូវកាល 2020 DTM (Deutsche Tourenwagen Masters) ខាងមុខនេះ។ សូមជំរាបថា កន្លងមក ម៉ាកយីហោជាច្រើនរបស់ក្រុមហ៊ុន BBK Electronics គឺមានភាពល្បីល្បាញមែនទែនក្នុងការឧបត្ថម្ភដល់ព្រឹត្តិការណ៍កីឡាជាច្រើនសម្រាប់ការធ្វើទីផ្សាររបស់ខ្លួន។
ជាក់ស្តែងក្រុមហ៊ុន vivo គឺបានធ្វើការឧបត្ថម្ភសម្រាប់ព្រឹត្តិការណ៍ IPL (Indian Premier League) ដ៏ពេញនិយមរបស់ឥណ្ឌាចាប់ពីឆ្នាំ 2015មកម្ល៉េះ។ យ៉ាងណាមិញ ក្រុមហ៊ុននេះក៏មិនអាចសហការបានទៀតទេនៅក្នុងឆ្នាំ 2020 នេះដោយសារតែភាពតានតឹងរវាងប្រទេសឥណ្ឌា និងចិននោះ។ បន្ថែមពីនេះទៀតនោះ ក្រុមហ៊ុននេះ ក៏បោះបង់ចោលនូវភាពជាដៃគូជាមួយនឹង NBA កាលពីឆ្នាំមុននេះផងដែរ ដោយសារតែការតវ៉ានៅហុងកុង។ ប៉ុន្តែក្រុមហ៊ុននេះ នៅតែបន្តក្នុងការឧបត្ថម្ភដល់ព្រឹត្តិការណ៍ FIFA World Cup Qatar 2022 ខាងមុខនេះដដែល។
បើទោះបីជាក្រុមហ៊ុន Vivo បាត់បង់នូវការឧបត្ថម្ភសម្រាប់ព្រឹត្តិការណ៍សំខាន់ៗចំនួន 2 នេះក៏ដោយ ពេលនេះ ក្រុមហ៊ុន iQOO ក៏ចាប់ផ្តើមបង្ហាញខ្លួនក្នុងការឧបត្ថម្ភសម្រាប់ព្រឹត្តិការណ៍អន្តរជាតិវិញហើយ។ក្រុមហ៊ុន iQOO បានសហការជាមួយនឹង BMW M Motorsport សម្រាប់ព្រឹត្តិការណ៍ 2020 DTM league ខាងមុខនេះ។ ក្រុមហ៊ុននេះក៏ប្រហែលជាបង្ហាញនូវវត្តមានរបស់ limited edition iQOO 5 ដែលគ្រោងនឹងបង្ហាញខ្លួនជាផ្លូវការនៅថ្ងៃទី 17 ខែសីហាខាងមុខនេះផងដែរ។
នេះគឺជាស្មាតហ្វូនដំបូងបំផុតរបស់ម៉ាកយីហោនេះដែលទ្រទ្រង់ទៅលើបច្ចេកវិទ្យា 120W FlashCharge technology ។ ក្រុមហ៊ុនផលិតរថយន្តរបស់អាល្លឺម៉ង់នេះក៏នឹងប្រើប្រាស់នូវរថយន្ត “iQOO BMW M4 DTM” នៅក្នុងព្រឹត្តិការណ៍ 2020 DTM league នេះផងដែរ។ ក្រុមហ៊ុន iQOO នៅមិនទាន់ឈានជើងចូលអ៊ឺរ៉ុបនោះទេ។ ជាមួយនឹងការសហការជាមួយនឹងក្រុមហ៊ុន BMW នេះ ម៉ាកយីហោនេះនឹងបង្ហាញខ្លួនឆាប់ៗនេះនៅលើទឹកដីរបស់អ៊ឺរ៉ុបជាក់ជាមិនខាន៕