ពិតជាអស្ចារ្យមែន! Ninebot Gokart Pro Lamborghini Edition គ្រាន់តែប្រកាសដាក់លក់ភ្លាម គឺអស់ពីស្តុកភ្លាមតែម្តង!

នៅក្នុងព្រឹត្តិការណ៍នៃខួបរយៈពេល 10 ឆ្នាំនេះ ក្រុមហ៊ុន Xiaomi បានបង្ហាញនូវផលិតផលថ្មីរបស់ខ្លួនបន្ថែមទៀត នៅក្នុងភាពជាដៃគូជាមួយនឹងក្រុមហ៊ុន Lamborghini នោះគឺ  Ninebot Gokart Pro Lamborghini edition។

ផលិតផលថ្មីនេះ គឺមានពណ៌លឿងយ៉ាងទាក់ទាញ ហើយវាក៏មានឡូហ្គោសញ្ញារបស់ក្រុមហ៊ុន Lamborghini នៅលើតួខ្លួនរបស់វាដូចទៅនឹងម៉ូឌែល  Gokart Pro ដែលប្រកាសបង្ហាញខ្លួននៅដើមឆ្នាំនេះផងដែរ។ 

រថយន្ត Gokart នេះ ដាក់លក់នៅក្នុងប្រទេសចិននៅលើគេហទំព័រ Jingdong ជាមួយនឹងតម្លៃ 9999 yuan (~$1451) ។ ពេលនេះ រថយន្ត  Gokart នេះលក់អស់ពីស្តុកហើយផងដែរ។ 

រថយន្ត Gokart គឺជាផលិតផលមួយដែលជាកិច្ចសហការរវាងក្រុមហ៊ុន Ninebot-Segway ដែលជាក្រុមហ៊ុនកម្មសិទ្ធិរបស់ក្រុមហ៊ុន Xiaomi និងក្រុមហ៊ុនផលិតរថយន្តដ៏ល្បីឈ្មោះ Lamborghini ។ វាមានការប្រើប្រាស់នូវពណ៌លឿង និងមានការឌីស្សាញជាទម្រង់រថយន្តដ៏អស្ចារ្យបំផុត។ 

រថយន្តនេះ មានការប្រើប្រាស់នូវកង់ស្ព័រ។ រថយន្ត Gokart Pro Lamborghini edition នេះគឺមានគែមលោហធាតុដ៏រឹងមាំជាមួយនឹងការទ្រទ្រង់នូវទម្ងន់ដល់ទៅ 100 គីឡូក្រាមដែលផ្តល់នូវភាពរឹងមាំក្នុងការប្រើប្រាស់ និងការបើកបរនៅក្នុងផ្លូវដែលមានល្បឿនលឿន។  សម្រាប់រថយន្តនេះគឺប្រើប្រាស់នូវអគ្គិសនីជាមួយនឹងកម្លាំងថាមពល 432Wh។ 

តាមការបញ្ជាក់របស់ក្រុមហ៊ុន Xiaomi បានអោយដឹងថា រថយន្ត NineBot GoKart Pro Lamborghini edition នេះគឺជារថយយន្ត ដែលសមត្ថភាពក្នុងការបញ្ចេញនូវសំឡេងដូចទៅនឹងម៉ាស៊ីនរថយន្តប្រណាំងដ៏ឆ្លាតវៃផងដែរ។ រថយន្តនេះអាចបើកបរនៅក្នុងល្បឿន 40 គីឡូម៉ែត្រក្នុងមួយម៉ោង៕