ប៉ុន្មានឆ្នាំចុងក្រោយនេះឃើញថាទីផ្សាររថយន្តអគ្គិសនីបាននឹងកំពុងរីកចម្រើនខ្លាំងមែនទែន ដែលស្របទៅនឹងនិន្នាការថ្មីដែលពិភពលោកបាននឹងកំពុងធ្វើការប្តូរពីការប្រើប្រាស់រថយន្តដើរដោយថាមពលឥន្ធនៈមកប្រើនូវថាមពលអគ្គិសនីវិញ។ ជាមួយគ្នានេះឃើញថាមានក្រុមហ៊ុនបច្ចេកវិទ្យាធំៗនៅលើពិភពលោកក៏បាននឹងកំពុងប្រគូតប្រជែងគ្នាក្នុងទីផ្សាររថយន្តអគ្គិសនីយ៉ាងសកម្មបំផុត។ ជាមួយការផ្លាស់ប្តូរក្នុងបរិបថថ្មីនេះកាន់តែផ្តល់នូវភាពងាយស្រួល និងការការពារបរិស្ថានបានមួយផ្នែកធំផងដែរ។
បច្ចុប្បន្នសម្រាប់បច្ចេកវិទ្យាសាកភ្លើងរថយន្តអគ្គិសនីត្រូវការចំនាយពេលចន្លោះ 20 ទៅ 40 នាទី ក្នុងការសាកហើយតម្រូវទៅតាមបច្ចេកវិទ្យាសាកភ្លើងដែលក្រុមហ៊ុនបំពាក់នៅលើរថយន្តរបស់ពួកគេ និងស្ថានីយ៍ផ្តល់ការសាកភ្លើងទើបអាចចាប់ផ្តើមចេញដំណើរបាន។ យ៉ាងណាមិញបច្ចុប្បន្ននេះ ក៏មានក្រុមហ៊ុនបច្ចេកវិទ្យាខ្នាតយក្សមួយចំនួនបាននឹងកំពុងដំណើរការអភិវឌ្ឍន៍បច្ចេកវិទ្យាសាកភ្លើងរថយន្តល្បឿនលឿនបំផុតផងដែរ។
ដោយឡែកពេលនេះ បើតាមប្រភពព័ត៌មានបាននិយាយថា ក្រុមហ៊ុនបច្ចេកវិទ្យាខ្នាតយក្សលំដាប់ពិភពលោកក្នុងប្រទេសចិន Huawei បាននឹងកំពុងសង្ងំធ្វើការអភិវឌ្ឍន៍បច្ចេកវិទ្យាសាកភ្លើងរថយន្តល្បឿនលឿនបំផុតដើម្បីប្រើនៅលើអនាគតរថយន្តអគ្គិសនីរបស់ខ្លួន។ Huawei មិនមែនគ្រាន់តែជាក្រុមហ៊ុនដែលលក់ស្មាតហ្វូនតែមួយមុខនោះទេ ប៉ុន្តែក្រុមហ៊ុនបច្ចេកវិទ្យាខ្នាតយក្សរបស់ចិនមួយនេះក៏មានលក់នៅផលិតផលជាច្រើនផ្សេងទៀតដូចជា កុំព្យូទ័រឡេបថប់, នាឡិកាឆ្លាតវៃ, ស្មាតធីវី, គ្រឿងបរិក្ខាប្រើប្រាស់ក្នុងការិយាល័យ និងគេហដ្ឋាន រួមទាំងជាក្រុមហ៊ុនដែលក់រថយន្តអគ្គិសនីដ៏ធំ និងល្បីឈ្មោះមួយនៅក្នុងប្រទេសចិនថែមទៀតផង។ ហើយសម្រាប់បច្ចេកវិទ្យាសាកភ្លើងរថយន្តអគ្គិសនីដែល Huawei កំពុងធ្វើការអភិវឌ្ឍន៍នេះ ត្រូវបានគេដឹងថា មានលទ្ធភាពសាកថាមពលថ្មតែ 5 នាទី គឺអាចធ្វើការបើកបរបានរយះចំងាយដល់ទៅ 200 គីឡូម៉ែត្រឯណោះ។
បើតាមការមានប្រសាសន៍ពីនាយកប្រតិបត្តិជាន់ខ្ពស់របស់ក្រុមហ៊ុន Huawei លោក Wang Chao ដែលជាសមាជិកក្រុមប្រឹក្សាភិបាលនៅវេទិការថយន្តអគ្គិសនីជាតិចិនទាំង 100 (National Chinese Electric Vehicle 100 Forum) បានឲ្យដឹងថា ចាប់តាំងពីឆ្នាំ 2021 ក្រុមហ៊ុន Huawei បានដាក់ចេញនូវដំណោះស្រាយសម្រាប់បច្ចេកវិទ្យាបើកបរឆ្លាតវៃ “DriveOne” របស់ខ្លួនទូទាំងប្រទេស ដែលរួមមានលក្ខណៈពិសេសដូចជាការរួមបញ្ចូលបច្ចេកវិទ្យា IoT ដ៏ឆ្លាតវៃដែលដំណើរការនៅលើ HarmonyOS ដែលធ្វើឱ្យប្រសើរសម្រាប់អ្នកបើកបរ ហើយសំខាន់បំផុតនោះ គឺដំណោះស្រាយលើបច្ចេកវិទ្យាសាកបញ្ចូលថាមពលតែម្តង។ លោក Wang បានបន្ថែមថា សម្រាប់បច្ចេកវិទ្យាសាកថាមពលរថយន្តរបស់ Huawei គឺចំនាយពេលសាកតែ 10 នាទី គឺអាចបើកបរបានចម្ងាយ 200 គីឡូម៉ែត្រ។
ទោះយ៉ាងណាក៏ដោយ Huawei តែងតែខិតខំផ្តល់នូវផលិតផល និងសេវាកម្មកាន់តែប្រសើរឡើងដល់អ្នកប្រើប្រាស់ខ្លួនជានិច្ច។ លោក Wang លើកឡើងថា នៅក្នុងរយៈពេលប៉ុន្មានឆ្នាំខាងមុខទៀតនេះ ក្រុមហ៊ុនរបស់លោក គ្រោងនឹងដាក់បង្ហាញនូវដំណោះស្រាយបច្ចេកវិទ្យាសាកថ្មរថយន្តអគ្គិសនីកំលាំង 1000V-EV Tech ដ៏ទំនើបរបស់ខ្លួន ដែលមានសមត្ថភាពខ្ពស់ជាងមុនដោយសាកថ្មរថយន្តតែ 5 នាទីប៉ុណ្ណោះ គឺអាចបើកបរចំងាយដល់ទៅ 200 គីឡូម៉ែត្រ។ នៅដើមទសវត្សរ៍នេះ Huawei បានដាក់ចេញនូវផែនការរបស់ខ្លួនសម្រាប់ការអភិវឌ្ឍន៍របស់ខ្លួននៅក្នុងឧស្សាហកម្មរថយន្តអគ្គិសនី (EV) ហើយគេរំពឹងថានៅឆ្នាំ 2025 ក្រុមហ៊ុន Huawei អាចនឹងបញ្ចេញនូវដំណោះស្រាយសាកថ្មរថយន្តដែលមានតង់ស្យុងខ្ពស់ 1000V/600kW ជាសាធារណៈ ដែលអាចបញ្ចូលថ្មរថយន្តពី 30% ទៅ 80% ចំនាយពេលតែ 5 នាទីប៉ុណ្ណោះ៕
